ဒီယားဘွန်းမြို့၏ ပထမဆုံး အာရပ်နွယ်ဖွားမြို့တော်ဝန်က အလုပ်ကြိုးစားရန် လူငယ်များကို တိုက်တွန်း

နိုဝင်ဘာ ၇၊ ၂၀၂၁
M-Media

-အမေရိကန်ပြည်ထောင်စု မီချီဂန်ပြည်နယ် ဒီးယားဘွန်းမြို့ရဲ့ ပထမဆုံး အာရပ်နွယ်ဖွားမြို့တော်ဝန်က လူငယ်တွေကို ရည်မှန်းချက်ထားပြီး အလုပ်ကြိုးစားကြဖို့ တိုက်တွန်းလိုက်ပါတယ်။

လက်ဘနွန်နိုင်ငံက ပြောင်းရွှေ့အခြေချလာသူ မိဘတွေကနေ မွေးဖွားလာတဲ့ အဘ်ဒူလာ ဟမ်မွဒ်ဟာ အင်္ဂါနေ့က ဒီးယားဘွန်းမြို့တော်ဝန်အဖြစ် ရွေးချယ်ခံခဲ့ရတာပါ။ ဒါဟာ မြို့ရဲ့သမိုင်းမှာ ပထမဆုံး အာရပ်နွယ်ဖွား မွတ်စလင်တစ်ဦးက မြို့တော်ဝန်ရာထူးကို ရရှိခဲ့တာ ဖြစ်ပါတယ်။

ဒီးယားဘွန်းမြို့ဟာ အမေရိကန်မှာ အာရပ်နွယ်ဖွားတွေ အများဆုံးရှိတဲ့ မြို့တစ်ခုဖြစ်ပြီး စုစုပေါင်း လူဦးရေရဲ့ ၄၂ ရာခိုင်နှုန်းက အာရပ်နွယ်ဖွားတွေပါ။

“မာန်ဆွယ်ကြိုးရတဲ့ အတွေ့အကြုံပါ။ ဒီမြို့မှာ လူတွေဟာ ဘယ်လိုဝတ်ပြုဆုတောင်းလည်းဆိုတာကို မကြည့်ဘဲနဲ့ ဘယ်လို ဦးဆောင်မှုပေးလဲဆိုတာကိုကြည့်ပြီး မဲပေးကြတယ်ဆိုတာမျိုးက ရင်ထဲကို ထိပါတယ်။ အဘ်ဒူလာ ဟူစိန် ဟမ်မွဒ်လို့ အမည်ရှိတဲ့ ကျွန်တော့်လိုလူမျိုးဟာ အောင်မြင်မှုရဖို့အတွက် နာမည်ပြောင်းစရာမလိုဘူး၊ ကိုယ့်လူမျိုးကြောင့် ရှက်ရွံ့နေစရာမလိုဘူးဆိုတာကို ပြသလိုက်တာမျိုးကလည်း ကျွန်တော့်ကို ကျိုးသွားစေပါတယ်” လို့ အသက် ၃၁ နှစ်အရွယ် ဟမ်မွဒ်က ပြောပါတယ်။

ဟမ်မွဒ်ဟာ မီချီဂန် ပြည်နယ်လွှတ်တော်မှာ ၂၀၁၆ ခုနှစ်ကစပြီး ခရိုင်အမှတ် ၁၅ လွှတ်တော်ကိုယ်စားလှယ်အဖြစ် တာဝန်ထမ်းဆောင်​နေသူ ဖြစ်ပါတယ်။

သူဟာ ဇန်နဝါရီလမှာ ဒီးယားဘွန်းမြို့တော်ဝန်အဖြစ် တာဝန်ထမ်းဆောင်မှာ ဖြစ်ပါတယ်။ သဘာဝ ဘေးအန္တရာယ် အပါအဝင် မြို့ကိုထိခိုက်တဲ့ ပြဿနာတွေကို အထူးအလေးထား ဖြေရှင်းသွားမှာဖြစ်ပြီး၊ အခွန်လျှော့ချရေး၊ ကိုဗစ်နောက်ဆက်တွဲ စီးပွားရေးပြဿနာကြောင့် အတိဒုက္ခရောက်နေကြတဲ့ မြို့နေပြည်သူတွေကို ကူညီရေး ဆောင်ရွက်သွားမယ်လို့လည်း ဟမ်မွဒ်က ပြောကြားခဲ့ပါတယ်။

သူ့ရဲ့အောင်မြင်မှုဟာ လူငယ်တွေ အထူးသဖြင့် ခွဲခြားဆက်ဆံခံရသူတွေအတွက် မျှော်လင့်ချက်တစ်ခု ဖြစ်လိမ့်မယ်လို့လည်း ဟမ်မွဒ်က ယူဆနေပါတယ်။

“ကိုယ့်ရဲ့ဖြစ်တည်မှုကြောင့် ဘယ်တော့မှ ရှက်ရွံ့မနေပါနဲ့။ ကိုယ်ရဲ့ အမည်ကို ဂုဏ်ယူပါ။ ကိုယ့်ရဲ့အမှတ်သညာအပေါ်မှာ စိတ်မပျက်ပါနဲ့။ ဇွဲနဘဲနဲ့ အလုပ်ကြိုးစားပြီး လူတွေအကျိုးကိုလုပ်ရင် နေရာဆိုတာ ရလာမှာပါ”

Ref: CNN