အိန္ဒိယမှ နာမည်ကြီးလူဆိုးဂိုဏ်းခေါင်းဆောင် တရားခွင်တွင် ပစ်သတ်ခံရ

စက်တင်ဘာ ၂၄၊ ၂၀၂၁
M-Media

-အိန္ဒိယနိုင်ငံမှာ လူသတ်မှု ပြန်ပေးဆွဲမှုတွေနဲ့ ဖမ်းဆီးခံထားရတဲ့ နာမည်ကြီး လူဆိုးဂိုဏ်းခေါင်းဆောင်တစ်ဦးဟာ ဒီကနေ့ တရားခွင်မှာ လူ ၂ ဦးရဲ့ ပစ်ခတ်သတ်ဖြတ်မှုကို ခံလိုက်ရပါတယ်။

ဂျီတန်ဒါ မာအန် ဂိုဂီဆိုတဲ့ အဲဒီ လူဆိုးဂိုဏ်းခေါင်းဆောင် ဒေလီမြို့က တရားရုံးတစ်ခုမှာ အမှုရင်ဆိုင်ဖို့ ရှိနေစဥ် ရှေ့နေဝတ်စုံဝတ်ထားပြီး ဝင်လာတဲ့ လူ ၂ ဦးက သေနတ်နဲ့ ပစ်သတ်ခဲ့တာ ဖြစ်ပါတယ်။ ဒီသတ်ဖြတ်မှုကို ပြိုင်ဘက်လူဆိုးဂိုဏ်းက လုပ်ဆောင်တာဖြစ်ပြီး ကျူးလွန်သူတွေကို အသေပစ်ခတ် ဖမ်းဆီးနိုင်ခဲ့တယ်လို့ ဒေလီရဲတပ်ဖွဲ့က ပြောပါတယ်။

ဂိုဂီဟာ ဒေလီရဲတပ်ဖွဲ့က အလိုအရှိဆုံး လူဆိုးဂိုဏ်းခေါင်းဆောင်တစ်ယောက်ဖြစ်ပြီး နိုင်ငံတစ်ဝှမ်း လူသတ်မှု၊ ပြန်ပေးဆွဲမှု၊ လိမ်လည်မှုပေါင်းများစွာ ကျူးလွန်ထားသူပါ။ ပြိုင်ဘက် လူဆိုးဂိုဏ်းတွေကလည်း ဂိုဂီကို ရှင်းလင်းဖို့ အပြိုင်ကြိုးစားနေကြတာ ဖြစ်ပါတယ်။

ပြီးခဲ့တဲ့နှစ် မတ်လမှာ ဂိုဂီကို ရဲတပ်ဖွဲ့က ဖမ်းဆီးနိုင်ခဲ့ပြီး တရားစွဲဆိုခဲ့တာပါ။

ဂိုဂီဟာ ဆယ်ကျော်သက်ဘ၀ကတည်းက ရာဇဝတ်မှုတွေကို ကျူးလွန်တာဖြစ်ပြီး နောက်ပိုင်းမှာတော့ ဟာရာနာပြည်နယ်က နာမည်ကြီးအဆိုတော်တစ်ဦးအပါအဝင် နာမည်ကျော် သတ်ဖြတ်မှုတော်တော်များများကို ကျူးလွန်ခဲ့သူဖြစ်ပါတယ်။

အခုအဖြစ်အပျက်ကြောင့် ဒေလီရဲတပ်ဖွဲ့ရဲ့ တရားခွင်လုံခြုံရေးဆောင်ရွက်မှုအပေါ် ဝေဖန်မှုတွေလည်း ပေါ်ထွက်လာပါတယ်။

Ref: BBC