ခင်ပွန်းနဲ့သား ကြမ္မာငင်တဲ့နေ့အကြောင်း ပြောပြလာတဲ့ ခရစ္စတင်း ဒါ၀တ်

ဇွန် ၂၆၊ ၂၀၂၃

M-Media 

• 

• 

• 

• 

– တိုက်တန်းနစ်သင်္ဘောပျက်နားကိုသွားရင်း ပျောက်ဆုံးသွားတဲ့ ယူကေလုပ်ငန်းရှင် ရှာဇာဒါ ဒါ၀တ်ရဲ့ ဇနီးသည်က ဒီကိစ္စနဲ့ ပတ်သက်ပြီး အဖြစ်အပျက်တစ်ချို့ကို ဖွင့်ဟလာပါတယ်။ 

ရှာဇာဒါ ဒါ၀တ်၊ သားဖြစ်သူ ဆူလေမန်ဒါ၀တ်နဲ့ အခြား လူ ၃ ဦးဟာ ပြီးခဲ့တဲ့တစ်ပတ်က Titan ဆိုတဲ့ ရေငုပ်သင်္ဘောအသေးနဲ့ တိုက်တန်းနစ်သင်္ဘောပျက်နားကို သွားရောက်ရင်း ပျောက်ဆုံးသွားတာပါ။ 

Rubik’s Cube ကို အရူးအမူးစွဲလန်းတဲ့ သားဖြစ်သူဟာ ဒီခရီးစဥ်မှာ  Rubik’s Cube ကစားပြီး ဂင်းနစ်မှတ်တမ်း ၀င်ချင်ခဲ့တာလို့ ရှာဇာဒါရဲ့ဇနီး ခရစ္စတင်းဒါ၀တ်က ပြောပါတယ်။ 

“ပင်လယ်အောက် မီတာ ၃၇၀၀ က တိုက်တန်းနစ်သင်္ဘောနားမှာ ကျွန်တော် Rubik’s Cube ကစားမယ်လို့  သူပြောခဲ့တာပါ”

ရှဇာဒါကလည်း သူ့သားကစားတာကို ရိုက်ကူးဖို့ ဗီဒီယိုကင်မရာတစ်လုံး ယူဆောင်သွားခဲ့ပါသေးတယ်။ 

ဒါ၀တ်မိသားစုဟာ ပါကစ္စတန်နွယ်ဖွား ယူကေနိုင်ငံသားတွေဖြစ်ပြီး ထင်ရှားတဲ့ စီးပွားရေးလုပ်ငန်းရှင်တွေလည်း ဖြစ်ပါတယ်။ 

တိုက်တန်းနစ်သင်္ဘောပျက်ဆီ သွားရောက်ဖို့အတွက် ကိုဗစ်မဖြစ်ခင်ကတည်းက စီစဥ်ခဲ့တာဖြစ်ပြီး မူလက သူတို့ ဇနီးမောင်နှံနှစ်ဦး သွားဖို့ စီစဥ်ထားတာလို့လည်း ခရစ္စတင်းက ပြောပါတယ်။

ကိုဗစ်ကြောင့် ခရီးစဥ်ကို ရပ်ဆိုင်းခဲ့ရပြီး အခုတစ်ခေါက်မှာ သူ့သားကို အရင်လိုက်ခိုင်းခဲ့တာပါ။ 

“သားက အရမ်းသွားချင်နေတာကြောင့် ကျွန်မသူ့ကို နေရာပေးခဲ့တာပါ” 

ခင်ပွန်းနဲ့ သားဖြစ်သူတို့ ရေအောက်ဆင်းသွားချိန်မှာ ခရစ္စတင်း၊  အသက် ၁၇ နှစ်အရွယ် သမီး အလီနာနဲ့ မိသားစု၀င်တစ်ချို့ဟာ Titan ရေငုပ်သင်္ဘောအတွက် ထောက်ပို့သင်္ဘောငယ် Polar Prince ပေါ်မှာ ရှိနေတာ ဖြစ်ပါတယ်။ 

ခရီးစဥ်မစတင်ခင်မှာ မိသားစုတွေ ပျော်ပျော်ရွှင်ရွှင် ရှိနေခဲ့တာ ဖြစ်ပါတယ်။ 

“သားအဖနှစ်ယောက်စလုံး အရင်ကတည်းက ဒီခရီးကို သွားချင်နေကြတာကြောင့် ကျွန်မ သူတို့အတွက် တော်တော် ပီတိဖြစ်ခဲ့ရတာပါ”

ခင်ပွန်းသည် ရှာဇာဒါဟာ စူးစမ်းလေ့လာရေးမှာ ၀ါသနာထုံသူလို့လည်း ခရစ္စတင်းက ပြောပါတယ်။ 

ရှာဖွေကယ်ဆယ်ရေးလုပ်ငန်း တစ်လျှောက်လုံး ခရစ္စတင်းဟာ Polar Prince သင်္ဘောပေါ်မှာ ရှိနေခဲ့တာ ဖြစ်ပါတယ်။ 

“သတ်မှတ်ချိန် ၉၆ နာရီကို ကျော်သွားတာကြောင့် ကျွန်မရဲ့ မျှော်လင့်ချက်လည်း ပျက်သုဥ်းသွားခဲ့ပါတယ်”

ဒါ၀တ်မိသားစု၀င်တွေဟာ စနေနေ့က အင်္ဂလန်ပြန်သွားခဲ့ပြီး ရှဇာဒါနဲ့ ဆူလေမန်တို့ကို ရည်စူးကာ ၀တ်ပြုဆုတောင်းမှုတွေ လုပ်ခဲ့ကြပါတယ်။ 

ဗလီဆရာက ကွယ်လွန်သူ ၅ ဦးစလုံး ကောင်းရာမွန်ရာ ရောက်ပါစေကြောင်း ဆုမွန်ကောင်းတောင်းတဲ့အချိန်မှာ မျက်ရည်မဆည်နိုင် ဖြစ်ခဲ့ရတယ်လို့ ခရစ္စတင်းက ပြောပါတယ်။ 

ဆူလေမန်ကို ဂုဏ်ပြုတဲ့အနေနဲ့ သူစွဲလန်းတဲ့ Rubik’s Cube ကစားနည်းကို သူနဲ့ သူ့သမီး အလီနာတို့က လေ့လာသင်ယူသွားမယ်လို့လည်း ခရစ္စတင်းက ထည့်သွင်းပြောဆိုခဲ့ပါတယ်။ 

ခင်ပွန်းရဲ့ စီးပွားရေးလုပ်ငန်းတွေကို ဆက်လက်လုပ်ကိုင်သွားဖို့လည်း သူမက စိတ်ပိုင်းဖြတ်ထားပါတယ်။ 

“ကျွန်မယောက်က အလုပ်တော်တော်များများလုပ်တယ်။ လူတွေကိုလည်း တအားကူညီပါတယ်။ ဒီအမွေအနှစ်ကို ကျွန်မ ဆက်လက်ထိန်းသိမ်းသွားချင်တယ်။ သူလုပ်ခဲ့တဲ့အလုပ်တွေ ဆက်လက်တည်တံ့နေတယ်ဆိုတာမျိုး ကျွန်မဖြစ်စေချင်ပါတယ်။ ဒါဟာ သမီးအတွက်လည်း အလွန်အရေးကြီးပါတယ်” 

Titan ရေငုပ်သင်္ဘောနဲ့ပတ်သက်တဲ့ စုံစမ်းစစ်ဆေးမှုအကြောင်းကို ပြောပြဖို့ သူမက ငြင်းဆိုပါတယ်။ 

“ကျွန်မသားနဲ့ ယောင်္ကျားကို လွမ်းတယ်။ ပြောမပြတတ်အောင်ပါပဲ” 

Ref: BBC