မလေးရှားမှ နာမည်ကြီး အတိုက်အခံခေါင်းဆောင် ၀န်ကြီးချုပ်တာ၀န်ယူမည်

နို၀င်ဘာ ၂၄၊ ၂၀၂၂
M-Media

-အတိုက်အခံခေါင်းဆောင် အန်၀ါရ် အီဗရာဟင်ဟာ တိုင်းပြည်ရဲ့ ၁၀ ယောက်မြောက် ၀န်ကြီးချုပ်သစ် ဖြစ်လာမယ်လို့ မလေးရှား ဘုရင့်နန်းတော်က ဒီကနေ့မနက်ပိုင်းမှာ သတင်းထုတ်ပြန်ပါတယ်။

အန်၀ါရ်ရဲ့ PH ပါတီဟာ ပြီးခဲ့တဲ့တစ်ပတ် ရွေးကောက်ပွဲမှာ အမတ်နေရာအများဆုံး အနိုင်ရခဲ့ပါတယ်။ ဒါပေမယ့် တစ်ပါတီတည်း အစိုးရဖွဲ့နိုင်ရေး လိုအပ်တဲ့ အမတ်နေရာမရပါဘူး။

ညွန့်ပေါင်းအစိုးရဖွဲ့နိုင်ရေး အနိုင်ရပါတီတွေအကြား ညှိနှိုင်းမှု အဆင်မပြေတဲ့အတွက် ဘုရင်က ကြား၀င်စေ့စပ်ပေးခဲ့ရပြီး ဒီကနေ့မှာ နောက်ဆုံး ဆုံးဖြတ်ချက်ကို ထုတ်ပြန်ခဲ့တာ ဖြစ်ပါတယ်။

အန်၀ါရ် အီဘရာဟင်ဟာ အတိုက်အခံခေါင်းဆောင် ဘ၀နဲ့ နှစ်ပေါင်း ၃၀ လောက် မလေးရှားနိုင်ငံရေးမှာ ကျင်လည်ခဲ့ပြီးတဲ့နောက် ၀န်ကြီးချုပ် ဖြစ်လာတာဖြစ်ပါတယ်။

မလေးရှား ဘုရင့်နန်းတော်ရဲ့ ထုတ်ပြန်ချက်မှာ ပြည်သူတွေအနေနဲ့ တည်တည်ငြိမ်ငြိမ်နဲ့ အစိုးရသစ်ကို ကြိုဆိုဖို့ တိုက်တွန်းထားပါတယ်။

Ref: CNA