လူမျိုးရေးခွဲခြားမှုကို ခွင့်ပြုလျှင် နိုင်ငံကျဆုံးမည်ဟု စင်ကာပူ ပြည်ထဲရေးဝန်ကြီး သတိပေး

မေ ၁၂၊ ၂၀၂၁
M-Media

-လူမျိုးရေးခွဲခြားမှုနဲ့ နိုင်ငံခြားသားကြောက်ရောဂါကို ပြန့်နှံ့ခွင့်ပြုရင် နိုင်ငံဟာ ကျဆုံးသွားလိမ့်မယ်လို့ စင်ကာပူ ပြည်ထဲရေးဝန်ကြီး ကေ ရှန်မူဂန်က သတိပေးလိုက်ပါတယ်။

မေလ ၇ ရက်နေ့က အိန္ဒိယနွယ်ဖွား စင်ကာပူနိုင်ငံသား အမျိုးသမီးတစ်ဦးကို တရုတ်နွယ်ဖွား စင်ကာပူနိုင်ငံသား အမျိုးသားက လူမျိုးရေး စော်ကားပြီး ကိုယ်ထိလက်ရောက်ကျူးလွန်မှုနဲ့ပတ်သက်လို့ မနေ့က လွှတ်တော်အတွင်း မေးမြန်းမှုကို ဖြေကြားရာမှာ ရှန်မူဂန်က ထည့်သွင်း သတိပေးခဲ့တာ ဖြစ်ပါတယ်။

လမ်းလျှောက်လေ့ကျင့်ခန်းလုပ်နေတဲ့ အသက် ၅၅ နှစ်အရွယ် အိန္ဒိယအမျိုးသမီးကို တရုတ်အမျိုးသားက နှာခေါင်းစည်း နှာခေါင်းအောက်မှာ ရောက်နေတယ်လို့ဆိုကာ လူမျိုးရေး နှိမ့်ချခွဲခြားတဲ့ စကားလုံးတွေနဲ့ အော်ဟစ်ဆဲဆိုကာ ပြေးလာပြီး ရင်ဘတ်ကို ကန်ကျောက်ခဲ့တဲ့အတွက် အမျိုးသမီးဟာ လဲကျကာ ဒဏ်ရာရခဲ့ပါတယ်။

စင်ကာပူနိုင်ငံသားတွေဟာ ဒီကိစ္စကို ဆိုရှယ်မီဒီယာမှာ ပြင်းပြင်းထန်ထန် ဝေဖန်ရှုတ်ချခဲ့ပြီး ဝန်ကြီးချုပ် လီရှန်လွန်းကလည်း ဒီအဖြစ်အပျက်ဟာ “လူမျိုးစုံရှိတဲ့ မိမိတို့ စင်ကာပူလူ့အဖွဲ့အစည်းရဲ့ ရပ်တပ်ချက်နဲ့ လုံး၀ဆန့်ကျင်တယ်” လို့ ပြောကြားခဲ့ပါတယ်။

ကပ်ရောဂါနဲ့ ဆက်စပ်ပြီး မြင့်တက်လာတဲ့ လူမျိုးရေးခွဲခြားစော်ကားမှုကိစ္စကို အစိုးရက ဘယ်လောက် လေ့လာသုံးသပ်ထားသလဲ၊ ဒီကိစ္စနဲ့ပတ်သက်ပြီး ဖြေရှင်းဖို့ ဘယ်လိုဆောင်ရွက်နေသလဲဆိုတာတွေကို မနေ့က လွှတ်တော်အစည်း​ဝေးမှာ လွှတ်တော်အမတ်တစ်ဦးက မေးမြန်းခဲ့ပါတယ်။

ပြည်ထဲရေးဝန်ကြီး ရှန်မူဂန်က စုံစမ်းစစ်ဆေးမှု မပြီးခင်မှာ ကောက်ချက်မချလိုဘဲ တိုက်ခိုက်ခံရသူရဲ့ ပြောကြားမှုအရဆိုရင် မေလ ၇ ရက်နေ့ အဖြစ်အပျက်ဟာ လူမျိုးရေးခွဲခြားစော်ကားမှုဖြစ်တယ်လို့ ပြန်လည်ဖြေကြားခဲ့ပါတယ်။

ဒီလိုအပြုအမူမျိုးကို ရှုတ်ချရမှာဖြစ်ကြောင်း၊ စင်ကာပူဟာ လူမျိုးရေးခွဲခြားမှုပြဿနာကို ကိုင်တွယ်နိုင်ခဲ့ပြီး အချိန်နဲ့အမျှ လျော့ကျသွားအောင် ကြိုးစားခဲ့ကြောင်း၊ လတ်တလောမှာတော့ ဒီကိစ္စတွေ ပြန်လည်မြင့်တက်လာကြောင်း ရှန်မူဂန်က ထည့်သွင်း ပြောဆိုခဲ့ပါတယ်။

“ကမ္ဘာတစ်ဝှမ်း စီးပွားရေးဖိအားတွေကြောင့် လူပြိန်းကြိုက်ဝါဒ ထွန်းကားလားပြီး၊ လူပြိန်းကြိုက်ဝါဒီတွေက လူတွေ အလုပ်အကိုင် ဆုံးရှုံးမှာကို ကြောက်ရွံမှု၊ စီးပွားရေး မပြေလည်မှုတွေကို အသုံးချကာ တိုင်းပြည်ရဲ့ ပြဿနာအားလုံးကို နိုင်ငံခြာသားတွေ၊ ပြောင်းရွှေ့အခြေချသူတွေအပေါ် ပုံချအပြစ်တင် နိုင်ငံရေး အမြတ်ထုတ်နေကြပါတယ်”

ဒီလို အမူအကျင့်တွေ ဆိုးရွားမလာအောင် စင်ကာပူက ရှောင်လွှဲနိုင်ခဲ့ပေမယ့် နိုင်ငံခြားသားတွေဟာ နိုင်ငံသားတွေထံကနေ အလုပ်အကိုင် လူယူနေတယ်ဆိုတဲ့ စိုးရိမ်မှုမျိုးရှိနေတယ်လို့ ပြည်ထဲရေးဝန်ကြီး ရှန်မူဂန်က ပြောပါတယ်။

အလုပ်ခန့်ရာမှာ နိုင်ငံသားတွေကိုမခန့်ဘဲ နိုင်ငံခြားသားတွေကို ခန့်တဲ့ စနစ်မျိုးတွေက ဒီစိုးရိမ်မှုကို မီးထိုးပေးသလိုဖြစ်နေပြီး ဒီလိုလုပ်ငန်းတွေ အနည်းအကျဉ်းဖြစ်ပေမယ့် လူ့စွမ်းအားအရင်းအမြစ် ဝန်ကြီးဌာနက ဒီကိစ္စကို ကိုင်တွယ်နိုင်ဖို့ ဆောင်ရွက်နေတယ်လို့လည်း သူက ဆိုပါတယ်။

နိုင်ငံအတွင်းမှာ တစ်ချို့အဖွဲ့အစည်းတွေဟာ အကြောက်တရားသွင်းတာ၊ လူမျိုးရေးခွဲခြားမှု၊ နိုင်ငံခြားသားကြောက်ရောဂါ သွတ်သွင်းပေးတာမျိုးတွေ လုပ်ဆောင်နေပြီး ဒါဟာ စင်ကာပူအတွက် အန္တရာယ်ရှိတယ်လို့လည်း ရှန်မူဂန်က သတိပေးခဲ့ပါတယ်။

“ပထမတော့ အိန္ဒိယက အလုပ်လာလုပ်တဲ့သူတွေကို ပစ်မှတ်ထားမယ်။ နောက်ပိုင်းကျရင် စင်ကာပူနိုင်ငံသား အိန္ဒိယနွယ်ဖွားတွေဆီ ရောက်လာပါလိမ့်မယ်။ တိုက်ခိုက်ခံရတဲ့ အမျိုးသမီးဟာ နိုင်ငံသားဖြစ်တာ ၂၅ နှစ် ရှိပါပြီ။ ဒီအတိုင်းသာ ဆက်လွှတ်ပေးထားရင် အိန္ဒိယနွယ်ဖွားအားလုံး အမုန်းဝါဒရဲ့ ပစ်မှတ်ထားခြင်းကို ခံလာရမှာပါ။ စင်ကာပူနိုင်ငံသားအများစုဟာ လူမျိုးရေးခွဲခြားသူတွေ မဟုတ်ကြပါဘူး။ ဒါပေမယ့် လူမျိုးရေးခွဲခြားမှု မီးတောက်ကို လေပင့်ပေးနေရင် တော်တော်မကောင်တဲ့ အခြေအနေကို ကျွန်တော်တို့ ရောက်သွားပါလိမ့်မယ်”

အစိုးရဆန့်ကျင်ရေး ဝဘ်ဆိုက်​တွေမှာ လူမျိုးရေးခွဲခြားမှုဖြစ်အောင် လှုံ့ဆော်​နေတာတွေကိုလည်း ရှန်မူဂန်က ရှုတ်ချခဲ့ပါတယ်။

“လူမျိုးရေးခွဲခြားမှုနဲ့ နိုင်ငံခြားသားကြောက်ရောဂါ ပြန့်နှံ့တာကို ခွင့်ပြုလိုက်မယ်ဆိုရင် ကျွန်တော်တို့နိုင်ငံ ကျရှုံးသွားမှာပါ။ ဒါတွေဟာ စင်ကာပူနိုင်ငံသားတွေကို အောင်မြင်စေခဲ့တဲ့၊ ဂုဏ်တက်စေခဲ့တဲ့ အရာအားလုံးနဲ့ ဆန့်ကျင်နေပါတယ်”

Ref: CNA