အမျိုးသမီးများ တက္ကသိုလ်တက်ရောက်မှုကို တာလီဘန် ပိတ်ပင်

ဒီဇင်ဘာ ၂၁၊ ၂၀၂၂

M-Media

-အမျိုးသမီးတွေ တက္ကသိုလ်တက်ရောက်ကာ ပညာသင်ကြားခွင့်ကို တားမြစ်ပိတ်ပင်လိုက်တယ်လို့ အာဖဂန်နစ္စတန်ကို အုပ်စိုးနေတဲ့ တာလီဘန်အဖွဲ့က ကြေငြာပါတယ်။ 

ဒါဟာ အမျိုးသမီးတွေ ပညာသင်ကြားမှုကို တားမြစ်မှာမဟုတ်ဘူးလို့ မွတ်စလင်ကမ္ဘာ၊ ကုလသမဂ္ဂနဲ့ အနောက်နိုင်ငံတွေအပေါ် ပေးထားတဲ့ကတိက၀တ်ကို တာလီဘန်က ထပ်မံဖောက်ဖျက်လိုက်တာလည်း ဖြစ်ပါတယ်။ 

အခုလို ပိတ်ပင်တဲ့ အမိန့်စာကို နိုင်ငံတစ်၀ှမ်းက တက္ကသိုလ်နဲ့ စာသင်ကျောင်းတွေ အားလုံးကို ပေးပို့ခဲ့တာဖြစ်ပြီး တာလီဘန် ပညာရေးဌာန ပြောရေးဆိုခွင့်ရှိ ဇီယာဟွလ္လာ ဟာရှီမီကလည်း ဒီကိစ္စကို အတည်ပြုပါတယ်။ 

ပြီးခဲ့တဲ့နှစ် သြဂုတ်လ အာဖဂနစ္စတန်ကို သိမ်းပိုက်ပြီးနောက်ပိုင်း တာလီဘန်အဖွဲ့ဟာ အမျိုးသမီတွေကို မူလတန်းနဲ့ တက္ကသိုလ်တက်ခွင့်သာ အကန့်အသတ်နဲ့ ပေးခဲ့ပြီး၊ အလယ်တန်းတက်ရောက်ခွင့်ကို ပိတ်ပင်ခဲ့ပါတယ်။ 

အခုလို တက္ကသိုလ်တက်ခွင့် ပိတ်လိုက်တာကြောင့် အာဖဂန်အမျိုးသမီးတွေရဲ့ ပညာရေးဟာ လုံး၀ မျှော်လင့်ချက် မဲ့သွားပြီဖြစ်ပါတယ်။

တာလီဘန်က ဒီပိတ်ပင်မှုဟာ အမျိုးသားအကျိုးစီးပွားနဲ့ အမျိုးသမီးတွေရဲ့ ဂုဏ်သိက္ခာကို ကာကွယ်ဖို့ လုပ်ဆောင်တာလို့ ပြောဆိုခဲ့ပါတယ်။ 

တာလီဘန်လက်အောက်မှာ အာဖဂန်အမျိုးသမီးတွေဟာ ပညာရေးတင်မကဘဲ အလုပ်လုပ်ခွင့်၊ ခရီးသွားလာခွင့်နဲ့ အခြားအခွင့်အရေးတွေလည်း ပိတ်ပင်ခံထားရပါတယ်။ 

Ref: Aljazeera