အမျိုးသမီးများ တက္ကသိုလ်တက်ရာတွင် လိုက်နာရမည့်စည်းကမ်းများ တာလီဘန် ထုတ်ပြန်

စက်တင်ဘာ ၁၃၊ ၂၀၂၁
M-Media

-တက္ကသိုလ်တွေမှာ ပညာသင်ယူတဲ့အခါ အမျိုးသမီးတွေနဲ့ပတ်သက်တဲ့ စည်းမျဉ်းစည်းကမ်းတွေကို တာလီဘန်က မနေ့မှာ ထုတ်ပြန်လိုက်ပြီး ဟီဂျဘ်ပုဝါဆောင်းဖို့၊ အမျိုးသား၊ အမျိုးသမီး သီးခြားစီခွဲကာ သင်ယူဖို့တွေ ပါဝင်ပါတယ်။

၁၉၉၆ ခုနှစ်ကနေ ၂၀၀၁ ခုနှစ် တာလီဘန်ရဲ့ ပထမအကြိမ် အုပ်စိုးမှုအတွင်း အမျိုးသမီးတွေကို ပညာသင်ယူခွင့်၊ အလုပ်လုပ်ခွင့် မပေးခဲ့သလို၊ အုပ်ထိန်းသူအမျိုးသားမပါရင် အမျိုးသမီးတွေ အပြင်ထွက်ခွင့်ပါ မရပါဘူး။ ဒါပေမယ့် အခုတစ်ကြိမ်မှာတော့ တင်းကြပ်မှုတွေကို လျှော့ပေါ့ပေးမယ်လို့ တာလီဘန်က ပြောထားပါတယ်။

တာလီဘန်ရဲ့ အဆင့်မြင့်ပညာရေးဝန်ကြီး အဘ်ဒူလ် ဘာကီ ဟက်ကာနီက သူတို့ရဲ့ ပညာရေးမူ၀ါဒကို မနေ့က သတင်စာရှင်းလင်းပွဲလုပ်ပြီး ချပြရာမှာ အမျိုးသမီးတွေ ပညာသင်ကြားမှုနဲ့ သက်ဆိုင်တဲ့ အချက်တွေလည်း ပါဝင်ပါတယ်။

အရင်တစ်ကြိမ်ကလို အမျိုးသမီးတွေကို ပညာသင်ကြားခွင့် ပိတ်ပင်မှာမဟုတ်တော့ဘဲ ဘွဲ့လွန်အထိ ပညာသင်ကြားခွင့်ရမယ်လို့ ဟက်ကာနီက ဆိုပါတယ်။

“လက်ရှိရှိနေတဲ့အနေအထားပေါ်မှာ ကျွန်တော်တို့ တည်ဆောက်သွားမှာပါ”

ဒါပေမယ့် အမျိုးသား၊ အမျိုးသမီး ရောနှောပညာသင်ကြားမှုကို ခွင့်ပြုမှာမဟုတ်ဘဲ တက္ကသိုလ်တွေမှာ သီးခြားအတန်းတွေ လုပ်ပေးရမှာဖြစ်ကြောင်း၊ ဒီလိုမလုပ်ပေးနိုင်ရင် လိုက်ကာအသုံးပြုကာ အမျိုးသား၊ အမျိုးသမီး ခွဲထားရမှာဖြစ်ကြောင်း ဟာက်ကာနီက ထည့်သွင်းပြောဆိုခဲ့ပါတယ်။

တာလီဘန်ရဲ့ ပညာရေးမူဝါဒတွေထဲမှာ အမျိုးသမီးတွေ ​ဟီဂျဘ် မဖြစ်မနေဝတ်ရမယ်ဆိုတဲ့အချက်ပါဝင်ပြီး ခေါင်းဆောင်ပုဝါကို ရည်ညွှန်းတာလား၊ ဒါမှမဟုတ် မျက်နှာပါဖုံးရတဲ့ ဝတ်ရုံကို ရည်ညွှန်းတာလားဆိုတာ ဟက်ကာနီက အသေးစိတ် မပြောသွားပါဘူး။

အမျိုးသမီးတွေကို အမျိုးသမီးဆရာမတွေသာ စာသင်ကြားရမှာဖြစ်ပြီး၊ ဆရာမ မလုံလောက်ရင် ဆရာတွေက လိုက်ကာကာတာ၊ ဒါမှမဟုတ် ဗီဒီယိုစခရင်တဲ့သင်တာမျိုးတွေ လုပ်နိုင်တယ်လို့ ဟက်ကာနီက ဆိုပါတယ်။ တက္ကသိုလ်တွေမှာသင်ကြားတဲ့ ဘာသာရပ်တွေကို ပြန်လည်သုံးသပ်သွားမယ်လို့ သူက ပြောပါတယ်။

အာဖဂန်တက္ကသိုလ်တွေက ဘွဲ့ရတဲ့သူတွေဟာ ဒေသတွင်းနဲ့ နိုင်ငံတကာတက္ကသိုလ်တွေက ဘွဲ့ရသူတွေနဲ့ ရင်ဘောင်တန်းနိုင်တာမျိုး လိုချင်တယ်လို့လည်း ဟက်ကာနီက ထည့်သွင်းပြောဆိုခဲ့ပါတယ်။

တာလီဘန်ဟာ ဩဂုတ်လ ဒုတိယပတ်မှာ အာဖဂန်နစ္စတန်တစ်နိုင်ငံလုံးကို သိမ်းပိုက်နိုင်ခဲ့ပြီး ပြီးခဲ့တဲ့တစ်ပတ်မှာတော့ အစိုးရအဖွဲ့ကို ထုတ်ပြန်ခဲ့ပါတယ်။

တာလီဘန်ရဲ့မူဝါဒကို မကြိုက်တဲ့အတွက် မြို့တော်ကာဘူးလ်မှာ အမျိုးသမီးတွေ ဆန္ဒပြတာမျိုး ရှိခဲ့ပြီး၊ ကာဘူးလ်တက္ကသိုလ်မှာ အမျိုးသမီး ၃၀၀ လောက် ​တာလီဘန်ကိုထောက်ခံကြောင်း ဆန္ဒထုတ်ဖော်မှုတစ်ခု ပြီးခဲ့တဲ့တစ်ပတ်မှာ ပေါ်ပေါက်လာခဲ့ပါတယ်။

Ref: Aljazeera