စစ်ကောင်စီ၏ အဓမ္မအမိန့်ကြောင့် နယ်စည်းမခြားဆရာဝန်များအဖွဲ့ လုပ်ငန်းရပ်ဆိုင်းထားရ

ဇွန် ၁၀၊ ၂၀၂၁
M-Media

-စစ်ကောင်စီရဲ့ အဓမ္မဖိအားပေးမှုကြောင့် ထားဝယ်မြို့မှာ ဆေးဘက်ဆိုင်ရာ အကူအညီပေးရေးလုပ်ငန်းတွေ ရပ်ဆိုင်းလိုက်ရတယ်လို့ နယ်စည်းမခြားဆရာဝန်များအဖွဲ့ MSF က ထုတ်ပြန်ပါတယ်။

ထားဝယ်မှာ နိုင်ငံတကာအကူအညီပေးရေးအဖွဲ့ INGO တွေ လုပ်ငန်း ဆက်လက်လုပ်ဆောင်ခြင်း မပြုဖို့ စစ်ကောင်စီအာဏာပိုင်တွေက ပြီးခဲ့တဲ့တစ်ပတ်မှာ စာထုတ်ဟန့်တားခဲ့တာပါ။

MSF က သူတို့လည်း ဒီစာကို လက်ခံရရှိခဲ့ပြီး အကူအညီပေးမှုတွေ ရပ်ဆိုင်းလိုက်ရတာကြောင့် HIV နဲ့ တီဘီလူနာ ထောင်နဲ့ချီ ဆေးဝါးပြတ်တောက်ကာ အသက်အန္တရာယ်စိုးရိမ်ရတဲ့ အခြေအနေမျိုးအထိ ဖြစ်လာနိုင်တယ်လို့ ပြောကြားခဲ့ပါတယ်။

“ကျန်းမာရေးစောင့်ရှောက်မှုလုပ်ငန်း အလွန်အမင်း ပျက်ယွင်းနေတဲ့ အခုလိုအချိန်မျိုးမှာ MSF ရဲ့ ကူညီမှုတွေကို ရပ်ဆိုင်းလိုက်ရတာကြောင့် မိမိတို့လူနာ တော်တော်များများမှာ အသက်အန္တရာယ် စိုးရိမ်ရတဲ့အထိ ဖြစ်လာနိုင်ပါတယ်” လို့ MSF ရဲ့ ကြေငြာချက်မှာ ဖော်ပြထားပါတယ်။

ထား၀ယ်မြို့နဲ့ အနီးအနားပတ်ဝန်းကျင်မှာ MSF ကနေ အခမဲ့ ကုသပေးနေတဲ့ HIV လူနာ ၂၁၆၂ ဦး ရှိနေပြီး ဘာ့ကြောင့် သူတို့ရဲ့ ကူညီမှုကို တားမြစ်ရလဲဆိုတာ အာဏာပိုင်တွေကို ပြန်မေးထားကာ၊ အမိန့်ကို ရုပ်သိမ်းပေးဖို့လည်း တောင်းဆိုထားကြောင်း MSF က ဆိုပါတယ်။

စစ်အာဏာသိမ်းမှုနောက်ပိုင်း ကျန်းမာရေးစောင့်ရှောက်မှုလုပ်ငန်း ပျက်ယွင်းလာပြီး၊ အကူအညီပေးရေးအဖွဲ့တွေကို အခုလို ပိတ်ပင်လိုက်တဲ့အတွက် တီဘီနဲ့ အခြားကူးစက်ရောဂါအန္တရာယ် ပိုမိုမြင့်တက်လာနိုင်တယ်လို့လည်း MSF က ထည့်သွင်းပြောဆိုခဲ့ပါတယ်။

Ref: AFP