ဂါဇာက အစ္စရေးရဲ့ လူသတ်ပွဲကို ပြတ်ပြတ်သားသား ဆန့်ကျင်နေကြတဲ့ တောင်အမေရိက နိုင်ငံများ

နို၀င်ဘာ ၁၊ ၂၀၂၃

M-Media 

• 

• 

• 

-ဟားမက်စ်ကိုပစ်မှတ်ထားတယ်ဆိုတဲ့ အကြောင်းပြချက်နဲ့ ဂါဇာကမ်းမြှောင်က ပါလက်စတိုင်းပြည်သူတွေကို အကြမ်းဖက် သတ်ဖြတ်နေတဲ့ အစ္စရေးကို လက်တင်အမေရိက နိုင်ငံတွေက ပြောင်ပြောင်တင်းတင်း ဆန့်ကျင်ရှုတ်ချလာပါတယ်။ 

အစ္စရေးဟာ စစ်ရာဇ၀တ်မှု၊ လူသားထုအပေါ် ရာဇ၀တ်မှုတွေ ကျူးလွန်နေတာလို့လည်း ၀ေဖန်ခဲ့ပါတယ်။ 

ဘိုလီဗီယားနိုင်ငံဟာ အခုသီတင်းပတ်အတွင်း အစ္စရေးနဲ့ သံအဆက်အသွယ် ဖြတ်တောက်ကြောင်း ကြေငြာခဲ့ပြီး ကုလဆိုင်ရာ ဘိုလီဗီးယားသံအမတ် ဒီယေဂို ပါရီက အင်္ဂါနေ့ ကုလအစည်းအ၀ေးမှာ သူတို့ရဲ့ ရပ်တည်ချက်ကို ထပ်ပြောခဲ့ပါတယ်။ 

“ပါလက်စတိုင်းလွတ်မြောက်ရေးဟာ ပါလက်စတိုင်းပြည်သူတွေအတွက်ပဲမဟုတ်ပါဘူး။ တရားမျှတမှု၊ ငြိမ်းချမ်းရေးနဲ့ပတ်သက်ပြီး ကမ္ဘာကြီးကို မေးခွန်းထုတ်တာဖြစ်ပါတယ်။ (ပါလက်စတိုင်းပြည်သူတွေကို) ထပ်ပြောချင်တာက ခင်ဗျားတို့ကို ပစ်မထားပါဘူး။ ဘိုလီဗီယားနဲ့ ကမ္ဘာ့လူထုဟာ ခင်ဗျားတို့နဲ့အတူ ရပ်တည်နေပါတယ်”

ကိုလံဘီယာနိုင်ငံကလည်း အစ္စရေးဆိုင်ရာ သူတို့ရဲ့ သံအမတ်ကို အောက်တိုဘာ ၃၁ ရက်နေ့မှာ ပြန်ခေါ်ခဲ့ပါတယ်။ 

“ပါလက်စတိုင်းတွေအပေါ် အစုလိုအပြုံလိုက် သတ်ဖြတ်မှုကို အစ္စရေးက မရပ်တန့်သ၍ ငါတို့လည်း အစ္စရေးမှာ ရှိနေလို့ မရဘူး” လို့ သမ္မတ ဂူစတာဗို ပက်ထရိုက ဆိုရှယ်မီဒီယာမှာ ရေးသားခဲ့ပါတယ် 

ဂါဇာကမ်းမြှောင်မှာ အစ္စရေးက နိုင်ငံတကာ လူသားချင်း စာနာထောက်ထားမှုဆိုင်ရာ ဥပဒေတွေကို ချိုးဖောက်တာကို တွေ့ရတဲ့အတွက် အစ္စရေးဆိုင်ရာ သံအမတ် ဂျော်ဂျီ ကာဗာဂျယ်ကို ပြန်ခေါ်သွားမယ်လို့ ချီလီသမ္မတ ဂါဘရီယဲလ် ဘောရစ်က အောက်တိုဘာ ၃၁ ရက်နေ့ ဆိုရှယ်မီဒီယာမှာ ရေးသားခဲ့ပါတယ်။ 

“အစ္စရေးစစ်တပ်ရဲ့ လုပ်ရပ်တွေဟာ ပါလက်စတိုင်းပြည်သူ တစ်ခုလုံးအပေါ် အစုလိုအပြုံလိုက် ပြစ်ဒဏ်ပေးသလို ဖြစ်နေပါတယ်” 

Ref: Aljazeera