ရေနံမှရငွေ ဒေါ်လာ ဘီလီယံ ၁၅၀ ခိုးထုတ်ခံခဲ့ရဟု အီရတ်သမ္မတပြော

မေ ၂၄၊ ၂၀၂၁
M-Media

-အာဏာရှင် ဆက်ဒမ်ဟူစိန် ပြုတ်ချခဲ့တဲ့ ၂၀၀၃ ခုနှစ်နောက်ပိုင်း ရေနံကရတဲ့ ငွေပေါင်း ကန်ဒေါ်လာ ၁၅၀ ဘီလီယံလောက် တိုင်းပြည်အပြင်ကို ခိုးထုတ်ခံခဲ့ရတယ်လို့ အီရတ် သမ္မတ ဘာရ်ဟမ် ဆာလေဟ်က ပြောပါတယ်။

ခြစားမှု တိုက်ဖျက်ရေး၊ အခိုးခံငွေများပြန်ရရေးနဲ့ ကျူးလွန်သူတွေကို အရေးယူအပြစ်ပေးရေးအတွက် လွှတ်တော်ကို သမ္မတက တင်သွင်းတဲ့ ဥပဒေမူကြမ်းတစ်ခုမှာ ဒီလို ဖော်ပြထားတာပါ။

ခြစားတဲ့အမူအကျင့်တွေဟာ တစ်နိုင်ငံလုံးမှာ ပြန့်နှံ့နေပြီး ဒါကိုတားဆီးရေး တင်သွင်းတဲ့ဥပေဒကို အတည်ပြုဖို့လည်း ဆာလေဟ်က တိုက်တွန်းခဲ့ပါတယ်။

နိုင်ငံတကာအဖွဲ့အစည်းတစ်ခုဖြစ်တဲ့ Transparency International က ထုတ်ပြန်တဲ့ ကမ္ဘာ့ခြစားမှုအများဆုံးနိုင်ငံစာရင်းမှာ အီရတ်လည်း ပါဝင်နေပါတယ်။

“၂၀၀၃ ခုနှစ်ကတည်းက ရေနံကနေ ဒေါ်လာ ၁ ထရီလီယံနီးနီးလောက် ဝင်ငွေရပေမယ့် ၁၅၀ ဘီလီယံလောက်ဟာ တိုင်းပြည်ပြင်ပကို ခိုးထုတ်ခံခဲ့ရပါတယ်” လို့ သမ္မတ ဆာလေဟ်က ပြောပါတယ်။

အစိုးရအတွင်း လှိုက်စားနေတဲ့ ခြစားမှုကို ဆန့်ကျင်တဲ့အနေနဲ့ ၂၀၁၉ ခုနှစ်နဲ့ ၂၀၂၀ ခုနှစ်တွေမှာ အီရတ်ပြည်သူတွေ အကြီးအကျယ် ဆန္ဒပြခဲ့ကြပါတယ်။

Ref: Alarabiya