လကို တရုတ်က စစ်ရေးနယ်ချဲ့တော့မလား

ဇူလိုင် ၄၊ ၂၀၂၂
M-Media

-လပေါ်ကို တရုတ်က စစ်ရေးနယ်ချဲ့တော့မယ်ဆိုတဲ့ အမေရိကန်ရဲ့ စကားဟာ တာ၀န်မဲ့စကားသာဖြစ်တယ်လို့ တရုတ်က ပြန်လည်တုန့်ပြန်လိုက်ပါတယ်။

အမေရိကန် အာကာသအေဂျင်စီ ‘နာဆာ’ ရဲ့ အကြီးအကဲ ဘီလ်နဲလ်ဆင်က တရုတ်ရဲ့ အာကာသစီမံကိန်းအပေါ် စိုးရိမ်တဲ့အကြောင်း ဂျာမန်သတင်းစာ Blid နဲ့ ပြီးခဲ့တဲ့တစ်ပတ် အင်တာဗျူးမှာ ပြောခဲ့တာပါ။

“တရုတ်က လပေါ်ကိုလူလွှတ်ပြီး ‘ဒါငါတို့ပိုင်နက်။ မင်တို့အားလုံး အနားမကပ်နဲ့’ လို့ ပြောလာမှာကို ကျွန်တော်တို့ အလွန်အမင်း စိုးရိမ်မိပါတယ်”

တရုတ်ဟာ အခြားနိုင်ငံတွေက နည်းပညာတွေနဲ့ အတွေးအခေါ်တွေကို ခိုးယူပြီး လုပ်ဆောင်နေတဲ့ အာကာသစီမံကိန်းဟာ စစ်ရေး ရည်မှန်းချက်အတွက် ဖြစ်တယ်လို့လည်း နဲလ်ဆင်က ထည့်သွင်း ပြောဆိုခဲ့ပါတယ်။

တရုတ်ဟာ ပြီးခဲ့တဲ့ ၁၀ စုနှစ်အတွင်း အာကာသစီမံကိန်းကို ပိုမိုအရှိန်မြှင့် လုပ်ဆောင်လာတာပါ။ ၂၀၁၃ ခုနှစ်မှာ လူမပါတဲ့ အာကာသယာဥ် လပေါ်ကို ဆင်းသက်နိုင်ခဲ့သလို၊ အခု ၁၀ စုနှစ်ကုန်ပိုင်းမှာ လပေါ်ကို လူလွှတ်နိုင်ဖို့ ကြိုးပမ်းနေပါတယ်။

တရုတ်နိုင်ငံခြားရေး၀န်ကြီးဌာန ပြောရေးဆိုခွင့်ရှိသူ ကျောက်လီကျန်းက နာဆာအကြီးအကဲဟာ တရုတ်နဲ့ပတ်သက်လာရင် အချက်အလက်တွေကို လစ်လျူရှုပြီး တာ၀န်မဲ့ပြောဆိုတာ တစ်ကြိမ်မကတော့ဘူးလို့ ဒီကနေ့မှာ ပြန်လည် တုန့်ပြန် ပြောဆိုခဲ့ပါတယ်။

အာကာသကို လူသားအားလုံး မျှ၀ေသုံးစွဲနိုင်ရေးကိုသာ တရုတ်က အမြဲတမ်း တိုက်တွန်းဆော်သြပြီး၊ စစ်ရေးနယ်ချဲ့တာ၊ အာကာသမှာ လက်နက်အားစမ်းတာတွေကို ဆန့်ကျင်တယ်လို့လည်း ကျောက်လီကျန်းက ထည့်သွင်းပြောကြားခဲ့ပါတယ်။

နာဆာဟာ ၂၀၂၄ မှာ လပတ်လမ်းပေါ် လူလွှတ်ပြီး ၂၀၂၅ ကျရင် လရဲ့ တောင်၀င်ရိုးစွန်းမှာ လူဆင်းသက်နိုင်ဖို့ စီမံကိန်းချမှတ်ထားပါတယ်။

တရုတ်ကလည်း ၂၀၃၀ မတိုင်ခင် လရဲ့ တောင်၀န်ရိုးစွန်းကို လူမပါတဲ့ အာကာသယာဥ်လွှတ်ဖို့ ဆောင်ရွက်နေပါတယ်။

Ref: Reuters