စစ်ကောင်စီနိုင်ငံခြားရေး၀န်ကြီး အာဆီယံအစည်းအ၀ေး တက်ခွင့်မရ

ဖေဖော်၀ါရီ ၃၊ ၂၀၂၂
M-Media

-အခုလ အလယ်ပိုင်းမှာလုပ်မယ့် အာဆီယံ နိုင်ငံခြားရေး၀န်ကြီးများအစည်းအ၀ေးပွဲမှာ မြန်မာအာဏာသိမ်း စစ်ကောင်စီခန့် နိုင်ငံခြားရေး၀န်ကြီး ဦး၀ဏ္ဏမောင်လွင်ကို တက်ရောက်ခွင့်ပေးမှာမဟုတ်ဘူးလို့ ကမ္ဘောဒီးယားနိုင်ငံက ဒီကနေ့ ထုတ်ပြန်ပါတယ်။

ကမ္ဘောဒီးယားဟာ ၂၀၂၂ ခုနှစ် အာဆီယံဥက္ကအဖြစ် တာ၀န်ယူထားတာပါ။ အာဆီယံနိုင်ငံခြားရေး၀န်ကြီးများအစည်း၀ေးကို အရင်က ဇန်န၀ါရီနှောင်းပိုင်းမှာ ကျင်းပဖို့ စီစဥ်ထားတာ ဖြစ်ပါတယ်။

ကမ္ဘောဒီယား၀န်ကြီးချုပ် ဟွန်ဆန်ရဲ့ ဇန်န၀ါရီ အစောပိုင်း မြန်မာနိုင်ငံခရီးစဥ်နဲ့ အဲဒီခရီးစဥ်မှာ ဦး၀ဏ္ဏမောင်လွင်ကို အစည်းအ၀ေးတက်ဖို့ ဖိတ်ကြားမှုကို ကန့်ကွက်တဲ့အနေနဲ့ အဖွဲ့၀င်နိုင်ငံတွေက အစည်းအ၀ေးတက်ဖို့ ငြင်းခဲ့ပြီး အစည်းအ၀ေးကိုလည်း ရွှေ့ဆိုင်းလိုက်ရပါတယ်။

ဖေဖော်၀ါရီ ၁၆၊ ၁၇ မှာ ကျင်းပဖို့ ပြန်လည်စီစဥ်လိုက်တဲ့ အာဆီယံ နိုင်ငံခြားရေး၀န်ကြီးများ အစည်းအ၀ေးမှာတော့ ကမ္ဘောဒီယားက စစ်ကောင်စီနိုင်ငံခြားရေး၀န်းကြီးကို တက်ခွင့်မပေးတော့ပါဘူး။

ပြီးခဲ့တဲ့နှစ်က ရရှိခဲ့တဲ့ အာဆီယံ သဘောတူညီချက် ၅ ချက်ကို စစ်ကောင်စီဖက်က အကောင်အထည်ဖော်မှု မရှိသေးတဲ့အတွက် ဖိတ်ကြားမှုမလုပ်တာလို့ ကမ္ဘောဒီယား နိုင်ငံခြားရေး၀န်ကြီးဌာန ပြောရေးဆိုခွင့်ရှိသူ ချမ်ဆွန်နရီက ပြောပါတယ်။

“အာဆီယံ သဘောတူညီချက် ၅ ချက်ကို အကောင်အထည်ဖော်ရာမှာ တိုးတက်မှု မရှိတဲ့အတွက် လာမယ့် နိုင်ငံခြားရေး၀န်ကြီးများအစည်းအ၀ေးမှာ စစ်ကောင်စီနိုင်ငံခြားရေး၀န်ကြီးကို ဖိတ်ကြားဖို့ အဖွဲ့၀င်နိုင်ငံတွေကြားထဲမှာ သဘောတူညီမှု မရခဲ့ပါဘူး”

စစ်ကောင်စီက နိုင်ငံရေးဖက်ကမဟုတ်တဲ့ ကိုယ်စားလှယ်တစ်ဦးကိုသာ ဖိတ်ကြားသွားမယ်လို့လည်း ဆွန်နရီက ထည့်သွင်းပြောကြားခဲ့ပါတယ်။

အာဆီယံ သဘောတူညီချက် ၅ ချက်မှာ အကြမ်းဖက်မှု ရပ်တန့်ရေး၊ ဖမ်းဆီးထားသူတွေကို ပြန်လွှတ်ရေး၊ အာဆီယံ အထူးကိုယ်စားလှယ် မြန်မာနိုင်ငံလာရောက်ကာ နိုင်ငံရေး နယ်ပယ်က သက်ဆိုင်သူအားလုံးနဲ့ တွေ့ဆုံဆွေးနွေးခွင့်ပေးရေး စတာတွေ ပါ၀င်ပါတယ်။

စစ်ကောင်စီဖက်က ဒီသဘောတူညီချက်တွေကို အကောင်အထည်ဖော်ခြင်း မရှိတဲ့အတွက် ပြီးခဲ့တဲ့နှစ်က အာဆီယံ ထိပ်သီးအစည်းအ၀ေး အနည်းဆုံး ၃ ခုမှာ အာဆီယံက မြန်မာစစ်ခေါင်းဆောင်ကို ဖိတ်ကြားခြင်း မရှိပါဘူး။

Ref : Reuters