ဆော်ဒီအာရေဗျကို အလုပ်သမားစေလွှတ်ရန် ထိုင်း ပြင်ဆင်

မတ် ၁၊ ၂၀၂၂
M-Media

-နှစ်ပေါင်း ၃၀ ကျော်အတွင်း ပထမဆုံးအကြိမ် အဖြစ် ဆော်ဒီအာရေဗျကို အလုပ်သမားတွေစေလွှတ်ဖို့ ထိုင်းနိုင်ငံက ပြင်ဆင်နေပါတယ်။

အလုပ်သမားစေလွှတ်နိုင်ရေး ဥပဒေမူကြမ်းနှစ်ခုကို ထိုင်းအစိုးရအဖွဲ့က အဂ်ါနေ့မှာ အတည်ပြုခဲ့ပြီး အဲဒီအထဲမှာ ဆော်ဒီအာရေဗျဖက်က အလုပ်သမားနဲ့ အလုပ်ရှင်တို့ရဲ့ အခွင့်အရေးကို ကာကွယ်ပေးရေး ပါ၀င်တယ်လို အစိုးရပြောရေးဆိုခွင့်ရှိသူ Thanakorn Wangboonkongchana က ပြောပါတယ်။

“ဒါဟာ ထိုင်း-ဆော်ဒီ စီးပွားရေးဆက်ဆံမှု အားကောင်းစေရေး၊ အရှေ့အလယ်ပိုင်းမှာ ထိုင်းအလုပ်သမားစျေးကွက် ချဲ့ထွင်နိုင်ရေး ခေတ်သစ်တစ်ခု ဖြစ်လာမှာပါ”

ဇန်န၀ါရီလ ထိုင်း၀န်ကြီးချုပ် ပရာယွတ်ချန်အိုချာ ဆော်ဒီအာရေဗျနိုင်ငံကို သွားရောက်မှုအတွင်း နှစ်နိုင်ငံ သံတမန်ဆက်ဆံရေးနဲ့ ကုန်သွယ်ရေး ပြန်လည်တည်ဆောက်ဖို့ ဆွေးနွေးခဲ့ကြပါတယ်။

၁၉၈၉ ခုနှစ်မှာ ထိုင်းသန့်ရှင်းရေး၀န်ထမ်းတစ်ဦးက ဆော်ဒီတော်၀င်မင်းသားတစ်ဦး နေအိမ်က ဒေါ်လာ သန်း ၂၀ တန်ဖိုးရှိတဲ့ စိန်ရွှေလက်၀တ်ရတနာတွေ ခိုးယူမှု ဖြစ်ပွားခဲ့ပြီးတဲ့နောက် နှစ်နိုင်ငံ တင်းမာမှုတွေဖြစ်ကာ ဆက်ဆံရေး ပြတ်တောက်သွားတာ ဖြစ်ပါတယ်။

အဲဒီကိစ္စနောက်ဆက်တွဲ ထိုင်းနိုင်ငံမှာ ဆော်ဒီသံတမန် ၃ ဦး တစ်ညတည်း သီးခြားစီ လုပ်ကြံခံလိုက်ရပြီး၊ ပျောက်ဆုံးသွားတဲ့ လက်၀တ်ရတနာ တော်တော်များများကိုလည်း ပြန်မရခဲ့ပါဘူး။ ဒီကိစ္စမှာ ထိုင်းရဲတပ်ဖွဲ့က ထိပ်တန်းရဲချုပ်တွေ ပါ၀င်နေတယ်လို့လည်း သတင်းတွေ ထွက်ခဲ့ပါတယ်။

ဆက်ဆံရေးပြတ်တောက်မှုကြောင့် ထိုင်းနဲ့ ဆော်ဒီအာရေဗျ နှစ်နိုင်ငံစလုံးဟာ ကုန်သွယ်ရေးနဲ့ ခရီးသွားလာရေးလုပ်ငန်းမှာ ကန်ဒေါ်လာ ဘီလီယံချီ ဆုံးရှုံးခဲ့ပါတယ်။

Ref: CNA