ကာတာကို အဓိကမဟာမိတ်နိုင်ငံအဖြစ် အမေရိကန်က သတ်မှတ်ပြီး ဆက်ဆံရေး တစ်ဆင့်မြှင့်

မတ် ၁၁၊ ၂၀၂၂

M-Media 

-ပင်လယ်ကွေ့နိုင်ငံတစ်ခုဖြစ်တဲ့ ကာတာကို နေတိုးအဖွဲ့၀င်မဟုတ်တဲ့ အဓိက မဟာမိတ်နိုင်ငံအဖြစ် အမေရိကန်က သတ်မှတ်လိုက်ပါတယ်။ 

နှစ်နိုင်ငံဆက်ဆံရေးကို တစ်ဆင့်မြှင့်လိုက်တာဖြစ်ပြီး အခုသတ်မှတ်ချက်ကြောင့် ကာတာဟာ အမေရိကန်ထံကနေ စီးပွားရေးနဲ့ စစ်ရေးမှာ အထူးအခွင့်အရေးတွေ ရရှိမှာ ဖြစ်ပါတယ်။ 

ဇန်န၀ါရီလက ကာတာခေါင်းဆောင် ရှိခ် သာမင် ဘင် ဟာမဒ် အလ်သာနီကို အိမ်ဖြူတော်မှာ တွေ့ဆုံမှုအတွင်း အမေရိကန်သမ္မတ ဂျိုးဘိုင်ဒန်က အဓိကမဟာမိတ်အဖြစ် သတ်မှတ်သွားမယ်လို့ ကတိပြုခဲ့ပြီး ကြာသာပတေးနေ့မှာတော့ အိမ်ဖြူတော်က တရား၀င် ကြေငြာချက် ထုတ်ပြန်ခဲ့တာ ဖြစ်ပါတယ်။ 

ကာတာကို နေတိုးအဖွဲ့၀င်မဟုတ်တဲ့ အဓိကမဟာမိတ်အဖြစ် သတ်မှတ်တာဟာ နှစ်နိုင်ငံဆက်ဆံရေးရဲ့ အရေးပါမှုကို မီးမောင်းထိုးပြလိုက်တာလို့ သမ္မတ ဂျိုးဘိုင်ဒန်က ပြောပါတယ်။ 

အရှေ့အလယ်ပိုင်းက ပင်လယ်ကွေ့ဒေသမှာ နေတိုးအဖွဲ့၀င်မဟုတ်တဲ့ အဓိက မဟာမိတ်နိုင်ငံအဖြစ် အမေရိကန်က သတ်မှတ်ထားတဲ့နိုင်ငံဟာ ၃ နိုင်ငံ ရှိလာပြီး ကူ၀ိတ်၊ ဘာရိန်းနဲ့ ကာတာနိုင်ငံတို့ ဖြစ်ပါတယ်။ 

အမေရိကန်နဲ့ ကာတာတို့ဟာ အရင်ကတည်းက နီးကပ်တဲ့ ဆက်ဆံရေး ရှိခဲ့ပြီး ဒေသတွင်းက ကိစ္စတော်တော်များများမှာ ပူးပေါင်းဆောင်ရွက်နေတာ ဖြစ်ပါတယ်။

Ref: Aljazeera