ကယားပြည်နယ်တွင် အိုးအိမ်စွန်ခွာထွက်ပြေးရသူ ၁ သိန်းကျော်ရှိ

ဇွန် ၁၊ ၂၀၂၁
M-Media

-ကယားပြည်နယ်အတွင်းမှာ ပြည်သူ့ကာကွယ်ရေးတပ်ဖွဲ့ (PDF) နဲ့ စစ်ကောင်စီတပ်တွေအကြား တိုက်ပွဲတွေ ပြင်းထန်လာတာကြောင့် အိုးအိမ်စွန့်ခွာထွက်ပြေးရသူအရေအတွက် တစ်သိန်းကျော်လာပြီ ဖြစ်ပါတယ်။

ဖေဖော်ဝါရီ ၁ ရက်နေ့ အာဏာသိမ်းပြီးတဲ့နောက်ပိုင်း စစ်ကောင်စီတပ်တွေရဲ့ အကြမ်းဖက်သတ်ဖြတ် ညှမ်းပမ်းမှုတွေကြောင့် နိုင်ငံတစ်ဝှမ်း လူ ၈၀၀ ကျော် သေဆုံးခဲ့ပြီး၊ ထောင်နဲ့ချီ ဒဏ်ရာရကာ၊ အကျဉ်းချခံရသူတွေလည်း ထောင်ချီရှိနေနေတာ ဖြစ်ပါတယ်။

စစ်ကောင်စီရန်ကို နိုင်ငံတစ်ဝှမ်း ရရာလက်နက်စွဲကိုင်ပြီး တော်လှန်တိုက်ခိုက်နေကြတာ ဖြစ်ပါတယ်။

ကယားပြည်နယ်မှာ ဧပြီလကစပြီး ကရင်နီ ပြည်သူ့ကာကွယ်ရေးတပ်ဖွဲ့ ဖွဲ့စည်းကာ တူမီးသေနတ်တွေ၊ လက်လုပ်လက်နက်တွေနဲ့ စစ်ကောင်စီတပ်ဖွဲ့တွေကို တိုက်ခိုက်နေကြတာပါ။ အရင်ကရှိခဲ့တဲ့ ကရင်နီတပ်ဖွဲ့ကလည်း စစ်ကောင်စီကို ပါဝင်တော်လှန်နေကြပါတယ်။

ဒီမော့ဆိုမြို့အပါအဝင် ကယားပြည်နယ်က မြို့နယ်တွေမှာ ပြီးခဲ့တဲ့ သီတင်းပတ်အနည်းငယ်ကစလို့ တိုက်ပွဲတွေ ပြင်းထန်လာပြီး စစ်ကောင်စီတပ်တွေကလည်း လက်နက်ကြီးတွေ၊ လေကြောင်းပစ်ကူတွေအသုံးပြုပြီး တိုက်ခိုက်မှုတွေ တိုးမြှင့်ပြုလုပ်လာပါတယ်။

တိုက်ပွဲတွေပြင်းထန်လာတာကြောင့် ဒေသခံပြည်သူတွေဟာ အိုးအိမ်စွန့်ခွာထွက်ပြေးနေရပြီး မြို့ပေါ်က ခရစ်ယာန်ဘုရားကျောင်းလို အန္တရာယ်ကင်းရာနေရာတွေနဲ့ တောတောင်တွေထဲ နေထိုင်နေရပါတယ်။ မေလ ၂၃ ရက်နေ့က လွိုင်ကော်မြို့နားက လူ ၃၀၀ လောက် ခိုလှုံနေတဲ့ ခရစ်ယာန်ဘုရားကျောင်းတစ်ခုကို စစ်ကောင်စီတပ်တွေက လက်နက်ကြီးနဲ့ ပစ်ခတ်ခဲ့တာကြောင့် ဘုရားကျောင်းပျက်ဆီးကာ လူ ၄ ဦးသေဆုံးပြီး အများအပြား ဒဏ်ရာရခဲ့ပါတယ်။

လွိုင်ကော်နဲ့ ဒီမော့ဆိုက အနည်းဆုံး ၅ သောင်းလောက် အိုးအိမ်စွန့်ခွာ ထွက်ပြေးခဲ့ရပြီး ဖယ်ခုံနဲ့ မိုးဗြဲမြို့က အိုးအိမ်စွန့်ခွာထွက်ပြေးရတဲ့အရေအတွက်က ၂ သောင်းလောက် ရှိနေပါတယ်။ ဒီလူတွေဟာ လတ်တလော အိမ်ပြန်လာနိုင်ဖို့ မရှိသေးတာကြောင့် စားနပ်ရိက္ခာနဲ့ ရောဂါဘယအန္တရာယ် ရှိနေတယ်လို့ တက်ကြွလှုပ်ရှားသူတွေက ပြောပါတယ်။

Ref: France 24