လူကုန်ကူးဂိုဏ်းတစ်ခုကို ထိုင်းရဲတပ်ဖွဲ့ဖမ်းဆီး

ဇွန် ၂၆၊ ၂၀၂၂

M-Media 

-မြန်မာနိုင်ငံက လူတွေကို တရားမ၀င် ခေါ်လာတဲ့ လူကုန်ကူးဂိုဏ်းကို ဖမ်းဆီးလိုက်တယ်လို့ ဘန်ကောက်ပို့စ် သတင်းဌာနက ဖော်ပြပါတယ်။ 

ကချန်နာဘူရီပြည်နယ် ဆန်ခလာ ဘူရီခရိုင်က အိမ်တစ်အိမ်မှာ တရားမ၀င် ၀င်ရောက်လာတဲ့ မြန်မာနိုင်ငံသား ၁၉ ဦးနဲ့ ထိုင်းနိုင်ငံသား ၆ ဦးကို ရဲတွေက မနေ့မှာ ၀င်ရောက်ဖမ်းဆီးခဲ့တာ ဖြစ်ပါတယ်။ 

ထိုင်းနိုင်ငံသားတွေက  သူတို့ဟာ လူပွဲစားတွေဖြစ်ပြီး၊ မြန်မာနိုင်ငံက လူတွေကို အလုပ်ရအောင် လုပ်ပေးမယ်လို့ပြောကာ ခေါ်ဆောင်လာတာဖြစ်ကြောင်း ထွက်ဆိုခဲ့တယ်လို့ ရဲတပ်ဖွဲ့က ပြောပါတယ်။ 

ဖမ်းဆီးခံလိုက်ရတဲ့ မြန်မာနိုင်ငံသားတွေဟာ နိုင်ငံတစ်၀ှမ်းကဖြစ်ပြီး စားရေးသောက်ရေး ခက်ခဲတဲ့အတွက် ထိုင်းနိုင်ငံမှာ အလုပ်ရဖို့ ထွက်လာတာြဖစ်ကြောင်း၊ တစ်ဦးကို ဘတ် ၃၂၀၀၀ ဆီပေးခဲ့ရကြောင်း ထွက်ဆိုခဲ့ပါတယ်။ 

သူတို့ဟာ ဘုရားသုံးဆူနယ်စပ်ကနေ ဖြတ်လာခဲ့ပြီး ပွဲစားတွေ နောက်ထပ်လာခေါ်မယ့်ကားကို စောင့်ဆိုင်းနေတဲ့အချိန် ဖမ်းဆီးခံလိုက်ရတာပါ။  

ထိုင်းရဲတပ်ဖွဲ့ဟာ လူကုန်ကူးဂိုဏ်းနဲ့အတူ ဘတ် ၅၃၆၆၀၊ မော်တော်ဆိုင်ကယ်တစ်စီးနဲ့၊ မိုဘိုင်းဖုန်း ၅ လုံးကိုလည်း သိမ်းဆည်းရမိခဲ့ပါတယ်။ 

၂၀၂၁ ခုနှစ် ဖေဖော်၀ါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း မြန်မာနိုင်ငံကနေ ထိုင်းနိုင်ငံထဲ ၀င်ရောက်အလုပ်ရှာသူတွေ မြင့်တက်လာပြီး ထိုင်းအာဏာပိုင်တွေကလည်း နယ်စပ်မှာ ကင်းလှည့်ရှာဖွေမှုတွေ တိုးမြှင့် လုပ်ဆောင်နေပါတယ်။ 

Ref: Bangkok Post