ဆေးရုံဆေးခန်းနှင့် ကျန်းမာရေး၀န်ထမ်းများအပေါ် အစ္စရေးက တိုက်ခိုက်မှုကို WHO က စာရင်းပြုစုထား

အောက်တိုဘာ ၃၁၊ ၂၀၂၃

M-Media 

-ဟားမက်စ်ကို တုန့်ပြန်တယ်ဆိုတဲ့ ခေါင်းစဥ်နဲ့ အစ္စရေးက ပါလက်စတိုင်းပိုင်နက်တွေကို အောက်တိုဘာ ၇ ရက်နေ့ကစတင်ပြီး တိုက်ခိုက်ရာမှာ ကျန်းမာရေးဆိုင်ရာ ပစ်မှတ် အများအပြားကို ဖျက်ဆီးခဲ့ပါတယ်။ 

ကမ္ဘာ့ကျန်းမာရေးအဖွဲ့ (WHO) က အစ္စရေးရဲ့ ဒီစစ်ရာဇ၀တ်မှုတွေကို စာရင်းပြုစုထားပြီး အောက်တိုဘာ ၃၀ ရက်နေ့မှာ ထုတ်ပြန်ခဲ့ပါတယ်။ 

အနောက်ဖက်ကမ်း

ပါလက်စတိုင်းပိုင်နက် အနောက်ဖက်ကမ်းမှာ အစ္စရေးတပ်ဖွဲ့တွေဟာ လူနာတင်ကားတွေကို ပစ်မှတ်ထားတိုက်ခိုက်မှု ၉၉ ကြိမ်ရှိခဲ့ပြီး၊ ကျန်းမာရေးဆိုင်ရာ အကူအညီပေးရေးလုပ်ငန်းကို နှောက်ယှက်တိုက်ခိုက်မှု ၆၇ ကြိမ် လုပ်ဆောင်ခဲ့တယ်လို့ WHO က ပြောပါတယ်။ 

အစ္စရေးဟာ ကျန်းမာရေး၀န်ထမ်းတွေကို ပစ်မှတ်ထားတဲ့ အကြမ်းဖက်တိုက်ခိုက်မှု ၆၁ ခု၊ ကျန်းမာရေး၀န်ထမ်းနဲ့ လူနာတင်ကား ဖမ်းဆီးမှု ၁၉ ခု၊ ဆေးရုံဆေးခန်းတွေမှာ လက်နက်ကိုင်ကာ အတင်း၀င်ရောက်ရှာဖွေမှု ၁၂ ခု ကျူးလွန်ခဲ့ပါတယ်။ 

ဂါဇာကမ်းမြှောင်

ဂါဇာကမ်းမြှောင်မှာတော့ အောက်တိုဘာ ၇ ရက်နေ့ကစတင်ပြီး ကျန်းမာရေး၀န်ထမ်း ၁၂၄ ဦးကို အစ္စရေးက သတ်ဖြတ်ခဲ့ပါတယ်။

အစ္စရေးရဲ့ တိုက်ခိုက်မှုကြောင့် ဒဏ်ရာရတဲ့ ကျန်းမာရေး၀န်ထမ်း ၁၀၀ ကျော်ရှိပြီး၊ လူနာတင်ကား ၅၀ ပစ်မှတ်ထား တိုက်ခိုက်ခံခဲ့ရပါတယ်။ အဲဒီအထဲက ၂၅ စီးဟာ လုံး၀ပျက်ဆီးသွားပါတယ်။ 

ဂါဇာမှာ ဆေးရုံ ၃၅ ရုံရှိပြီး အစ္စရေးရဲ့ ဗုံးကြဲမှုတွေ၊ ဖြတ်လေးဖြတ် ပိတ်ပင်ရေးစနစ်တွေကြောင့် ၁၂ ခုကို ပိတ်ထားလိုက်ရပြီဖြစ်ပါတယ်။ ဆေးခန်း ၇၂ ခုမှာလည်း ၄၆ ခုက အစ္စရေးရဲ့ ပစ်မှတ်ထား တိုက်ခိုက်မှုတွေကြောင့် ပိတ်ထားလိုက်ရပါတယ်။ 

အစ္စရေးဟာ ဆေးရုံတွေကို ပစ်မှတ်ထားတိုက်ခိုက်မှု ဆက်လက်လုပ်ဆောင်နေပြီး အောက်တိုဘာ ၃၀ နေ့က ဂါဇာစီးတီးမှာရှိတဲ့ တူရကီ-ပါလက်စတိုင်း ချစ်ကြည်ရေး ဆေးရုံကို ဒုံးကျည်နဲ့ ပစ်ခဲ့ပါတယ်။