ဒီဇင်ဘာ ၁၂၊ ၂၀၂၁
M-Media
![](http://www.m-mediagroup.com/wp-content/uploads/2021/12/china.jpg)
-နိုင်ငံခြားတိုင်းပြည်တွေကနေ ကိုဗစ်ပိုး ဝင်လာမှာကို စိုးရိမ်တဲ့အတွက် ကိုဗစ်စည်းမျဉ်းစည်းကမ်းတွေ တင်းတင်းကြပ်ကြပ် လုပ်ဆောင်ဖို့ တရုတ်အစိုးရက နယ်စပ်မြို့တွေကို ညွှန်ကြားလိုက်ပါတယ်။
တရုတ်နိုင်ငံမှာ အောက်တိုဘာလ အလယ်လောက်ကစပြီး ပြည်တွင်း ကိုဗစ်ကူးစက်မှုအရေအတွက် မြင့်တက်လာကာ ၂ ထောင်ကျော်လောက်ရှိခဲ့ပြီး အဆိုးဝါးဆုံး ခံစားရတဲ့ဒေသတွေက ရုရှား၊ မွန်ဂိုလီးယားတို့နဲ့ ဆက်စပ်နေတဲ့ နယ်စပ်ဒေသတွေ ဖြစ်ပါတယ်။
ဒီဇင်ဘာ ၁၁ ရက်နေ့ တရုတ်ဗဟိုအစိုးရက ပြည်နယ်အစိုးရတွေကိုပေးပို့တဲ့ ညွှန်ကြားစာမှာ လတ်တလောကူးစက်မှုတွေအားလုံးဟာ အခြားတိုင်းပြည်ကနေ ဝင်ရောက်လာတာကြောင့်ဖြစ်ပြီး၊ ကိုဗစ်စစ်ဆေးမှုတွေ၊ ကန့်သတ်မှုတွေကို နောက်နှစ် မတ်လ ၁၅ ရက်နေ့အထိ တင်းတင်းကြပ်ကြပ် ဆောင်ရွက်ဖို့လည်း အမိန့်ပေးထားပါတယ်။
နယ်စပ်ဒေသကနေ နိုင်ငံခြားထွက်လိုသူတွေအနေနဲ့ မသွားခင် ၄၈ နာရီအတွင်း ကိုဗစ်ကင်းစင်ကြောင်း ဆေးစစ်ချက်ပြဖို့၊ နယ်စပ်ကို ပြန်ဝင်လာသူတွေ ကိုဗစ် ရှိ၊ မရှိ အနည်းဆုံး တစ်ကြိမ်စစ်ဆေးဖို့၊ ကူးစက်နိုင်ခြေရှိတဲ့ ဒေသတွေမှာ ကိုဗစ်စည်းမျဉ်းတွေကို တင်းကြပ်ဖို့လည်း ညွှန်ကြားစာမှာ ပါဝင်ပါတယ်။
ပြည်မကလူတွေ နယ်စပ်မြို့တွေကို မလိုအပ်ရင်မသွားဖို့ တရုတ်အစိုးရက နိုဝင်ဘာလမှာ အမိန့်ထုတ်ခဲ့ပါတယ်။
၂၀၁၉ ခုနှစ် နှစ်ကုန်ပိုင်းက တရုတ်နိုင်ငံ ၀ူဟန်မြို့ကနေ စတင်ပြန့်နှံ့လာတဲ့ ကိုဗစ်ပိုးကြောင့် ကမ္ဘာ့တစ်ဝှမ်း လူ ၅ သန်းကျော် သေဆုံးခဲ့ပါတယ်။
Ref: Reuters
Comments