ကဘူးလ်ရှိ အမျိုးသမီး ပုဂ္ဂလိကကောလိပ်တစ်ခု ဗုံးခွဲတိုက်ခိုက်ခံရ

အောက်တိုဘာ ၁၊ ၂၀၂၂
M-Media

-အာဖဂန်နစ္စတန်နိုင်ငံ မြို့တော်ကဘူးလ်က ပုဂ္ဂလိက ကောလိပ်တစ်ခုမှာ မနေ့က အသေခံ ဗုံးခွဲတိုက်ခိုက်မှု ဖြစ်ပွားခဲ့ပြီး အနည်းဆုံး လူ ၁၉ ဦး သေဆုံးခဲ့ပါတယ်။

Kaaj လိုခေါ်တဲ့ အဲဒီကျောင်းဟာ ကဘူးလ်မြို့အနောက်ခြမ်းမှာရှိပြီး ကျောင်းသား ၆၀၀ ကျော်လောက်ရှိပါတယ်။ အများစုက အမျိုးသမီးတွေပါ။ ကျောင်းသားတွေဟာ တက္ကသိုလ်စာမေးပွဲအတွက် စာကျက်နေစဥ် တိုက်ခိုက်ခံခဲ့ရတာ ဖြစ်ပါတယ်။

တိုက်ခိုက်မှုအတွင်း ဒဏ်ရာရသူ ၃၀ လောက်ရှိပါတယ်။ ဘယ်အဖွဲ့ကလုပ်လဲဆိုတာ မသိရသေးပါဘူး။ ဒီကျောင်းမှာ တက်ရောက်သူအများစုဟာ ‘ဟာဇရာ’ လူမျိုးတွေ ဖြစ်ပါတယ်။

ဟာဇရာတွေဟာ အာဖဂန်နစ္စတန်က လူနည်းစုတွေဖြစ်ပြီး IS အကြမ်းဖက်အဖွဲ့ရဲ့ ပစ်မှတ်ထားတိုက်ခိုက်ခြင်းကို အမြဲတမ်းလိုလို ခံနေရသူတွေ ဖြစ်ပါတယ်။

သေဆုံးသူ ၁၉ ဦးရှိတယ်လို့ အစောပိုင်းမှာ ထုတ်ပြန်ထားပေမယ့် အမှန်တကယ်အရေအတွက်ဟာ ဒီထက်ပိုပြီးများမယ်လို့ ဒေသတွင်း မီဒီယာတွေက ဖော်ပြပါတယ်။

အသေခံဗုံးခွဲသမားဟာ ကောလိပ်ရှေ့မှာ စောင့်နေတဲ့ အစောင့်ကို သေနတ်နဲ့ပစ်သတ်ပြီးတဲ့နောက် အထဲ၀င်ပြီး အသေခံဗုံးခွဲခဲ့တာ ဖြစ်ပါတယ်။

အာဖဂန်နစ္စတန်မှာ ပြီးခဲ့တဲ့ လအနည်းငယ်အတွင်း တိုက်ခိုက်မှုတွေ မြင့်တက်လာခဲ့ပြီး တာလီဘန်အစိုးရကတော့ IS အကြမ်းဖက်အဖွဲ့ လက်ချက်လို့ ထုတ်ပြန်ပါတယ်။

Ref: BBC