ရုရှားက စစ်ကောင်စီတပ်ထံ လေယာဉ်များပေးပို့

ဇူလိုင် ၂၇၊ ၂၀၂၁
M-Media

-အာဏာသိမ်းစစ်ကောင်စီက ဝယ်ယူထားတဲ့ တိုက်ခိုက်ရေး ဂျက်လေယာဉ် Sukhoi Su-30SME နဲ့ စစ်ဖက် လေ့ကျင့်ရေးလေယာဉ်တွေကို ပထမအသုတ် ပေးပို့လိုက်တယ်လို့ ရုရှား စစ်ဖက်ပူးပေါင်းဆောင်ရွက်ရေးဌာန အကြီးအကဲ ဒီမီထရီ ဆူဂေ့ဗ်က တနင်္ဂနွေနေ့မှာ ပြောကြားလိုက်ပါတယ်။

ဒီလိုပေးပို့မှုဟာ မြန်မာလေတပ်ရဲ့ စွမ်းဆောင်နိုင်မှုကို သိသိသာသာ အားကောင်းလာစေမှာဖြစ်ပြီး မြန်မာစစ်တပ်ဟာ အရှေ့တောင်အာရှမှာ ရုရှားရဲ့ အဓိကမိတ်ဖက်တွေထဲက တစ်ခုအဖြစ် ဆက်ရှိနေမှာဖြစ်တယ်လို့ လေကြောင်းပြပွဲ Maks-2021 Air Show မှာ ဆူဂေ့ဗ်က ထည့်သွင်းပြောဆိုခဲ့ပါတယ်။ ဒီပွဲကို ရုရှားသမ္မတ ပူတင်လည်း တက်ရောက်ခဲ့ပါတယ်။

မြန်မာစစ်တပ်ဟာ ရုရှားထုတ် Mig-29 နဲ့ Jak-130 လေယာဉ်တွေကို အရင်ကတည်းက အသုံးပြုခဲ့တာပါ။ ရုရှား နိုင်ငံပိုင်လက်နက်ကုမ္ပဏီ Rosoboronexport အကြီးအကဲ အလက်ဇန်းဒါး မီခေ့ဗ်ကလည်း မြန်မာစစ်တပ်နဲ့ ရှေ့ဆက် ပူးပေါင်းဆောင်ရွက်သွားမယ်လို့ ပြီးခဲ့တဲ့တစ်ပတ်မှာ ပြောကြားခဲ့ပါတယ်။

ရုရှားဟာ မြန်မာနိုင်ငံက စစ်အာဏာရှင်အဆက်ဆက်ကို ကျောထောက်နောက်ခံပြုပေးနေတဲ့ နိုင်ငံတွေထဲက တစ်ခုဖြစ်ပြီး လက်နက်ရောင်းချတာအပြင် စစ်သားတွေကို လေ့ကျင့်သင်ကြားပေးတာ၊ ပညာတော်သင်ခေါ်ယူတာတွေလည်း လုပ်ဆောင်ပါတယ်။

ဖေဖော်ဝါရီ ၁ ရက် မြန်မာနိုင်ငံမှာ စစ်တပ်က အာဏာသိမ်းပြီးနောက်ပိုင်း မတ်လ ၂၇ ရက်နေ့က ပြုလုပ်တဲ့ တပ်မတော်နေ့အခမ်းအနားမှာ ရုရှား ဒုတိယကာကွယ်ရေးဝန်ကြီး တက်ရောက်ပြီး အာဏာသိမ်းမှုကို ထောက်ခံကြောင်း တရားဝင် ထုတ်ဖော်ပြသခဲ့ပါတယ်။

Ref: Asia News