တရုတ်အစိုးရကို ထောက်ခံကြောင်း ပါကစ္စတန် ထပ်ပြော

ဇူလိုင် ၂၊ ၂၀၂၁
M-Media

-တရုတ်အစိုးရရဲ့ လုပ်ရပ်တွေကို ထောက်ခံပြီး တစ်ပါတီ အုပ်စိုးမှုစနစ်ကလည်း ရွေးကောက်ပွဲအခြေပြု ဒီမိုကရေစီစနစ်ထက် ပိုမိုကောင်းမွန်တယ်လို့ ပါကစ္စတန်၀န်ကြီးချုပ် အင်မရန်းခန်းက ပြောကြားလိုက်ပါတယ်။

​ခန်းဟာ ဥရောပနိုင်ငံ အစိုးရတွေရဲ့ အစ္စလာမ်ကြောက်ရောဂါ ကိုင်တွယ်မှု အားနည်းတာကို ဝေဖန်ထောက်ပြလေ့ရှိပေမယ့် တရုတ်နိုင်ငံ ရှင်ကျန်းပြည်နယ်မှာ ဝီဂါနဲ့ အခြား အစ္စလာမ်ဘာသာဝင် လူမျိုးစုတွေ ဖိနှိပ် ညှင်းပမ်းခံရတာကို နှုတ်ဆိတ်နေလေ့ရှိပါတယ်။

ကွန်မြူနစ်ပါတီ နှစ် ၁၀၀ အထိမ်းအမှတ် တရုတ်သတင်းဌာနကို ဖြေကြားတဲ့ အင်တာဗျူးမှာ လူ့အခွင့်အရေးချိုးဖောက်မှုတွေရှိတယ်ဆိုတဲ့ သတင်းတွေ တရုတ်အစိုးရက ငြင်းဆန်တာကို သဘောကျတယ်လို့​ ပြောဆိုခဲ့ပါတယ်။

“တရုတ်အာဏာပိုင်တွေနဲ့ ဆက်သွယ်မှုတွေအရ ရှင်ကျန်းမှာ ​ဖြစ်နေတာတွေဟာ အနောက်မီဒီယာတွေ၊ အနောက်နိုင်ငံအစိုးရတွေထံက ကြားရတာတွေနဲ့ လုံး၀ တစ်ခြားစီပါပဲ။ ကျွန်တော်တို့ဟာ တရုတ်နဲ့ အလွန်ခိုင်မာတဲ့၊ ယုံကြည်မှုကို အခြေခံတဲ့ ဆက်ဆံရေးရှိတယ်။ ဒါ့ကြောင့် တရုတ်အစိုးရက ပြောတာကို ကျွန်တော်တို့ နှစ်နှစ်ကာကာ လက်ခံပါတယ်။ ရှင်ကျန်းက သူတို့ရဲ့စီမံကိန်တွေအကြောင်း ပြောတာတွေကို ကျွန်တော်တို့ လက်ခံပါတယ်”

တရုတ်-ပါကစ္စတန် စီးပွားရေးစင်္ကြန်လမ်း စီမံကိန်း (CPEC) ကနေတစ်ဆင့် တရုတ်ဟာ ပါကစ္စတန်မှာ ကန်ဒေါ်လာ ဘီလီယံ ၆၀ လောက် ရင်းနှီးမြှုပ်နှံထားတာပါ။

ကွန်မြူနစ်ပါတီတစ်ခုတည်းက ထိန်းချုပ်တဲ့ တရုတ်နိုင်ငံရဲ့ တစ်ပါတီအုပ်ချုပ်မှုစနစ်ကို နှစ်သက်တယ်လို့လည်း ခန်းက ထည့်သွင်းပြောဆိုခဲ့ပါတယ်။

“​တရုတ်ကွန်မြူနစ်ပါတီ (CPC) ဟာ ထူးခြားတဲ့ ပုံစံတစ်ခုပါ။ လူ့အဖွဲ့အစည်းတွေ ဖွံ့ဖြိုးတိုးတက်ဖို့ အကောင်းဆုံးပုံစံဟာ အနောက်တိုင်း ဒီမိုကရေစီစနစ်လို့ အခုအချိန်အထိ ကျွန်တော်တို့ကို ပြောကြတယ်။ CPC က တစ်ခြားနည်းလမ်းတစ်ခုကို ဖော်ဆောင်ပြသွားတာပါ။ လူ့အဖွဲ့အစည်း အကျိုးရှိအောင် ဖန်တီးပြီး အနောက်တိုင်း ဒီမိုကရေစီအားလုံးကို ရိုက်ချိုးသွားတာပါ”

အပြောင်းအလဲလုပ်ဆောင်ရာမှာ ဒီမိုကရေစီက အကြပ်အတည်းဖြစ်စေပြီး တရုတ်ရဲ့ တစ်ပါတီစနစ်က ပြောင်းလွယ်ပြင်လွယ် ဖြစ်တယ်လို့လည်း ခန်းက ထည့်သွင်းပြောဆိုခဲ့ပါတယ်။

Ref : Aljazeera