အာဏာသိမ်း စစ်ခေါင်းဆောင် မြောင်းထဲရောက်သွားခဲ့သည့် ထိုင်းရွေးကောက်ပွဲ

မေ ၁၅၊ ၂၀၂၃

M-Media 

• 

• 

-မနေ့က ကျင်းပတဲ့ ထိုင်းအထွေထွေရွေးကောက်ပွဲမှာ လူငယ်ပညာတတ် ပီတ လင်မ်ဂျာရိုနရတ် ခေါင်းဆောင်တဲ့ Move Forward ပါတီက အနိုင်ရရှိသွားပါတယ်။ 

ရွေးကောက်ပွဲကော်မရှင်က Move Forward ဟာ စုစုပေါင်း အမတ်နေရာ ၁၅၁ နေရာရရှိကာ အနိုင်ရကြောင်း ဒီကနေ့မှာ ကြေငြာခဲ့ပါတယ်။ 

လက်ရှိ၀န်ကြီးချုပ်ဖြစ်တဲ့ အာဏာသိမ်းစစ်ခေါင်းဆောင်ဟောင်း ပရာယွတ်ရဲ့ United Thai Nation ပါတီက စုစုပေါင်း အမတ်နေရာ ၃၆ နေရာသာ အနိုင်ရရှိပါတယ်။ 

စစ်တပ်ရဲ့ ဖြုတ်ချမှု ခံခဲ့ရတဲ့ ၀န်ကြီးချုပ်ဟောင်း သက်ဆင် ရှင်နာ၀ပ်ထရာရဲ့သမီး ပေထုံတန် ဦးဆောင်တဲ့ Pheu Thai ပါတီက ဒုတိယအများဆုံးအဖြစ် ၁၄၁ နေရာ အနိုင်ရရှိခဲ့ပါတယ်။ 

Move Forward ပါတီခေါင်းဆောင် လင်မ်ဂျာရိုနရတ်က အတိုက်အခံပါတီ ၅ ခုနဲ့ ပါတီအသစ် ၁ ခု စုစုပေါင်း ၆ ပါတီပေါင်းကာ အစိုးရဖွဲ့သွားမယ်လို့ ဒီကနေ့မှာ ထုတ်ပြန်ပြောကြားခဲ့ပါတယ်။ 

၆ ပါတီပေါင်းရင် အမတ်နေရာ ၃၀၉ နေရာ ရရှိမှာဖြစ်ပြီး အစိုးရဖွဲ့ဖို့ လုံလောက်တဲ့ အရေအတွက်ပါ။ ၀န်ကြီးချုပ်အဖြစ် ပီတ လင်မ်ဂျာရိုနရတ်က ဆောင်ရွက်မှာ ဖြစ်ပါတယ်။ 

ပူးပေါင်းမယ့်ပါတီတွေထဲမှာ Pheu Thai ပါတီလည်း ပါ၀င်ပြီး၊ ပေထုံတန်ကို ဂုဏ်ပြုကြောင်း လင်မ်ဂျရိုနရတ်က ပြောကြားခဲ့ပါတယ်။ 

စစ်တပ်ကို လွှတ်တော်နဲ့ နိုင်ငံရေးကနေ ဖယ်ရှားရေး၊ တော်၀င်မိသားစုနဲ့ပတ်သက်တဲ့ ဥပဒေတွေ ပြန်လည်သုံးသပ်ရေး အပါအ၀င် ပြုပြင်ပြောင်းလဲမှုတွေ ပြုလုပ်သွားမယ်လို့ Move Forward ပါတီက ကြေငြာထားပါတယ်။ 

ညွန့်ပေါင်းအစိုးရဖွဲ့ရေးနဲ့ လင်မ်ဂျာရိုနရတ် ၀န်ကြီးချုပ်ဖြစ်ရေးအတွက် စစ်တပ်ကျောထောက်နောက်ခံပြုထားတဲ့ အထက်လွှတ်တော်ရဲ့ ထောက်ခံမှုက လက်ရှိမှာ အရေးပါနေပါတယ်။ 

ပြည်သူလူထုက အုပ်ချုပ်ခွင့်အာဏာကို မိမိတို့ပါတီလက်ထဲ ထည့်ပေးလိုက်တဲ့အတွက် အထက်လွှတ်တော်ကိစ္စကို မစိုးရိမ်ဘူးလို့ လင်မ်ဂျာရိုနရတ်က မှတ်ချက်ပေးခဲ့ပါတယ်။ 

Ref : Bangkok Post, CNA