အာဏာသိမ်းမှုဆန့်ကျင်သူများ၏ အချက်အလက်များကို တယ်လီနောက စစ်တပ်ကို ပေးခဲ့

ဖေဖော်ဝါရီ ၁၆၊ ၂၀၂၂
M-Media

-အာဏာသိမ်းမှုကို ဆန့်ကျင်တဲ့သူတွေရဲ့ ဖုန်းခေါ်ဆိုမှုမှတ်တမ်းနဲ့ နောက်ဆုံး တည်နေရာတွေကို စစ်ကောင်စီက တယ်လီနောထံကနေ တောင်းယူခဲ့ပြီး တယ်လီနောကလည်း ပေးအပ်ခဲ့တယ်လို့ မနေ့က ရိုက်တာသတင်းတစ်ပုဒ်မှာ ဖော်ပြထားပါတယ်။

အမည်မဖော်လိုတဲ့ တယ်လီနောဝန်ထမ်း နှစ်ဦးရဲ့ ပြောကြားမှုကို ကိုးကားပြီး ဖော်ပြခဲ့တာပါ။ တယ်လီနောရဲ့ ပြောရေးဆိုခွင့်ရှိသူက ဝန်ထမ်းတွေရဲ့ လုံခြုံရေး စိုးရိမ်ရတဲ့အတွက် စစ်တပ်က ဘာတွေညွှန်ကြားခဲ့သလဲဆိုတာ ထုတ်ဖော်ပြောဆိုလို့မရဘူးလို့ ရိုက်တာရဲ့ မေးမြန်းမှုကို ပြန်လည်ဖြေကြားခဲ့ပါတယ်။

မြန်မာနိုင်ငံကနေ ထွက်ခွာတော့မယ့် တယ်လီနောအနေနဲ့ အသုံးပြုသူတွေရဲ့ အချက်အလက် လုံခြုံရေး ဘယ်လိုဆောင်ရွက်မလဲဆိုတဲ့ မေးခွန်းတွေလည်း ကျယ်ကျယ်ပြန့်ပြန့် ထွက်ပေါ်နေပါတယ်။

မြန်မာနိုင်ငံက တယ်လီဖုန်းဆက်သွယ်ရေးလုပ်ငန်းကို လက်ဘနွန်အခြေစိုက် ကုမ္ပဏီ M1 ထံ ရောင်းချဖို့ တယ်လီနောက စီစဉ်ခဲ့ပေမယ့် စစ်တပ်က သူတိုနဲ့နီးစပ်တဲ့ ပြည်တွင်းက ရွှေဗျိုင်းဖြူကုမ္ပဏီနဲ့ ပူးပေါင်းဝယ်ယူဖို့ ဖိအားပေးခဲ့ပါတယ်။

ဒီလက်လွှဲမှုဟာ မကြာခင်အပြီးသတ်ဖို့ရှိနေပြီး ရွှေဗျိုင်းဖြူကုမ္ပဏီက တယ်လီနောမြန်မာ ဆက်သွယ်ရေးလုပ်ငန်းကို ၈၀ ရာခိုင်နှုန်း ပိုင်ဆိုင်မှာ ဖြစ်ပါတယ်။

Ref: Reuters