ပုံပြောင်းမှုအလွန်များသည့် ကိုဗစ်မျိုးကွဲသစ်တစ်မျိုးကို တောင်အာဖရိကတွင် တွေ့ရှိ

ဩဂုတ် ၃၁၊ ၂၀၂၁
M-Media

-ပုံပြောင်းမှုများစွာ ဖြစ်ပေါ်တဲ့ ကိုဗစ်ဗိုင်းရပ်စ် မျိုးကွဲတစ်ခုကို တောင်အာဖရိ သိပ္ပံပညာရှင်တွေက တွေ့ရှိထားပြီး လက်ရှိ ပြန့်နှံ့နေတဲ့ ကိုဗစ်ပိုးတွေထက် ပိုအန္တရာယ်ရှိလားဆိုတာကို လေ့လာဆန်းစစ်မှုတွေ ပြုလုပ်နေပါတယ်။

C.1.2 လို့ အမည်ပေးထားတဲ့ အဲဒီမျိုးကွဲကို မေလမှာ စတင် တွေ့ရှိခဲ့တာဖြစ်ပြီး အခုအချိန်မှာတော့ နိုင်ငံအတွင်း ပြည်နယ်တော်တော်များများမှာ ပြန့်နှံ့နေတဲ့အပြင် အာဖရိက အခြားတိုင်းပြည်တွေ၊ ဥရောပ၊ အာရှနဲ့ သမုဒ္ဒရာပိုင်း ဒေသတွေအထိပါ ရောက်ရှိနေပြီ ဖြစ်ပါတယ်။

ပိုမိုပြန်နှံ့လွယ်ပြီး၊ ကိုဗစ်ကာကွယ်ဆေးကြောင့် ပေါ်ထွက်လာမယ့် ကိုယ်ခံစွမ်းအားကို အံတုနိုင်မယ့် ပုံပြောင်းမှုမျိုး C.1.2 မျိုးကွဲမှာ တွေ့ရပေမယ့် အတိအကျ ပြောနိုင်ဖို့အတွက် လေ့လာဆန်းစစ်မှုတွေ ထပ်လုပ်ရမှာ ဖြစ်ပါတယ်။

ကမ္ဘာ့ကျန်းမာရေးအဖွဲ့ (WHO) စိုးရိမ်စရာအကောင်းဆုံးအဖြစ် သတ်မှတ်ထားတဲ့ ကိုဗစ်မျိုးကွဲ ၄ ခုက Beta ဗားရှင်းကို တောင်အာဖရိကမှာ ပထမဆုံး တွေ့ရှိခဲ့တာပါ။

C.1.2 ကိုဗစ်မျိုးကွဲ လေ့လာမှုမှာ ပါဝင်ခဲ့သူ ကူးစက်ရောဂါပညာရှင် ရစ်ချက် လက်ဆဲလ်စ်က အခုလို မျိုးကွဲတစ်ခု ထပ်ထွက်လာတာကို ကြည့်ခြင်းအားဖြင့် ဒီကပ်ရောဂါ အချိန်တိုတိုနဲ့ ပြီးဆုံးမှာ မဟုတ်ဘူးဆိုတာနဲ့ ဗိုင်းရပ်စ်ဟာ လူတွေကို ပိုမိုကူးစက်နိုင်ဖို့ နည်းလမ်းတွေ ရှာဖွေနေတုန်းပဲဆိုတာကို တွေ့ရတယ်လို့ မှတ်ချက်ပေးခဲ့ပါတယ်။

လက်ရှိ ကမ္ဘာတစ်ဝှမ်း ပြန့်နှံ့ကာ ကူးစက်မှု၊ သေဆုံးမှု အလွန်များပြားခဲ့တဲ့ Delta ဗိုင်းရပ်စ်နေရာကို အခု C.1.2 က အစားဝင်မယ့် အနေအထားမျိုး မရှိသေးဘူးလို့ ပညာရှင်တွေက သုံးသပ်ပါတယ်။

C.1.2 ပတ်သက်တဲ့ တွေ့ရှိချက်တွေကို WHO ထံ သတင်းပေးပို့ထားပြီး တောင်အာဖရိက ကျန်းမာရေးဝန်ကြီးဌာနကတော့ ဒီကိစ္စနဲ့ပတ်သက်ပြီး မှတ်ချက်ပေးဖို့ ငြင်းဆိုခဲ့ပါတယ်။

Ref: Reuters