ရော်ဒရီဂို (သို့မဟုတ်) ဘောလုံးပါရမီဖြင့် မွေးဖွားလာသူ (၃)

ဇူလိုင် ၂၉၊ ၂၀၂၃
M-Media

ဆန့်တို့စ် လူငယ်နည်းပြ လူစီယာနို၏ မှတ်ချက်

သူက တော်တော်ကောင်းတာဗျ။ ဖူဆယ်မှာဆို နေးမာထက်တောင် ပိုကောင်းတယ်လို့ ထင်တယ်။ လိမ်တာခေါက်တာ၊ ခြေယောင်ပြတာတွေက လက်ဖျားခါလောက်တယ်။ ကျွန်တော်တို့အသင်းဟာ ပေါ်လစ္စတာပြည်နယ် ၁၁ နှစ်အောက် ချန်ပီယံရှစ်ပြိုင်ပွဲမှာ ၃ နှစ်ဆက်တိုက် ဗိုလ်စွဲခဲ့ပါတယ်။

ရော်ဒရီဂို အသက်မြင့်တဲ့ အသင်းကို ရောက်သွားတော့ အသင်းဒါရိုက်တာက ကျွန်တော့်ကိုပါ အတူလိုက်သွားဖို့ပြောတယ်။ သူနဲ့ ၇ နှစ်တာ လက်တွဲခဲ့ရတဲ့ကာလမှာ ကျွန်တော့်သားသမီးအရင်းထက်တောင် သံယောဇဥ်ပိုခဲ့ပါတယ်။

အစပိုင်းမှာ သူက နည်းနည်ဒေါသကြီးတယ်။ ပါရမီမြောက်နေတော့ လူလည်း ခဏခဏ အချခံရတယ်။ တစ်ခြားအသင်းက နည်းပြတွေ၊ အသင်းသားမိဘတွေကလည်း သူ့ကို ဆဲကြဆိုကြ။ သူလည်း ပေါက်ကွဲလာတော့ တစ်ခါတစ်လေ အထုတ်ခံရတဲ့အထိဖြစ်တယ်။ ကောင်းကောင်းမွန်မွန်နဲ့ မကျေနပ်ချက်ကို ဖြေဖျောက်တဲ့ အချိန်တွေလည်း ရှိပါတယ်။ ကျွန်တော် မှတ်မိသေးတယ်။ Cotia အသင်းနဲ့ကစားတဲ့ ယူ ၁၂ ပွဲတစ်ပွဲမှာ ဟိုဘက်ကနည်းပြက သူ့ကို အမျိုးအမျိုး လှောင်ပြောင်တာဗျ။

“မင်းက အဲ့လောက်လည်း မဟုတ်ပါဘူးကွာ။ အိုက်တင်ခံနေတဲ့ကောင်”

“ဒီဘိုးတော်တော့ မြွေပွေးကို သွားစနေပြီ” လို့ ကျွန်တော် ရေရွတ်လိုက်တယ်။

ရော်ဒရီဂိုက သူ့ကွင်းဖက်ခြမ်းအထိ ဘောလုံးဆင်းယူတယ်။ ပြီးတော့ တစ်ယောက်၊ နှစ်ယောက်၊ သုံးယောက်… သူ့ဆီလာလုတဲ့လူတိုင်းကို လိမ်ခေါက်ပြီး ဂိုးသွင်းပြတယ်။ အဲ့ဒီနောက် Cotia အသင်းနည်းပြထိုင်နေတဲ့ ကွင်းဘေးထိုင်ခုံကိုပြေးသွားပြီး ပြန်ပက်တော့တာပဲ။

“ခင်ဗျားကြီး ဘာတွေပြောနေတာလဲ။ ကျွန်တော့်ကို ဘယ်လိုခေါ်လိုက်တာ။ အခုတော့ အဟားခံရပြီမဟုတ်လား”

ကျွန်တော်က ဒီလိုပြောဆိုတာမကောင်းကြောင်း သူ့ကိုနားချတယ်။

“ကျွန်တော့်ကို အဲဒီဘဲက လာစမ်းနေလို့ပါ” လို့ သူက ပြန်ပြောပါတယ်။

ဘရာဇီးလ် ယူ-၁၅

ယူ-၁၅ အသင်းမှာ အရွေးခံရတာကို ဘယ်သူကမှ လာပြောလေ့မရှိဘူး။ ဘောလုံးအဖွဲ့ချုပ်က လူစာရင်းထုတ်ပြန်တယ်။ အဲဒီအထဲမှာ ပါ၊ မပါ ကိုယ့်ဟာကိုယ် ကြည့်ရပါတယ်။ ဆန်းတို့စ်က ကျွန်တော် အရွေးခံရကြောင်း ပြောတယ်။ ဒါပေမယ့် မဟုတ်ဘူး။ မှားတာပါ။

အဲဒီလို ၂ ကြိမ်တောင်ဖြစ်ပါတယ်။

ကျွန်တော်လည်း တင်းတာပေါ့။ စိတ်လည်း ပျက်မိတယ်။ ပထမအကြိမ်က ဇကာတင်စာရင်းမှာ ကျွန်တော်ပါတယ်။ နောက်ဆုံး ၂၃ ယောက်စာရင်းကြတော့ မပါတော့ဘူး။

နောက်တစ်ကြိမ်မှာ ဘောလုံးအဖွဲ့ချုပ်က ကျွန်တော့်အတွက် လေယာဥ်လက်မှတ်တွေ၊ ဟိုတယ်ဘိုကင်တွေ စီစဥ်ပြီးသွားပြီ။ စာရင်းထွက်လာတော့ ကျွန်တော့်နာမည် မပါပြန်ဘူး။

ကျွန်တော် တော်တော်စိုးရိမ်သွားတယ်။ အဖွဲ့ချုပ်ကို ဖုန်းခေါ်တယ်။ အမှားအယွင်းဖြစ်တယ်လို့ သိရတယ်။ ကျွန်တော်က တိုက်စစ်မှူးဖြစ်တော့ နာမည်က နောက်ဆုံးမှထည့်ရမယ်။ အဲ့ဒါကို မထည့်မိဘဲ မေ့သွားတာပါ။

ရက်အနည်းငယ်ကြာတော့ Granja Comary (ဘရာဇီးလ်ဘောလုံးအဖွဲ့ချုပ် ရုံးချုပ်) ကို ကျွန်တော်သွားပြီး ၀တ်စုံတွေသွားယူတယ်။ ခမ်းနားကြီးကျယ်လှပါတယ်။ ၀တ်စုံတွေ၀တ်ပြီး ဆဲလ်ဖီတွေ ရိုက်ကြတယ်။ ကျွန်တော့် Instagram မှာဆို အဲဒီပုံတွေကြီးပဲ။ မိဘတွေကိုတောင် ဓာတ်ပုံတစ်ပုံ ပို့လိုက်သေးတယ်။

Granja Comary ကို မနက် ၄ နာရီထပြီး အကြာကြီး ကားစီရတာ။ ဒါပေမယ့် တန်ပါတယ်။

(ဆက်ရန်—–)

အပိုင်း ၁ ဖတ်ရန် – http://www.m-mediagroup.com/news/91408

အပိုင်း ၂ ဖတ်ရန် – http://www.m-mediagroup.com/news/91405