စစ်ကောင်စီကဖမ်းထားသည့် မိမိတို့နိုင်ငံသားနှင့် အဆက်အသွယ်မရတော့ကြောင်း အမေရိကန် ထုတ်ပြန်

ဩဂုတ် ၁၃၊ ၂၀၂၁
M-Media

-အာဏာသိမ်းစစ်ကောင်စီက ဖမ်းဆီးထားတဲ့ မိမိတို့နိုင်ငံသား ဂျာနယ်လစ်နဲ့ အဆက်အသွယ်မရတာ သီတင်းပတ်ချီ ရှိနေပြီလို့ အမေရိကန်က မနေ့မှာ ထုတ်ပြန်ပါတယ်။

Frontier Myanmar သတင်းဌာနရဲ့ အယ်ဒီတာဖြစ်တဲ့ ဒန်နီဖန်စတာဟာ မေလ ၂၄ ရက်နေ့က မလေးရှားသွားမယ့် ခရီးစဉ်အတွင်း ရန်ကုန်လေဆိပ်မှာ ဖမ်းဆီးခံလိုက်ရပြီး နိုင်ငံတော် အကြည်အညိုပျက်စေမှုနဲ့ တရားစွဲဆိုခံထားရတာ ဖြစ်ပါတယ်။ စစ်ကောင်စီဟာ ဖန်စတာကို အင်းစိန်ထောင်ထဲမှာ ထိန်းသိမ်းထားပါတယ်။

ဇူလိုင်လ အင်းစိန်ထောင်အတွင်း သပိတ်မှောက်မှု ပြီးကတည်းက ဖန်စတာနဲ့ အဆက်အသွယ် မရတော့ဘဲ အခြေအနေကို စောင့်ကြည့်နေကာ၊ ပြန်လွှတ်ပေးရေး စစ်ကောင်စီကို ဖိအားပေးသွားမယ်လို့ အမေရိကန်အစိုးရ ပြောရေးဆိုခွင့်ရှိသူ နဒ်ပရိုက်စ်က ပြောပါတယ်။

“ဒါဟာ ကျွန်တော်တို့အတွက် ဦးစားပေးပါ။ အလွန်အမင်း စိုးရိမ်ပူပန်မိပါတယ်”

အင်းစိန်ထောင်အတွင်း သပိတ်မှောက်မှု မဖြစ်ပွားခင် အမေရိကန်သံအမတ်က ဖန်စတာကို ဖုန်းနဲ့ အကြိမ်ကြိမ် စကားပြောခွင့်ရခဲ့ပြီး ဖန်စတာရဲ့ မိသားစုဝင်တွေလည်း စကားပြောဆိုခဲ့ရတယ်လို့ ပရိုက်စ်က ဆိုပါတယ်။

ဖန်စတာအပါအဝင် ဂျာနယ်လစ်တွေကို အာဏာသိမ်းစစ်ကောင်စီက ဖမ်းဆီးတာဟာ လက်မခံနိုင်စရာ လုပ်ရပ်ဖြစ်ကြောင်း သူက ထည့်သွင်းပြောဆိုခဲ့ပါတယ်။

“သတင်းလုပ်ငန်းဟာ ရာဇဝတ်မှု မဟုတ်ပါဘူး။ သာယာ၀ပြော၊ ကျစ်လစ်တောင့်တင်းပြီး လွတ်လပ်တဲ့ လူ့အခွင့်အစည်းတစ်ခု ထူထောင်ရာမှာ လွတ်လပ်တဲ့ မီဒီယာကဏ္ဍက မပါမဖြစ်ပါပဲ”

Ref: Reuters