၁၅၀ လွှတ်ပေးပြီး ဓားစားခံ ၃၁၀၀ ကျော် ပြန်ဖမ်းထားတဲ့ အစ္စရေး

နို၀င်ဘာ ၂၅၊ ၂၀၂၃

M-Media 

-ပါလက်စတိုင်းနိုင်ငံ အနောက်ဖက်ကမ်းဒေသမှာ အောက်တိုဘာ ၇ ရက်နေ့နောက်ပိုင်း အစ္စရေးက ဖမ်းဆီးခဲ့တဲ့ ဓားစားခံအရေအတွက်ဟာ ၃၁၀၀ ကျော်လာခဲ့ပြီလို့ သိရပါတယ်။ 

ဟားမက်စ်ရဲ့ တိုက်ခိုက်မှုကို တုန့်ပြန်တယ်ဆိုတဲ့ ခေါင်းစဥ်နဲ့ အောက်တိုဘာ ၇ ရက်နေ့က စတင်ပြီး ဂါဇာက ပါလက်စတိုင်းပြည်သူတွေကို အစ္စရေးက တိုက်ခိုက်သတ်ဖြတ်နေတဲ့ တစ်ချိန်တည်းမှာပဲ အနောက်ဖက်ကမ်းမှာလည်း တိုက်ခိုက်မှုတွေကို ပိုမို လုပ်ဆောင်လာတာပါ။ 

အောက်တိုဘာ ၇ ရက်နေ့နောက်ပိုင်း အနောက်ဖက်ကမ်းမှာ အစ္စရေးတပ်ဖွဲ့တွေနဲ့ တရားမ၀င် ဂျူးအခြေချ နေထိုင်သူတွေရဲ့ အကြမ်းဖက်မှုကြောင့် ပါလက်စတိုင်း ၂၁၀ ကျော် သေဆုံးခဲ့ပါတယ်။ 

ဖမ်းဆီးခံသူက ၃၁၀၀ ကျော် ရှိပါတယ်။ 

ဟားမက်စ်နဲ့ ၄ ရက်တာ အပစ်ရပ်ရေးမှာ အရင်က ဖမ်းဆီးထားတဲ့ ပါလက်စတိုင်းဓားစားခံ ၅ ထောင်ကျော်ထဲက အမျိုးသမီးနဲ့ ကလေးငယ် ၁၅၀ ကို လွှတ်ပေးမယ်လို့ အစ္စရေးက ပြောကြားခဲ့ပါတယ်။ 

အပြန်အလှန်အားဖြင့် ဟားမက်စ်ဖက်ကလည်း အောက်တိုဘာ ၇ ရက်နေ့မှာ ဖမ်းဆီးသွားတဲ့ ဓားစားခံတွေထဲက ၅၀ ကို ပြန်လွှတ်ပေးမှာဖြစ်ပါတယ်။ 

ဂါဇာမှာ အပစ်ရပ်ထားပေမယ့် အနောက်ဖက်ကမ်းမှာ အစ္စရေးက တိုက်ခိုက်သတ်ဖြတ်မှုတွေ ပိုမိုတိုးမြှင့်လုပ်ဆောင်လာပြီး မနေ့က တစ်နေ့တည်းမှာပဲ ၁၇ ဦး ဖမ်းဆီးကာ အနည်းဆုံး ၅ ဦးကို သတ်ဖြတ်ခဲ့ပါတယ်။ 

Ref: Aljazeera