မြန်မာ့အရေး ဖြေရှင်းရာတွင် အစည်းအ၀ေးများနှင့် အချိန်မကုန်သင့်ဟု အာဆီယံကို မလေးရှားပြော

သြဂုတ် ၂၄၊ ၂၀၂၂
M-Media

-မြန်မာ့အရေးနဲ့ပတ်သက်တဲ့ ပြဿနာတွေကို ဖြေရှင်းရာမှာ အာဆီယံဟာ အစည်းအ၀ေးတွေနဲ့ အချိန်ကုန်တာထက် ပိုမို ထိထိရောက်ရောက် မြန်မြန်ဆန်ဆန် ဖြေရှင်းသင့်တယ်လို့ မလေးရှား နိုင်ငံခြားရေး၀န်ကြီး ဆိုက်ဖူဒင် အဘ်ဒူလာက ပြောကြားလိုက်ပါတယ်။

မြန်မာပြည်သူတွေရဲ့ အခြေအနေတွေဟာ တစ်ဖြည်းဖြည်းနဲ့ ဆိုးရွားလာတာကို သူက ထောက်ပြပါတယ်။ တိုက်ခိုက်မှုတွေ၊ အသတ်ခံရမှုတွေ၊ ဖမ်းဆီးခံရမှုတွေ၊ အိုးအိမ်စွန့်ခွာ ထွက်ပြေးရမှု စတဲ့ အချက်အလက်တွေကို အာဆီယံ အစည်းအ၀ေးတွေမှာ တင်ပြပြောဆိုမှု မရှိတာကို ဆိုက်ဖူဒင်က ၀ေဖန်ပါတယ်။

“မြန်မာနိုင်ငံက တကယ့်အခြေအနေမှန်တွေကို သုံးသပ်ဆွေးနွေးရေး နိုင်ငံခြားရေး၀န်ကြီးအနေနဲ့ အာဆီယံအတွင်းရေးမှူးကို ကျွန်တော် စာရေးတင်ပြသွားမှာပါ။ လက်တွေ့ ဘာတွေဖြစ်နေလဲဆိုတာ အချက်အလက်အတိအကျနဲ့တကွ သိသင့်ပါတယ်”

မြန်မာ့အရေး ဖြေရှင်းရာမှာ အာဆီယံအနေနဲ့ အစည်းအ၀ေးပဲ လုပ်နေတာကို ရပ်တန့်သင့်ပြီး လိုအပ်မှသာ နည်ပညာအသုံးပြု လုပ်ဆောင်လို့ရတယ်လို့လည်း ဆိုက်ဖူဒင်က ပြောပါတယ်။

မလေးရှားနိုင်ငံခြားရေး၀န်ကြီးဟာ မြန်မာကိစ္စနဲ့ပတ်သက်ပြီး ပြင်းပြင်းထန်ထန် ၀ေဖန်ပြောဆိုမှုတွေ မကြာခဏ ပြုလုပ်လေ့ရှိသူ ဖြစ်ပါတယ်။

မြန်မာပြည်သူတွေအတွက် အာဆီယံက လူသားချင်း စာနာထောက်ထားမှုဆိုင်ရာ အကူအညီ ပေးအပ်တဲ့ ကိစ္စမှာလည်း အဆင်မပြေဘဲ အခြားနည်းလမ်း ရှာဖွေဖို့ လိုအပ်တယ်လို့ ဆိုက်ဖူဒင်က မနေ့က မီဒီယာနဲ့ တွေ့ဆုံမှုမှာ ထည့်သွင်း ပြောကြားခဲ့ပါတယ်။

အကူအညီပေးရာမှာ ပွင့်လင်းမြင်သာမှုရှိရေးနဲ့ ဘက်မလိုက်ရေးအတွက် နိုင်ငံတကာ အကူအညီပေးရေးအဖွဲ့အစည်းတွေကို မလေးရှားက ပါ၀င်စေချင်တာ ဖြစ်ပါတယ်။

အာဏာသိမ်းစစ်ကောင်စီက ဒါကို လက်မခံဘဲ အကူအညီတွေအားလုံးကို သူတိုထံအပ်ရမယ်လို့ ပြောဆိုထားပါတယ်။

Ref: The Star