မွတ်စလင်များကို လူမျိုးတုန်းသတ်ရေး ဟိန္ဒူဘုန်းကြီးများက ဆော်ဩမှုကို အိန္ဒိယတရားရုံးချုပ် စစ်ဆေးမည်

ဇန်နဝါရီ ၁၃၊ ၂၀၂၂
M-Media

-ပြီးခဲ့တဲ့လ တရားပွဲတစ်ခုမှာ မွတ်စလင်တွေကို လူမျိုးတုန်းသတ်ဖြတ်ဖို့ ဟိန္ဒူဘုန်းကြီးတွေက တိုက်တွန်း ဆော်ဩခဲ့မှု ကိစ္စအတွက် စုံစမ်းစစ်ဆေးမှုတွေ ပြုလုပ်သွားမယ်လို့ အိန္ဒိယတရားရုံးချုပ်က အခမ်းအနားကျင်းပရာ အူတာရက်ဟန်းပြည်နယ်ကို မနေ့က အသိပေးစာ ပေးပို့လိုက်ပါတယ်။

ဟိန္ဒူဘာသာရေးမြို့ ဟာရစ်ဒ်ဝါမှာပြုလုပ်တဲ့ ဒီတရားပွဲမှာ အမုန်းစကားပြောဆိုမှုတွေ လူမျိုးတုန်းသတ်ဖြတ်ဖို့ ပြောဆိုမှုတွေကို စုံစမ်းပေးဖို့ အငြိမ်းစားတရားသူကြီး အန်ဂျာနာ ပရာကက်ရှ်က တရားရုံးချုပ်ကို ဦးတိုက် လျှောက်ထားခဲ့တာဖြစ်ပါတယ်။

ဒီပြောကြားမှုတွေဟာ နိုင်ငံအတွင်း စည်းလုံးညီညွတ်မှုကို အကြီးအကျယ် ခြိမ်းခြောက်ရုံသာမက သန်းနဲ့ချီတဲ့ နိုင်ငံသားမွတ်စလင်တွေရဲ့ အသက်အိုးအိမ်စည်းစိမ်အတွက်လည်း အန္တရာယ်ရှိတယ်လို့ ပရာကက်ရှ်က သူ့ရဲ့ လျှောက်ထားလွှာမှာ ရေးသားထားပါတယ်။

အူတာရက်ဟန်းပြည်နယ်ကို အာဏာရ ဟိန္ဒူအမျိုးသားရေးပါတီ BJP က အုပ်ချုပ်တာဖြစ်ပါတယ်။ ပြည်နယ်အစိုးရကို တရားရုံးချုပ်က ပေးပို့တဲ့ အကြောင်းကြားစာမှာ ဟာရစ်ဒ်ဝါက တရားပွဲကိစ္စအတွက် လာမယ့်တစ်ပတ်ကစပြီး စုံစမ်းစစ်ဆေးမယ်လို့ ဖော်ပြထားပါတယ်။

တရားပွဲက ဗီဒီယိုတွေ အွန်လိုင်းမှာ ပြန့်နှံ့ခဲ့ပြီးတဲ့နောက် နိုင်ငံတစ်ဝှမ်း ဝေဖန်မှုတွေ မြင့်တက်လာတာ ဖြစ်ပါတယ်။ ဟိန္ဒူဘုန်းကြီးတွေဟာ မွတ်စလင်တွေအပေါ် အမုန်းစကားတွေနဲ့ တိုက်ခိုက်ခဲ့သလို၊ မြန်မာစစ်တပ်ကို နမူနာယူကာ လူမျိုးတုန်းသတ်ဖြတ်ဖို့အတွက် အစိုးရ၊ ရဲနဲ့ စစ်တပ်တို့ကို တိုက်တွန်းဆော်ဩခဲ့ကြပါတယ်။

“ကျုပ်တို့ထဲက လူရာချီလောက် စစ်သားတွေဖြစ်လာပြီဆိုရင် မွတ်စလင် ၂ သန်းလောက်ကို အသာလေးသတ်လို့ရတယ်။ ကျုပ်တို့ အောင်ပွဲရမှာပါ။ ဒီလိုစိတ်ဓာတ်မျိုးမွေးပြီး ရပ်တည်မှသာ ဟိန္ဒူအယူဝါဒကို ကာကွယ်နိုင်မှာ ဖြစ်ပါတယ် ” လို့ ဟောပြောသောတစ်ဦးက ပြောပါတယ်။

ဝေဖန်မှုတွေ မြင့်တက်လာပြီးနောက် ရဲတပ်ဖွဲ့က အမုန်းစကားပြောဆိုမှုနဲ့ပတ်သက်ပြီး စုံစမ်းစစ်​ဆေးမှုတွေ လုပ်ဆောင်နေတယ်လို့ ထုတ်ပြန်ထားပေမယ့် ဖမ်းဆီးတာမျိုး မရှိသေးပါဘူး။

၂၀၁၄ ခုနှစ်မှာ BJP ပါတီ အာဏာရပြီးတဲ့နောက်ပိုင်း အိန္ဒိယက မွတ်စလင်တွေ၊ ခရစ်ယာန်တွေနဲ့ ဒါလစ်ဇာတ်နိမ့်တွေဟာ ဟိန္ဒူလက်ယာစွန်းရောက်တွေရဲ့ တိုက်ခိုက်မှုကို ပိုမိုခံစားလာရတာ ဖြစ်ပါတယ်။

Ref: Aljazeera