တာလီဘန်က အမျိုးသမီးများကို ဖိနှိပ်မှု မွတ်စလင်ကမ္ဘာက ပိုမိုအာရုံစိုက်သင့်ကြောင်း ပါကစ္စတန်နိုင်ငံခြားရေး၀န်ကြီးပြော

စက်တင်ဘာ ၂၄၊ ၂၀၂၂
M-Media

-တာလီဘန်လက်အောက် အာဖဂန်အမျိုးသမီးတွေ ဖိနှိပ်ခံရမှု ပြဿနာကို မွတ်စလင်ကမ္ဘာက အလေးထား မဖြေရှင်းတဲ့အတွက် ပါကစ္စတန်နိုင်ငံခြားရေး၀န်ကြီး ဘီလာ၀ါလ် ဘူတို ဇာဒါရီက ၀ေဖန်ပြောကြားလိုက်ပါတယ်။

ပြီးခဲ့တဲ့နှစ် သြဂုတ်လက အာဏာရပြီးနောက်ပိုင်း တာလီဘန်အဖွဲ့ဟာ အာဖဂန်အမျိုးသမီးတွေအပေါ် ကန့်သတ်ဖိနှိပ်မှုတွေ ပိုမိုပြုလုပ်လာခဲ့ပြီး စာသင်ကြားခွင့်ကိုလည်း ပိတ်ပင်ခဲ့ပါတယ်။

နိုင်ငံတကာက အာဖဂန်အမျိုးသမီးတွေအတွက် အသံထွက်ပေးနေပြီး၊ ဒီကိစ္စကို ကမ္ဘာ့မွတ်စလင်လူ့အဖွဲ့အစည်းကလည်း အထူးအလေးထားသင့်တယ်လို့ ပါကစ္စတန်နိုင်ငံခြားရေး၀န်ကြီး ဇာဒါရီက ထောက်ပြခဲ့ပါတယ်။

“အမျိုးသမီးအခွင့်အရေးကို အစ္စလာမ်က ပထမဆုံး ပေးခဲ့တာပါ။ လူ့အဖွဲ့အစည်းမှာ အမျိုးသမီးတွေ ပါ၀င်နိုင်ဖို့နဲ့ အမျိုးသမီးတွေ ပညာသင်ကြားနိုင်ဖို့ အခွင့်အရေးကို အစ္စလာမ်သာသနာက အာမခံပေးထားတာ ဖြစ်ပါတယ်”

အာဖဂန်နစ္စတန်သာမကဘဲ တစ်ကမ္ဘာလုံးမှာ အမျိုးသမီးတွေရဲ့ အခွင့်အရေးကို အာမခံပေးတာထက်ပိုပြီး ကာကွယ်ပေးတာမျိုးကို မျှော်လင့်တယ်လို့ သူကဆိုပါတယ်။

ဇာဒါရီရဲ့ မိခင် ဘီနာဇီ ဘူတိုဟာ ပါကစ္စတန်ရဲ့ ပထမဆုံး၀န်ကြီးချုပ်အဖြစ် တာ၀န်ထမ်းဆောင်ခဲ့သူပါ။

အမျိုးသမီးတွေကို မဖိနှိပ်ဘူးဆိုတဲ့ ကတိက၀တ်ကို တာလီဘန်က စောင့်ထိန်းမလားဆိုတာ နိုင်ငံတကာနဲ့အတူ ပါကစ္စတန်က စောင့်ကြည့်နေတယ်လို့လည်း ဇာဒါရီက ထည့်သွင်းပြောဆိုခဲ့ပါတယ်။

Ref: Arab News