အတောမသတ်သေးတဲ့ အစ္စရေးရဲ့ စစ်ရာဇ၀တ်မှုများ

ဖေဖော်၀ါရီ ၁၆၊ ၂၀၂၄

M-Media 

-ဂါဇာကမ်းမြှောင် ခန်ယူနစ်မြို့က Nasser ဆေးရုံကို သီတင်းပတ်ချီ ပိတ်ဆို့တိုက်ခိုက်နေတဲ့ အစ္စရေးဟာ မနေ့စတင်ပြီး ဆေးရုံထဲအထိ ၀င်ရောက်တိုက်ခိုက်မှုတွေ လုပ်ဆောင်လာပါတယ်။ 

ပါလက်စတိုင်းလွတ်မြောက်ရေးအဖွဲ့ ဟားမက်စ်ဟာ ဆေးရုံထဲမှာ အခြေစိုက်ထားတယ်ဆိုတဲ့ ခေါင်းစဥ်နဲ့ အကြမ်းဖက်တိုက်ခိုက်မှုတွေ ပြုလုပ်နေတာ ဖြစ်ပါတယ်။ 

ပြီးခဲ့တဲ့နှစ် အောက်တိုဘာ ၇ ရက်နေ့ကစတင်ပြီး ဂါဇာမှာ ပြုလုပ်တဲ့ အစ္စရေးရဲ့ တစ်ကျော့ပြန် လူသတ်ပွဲမှာ အသတ်ခံရတဲ့ ပါလက်စတိုင်းပြည်သူ အရေအတွက်ဟာ ၂၈၆၆၃ ဦး ရှိလာပြီ ဖြစ်ပါတယ်။ 

အစ္စရေးလက်ချက်ကြောင့် Nasser ဆေးရုံမှာ ဓာတ်အားနဲ့ အောက်ဆီဂျင်ပြတ်တောက်ပြီး သေဆုံးသွားသူ လူနာ ၃ ဦးအထိ ရှိလာပါပြီ။ 

ပါလက်စတိုင်း ကျန်းမာရေးတာ၀န်ရှိသူတွေက အစ္စရေးရဲ့ ဒီလုပ်ရပ်ဟာ ဂါဇာမှာကျူးလွန်တဲ့ နောက်ထပ် ရာဇ၀တ်မှုတစ်ခုလို့ ၀ေဖန်ပြစ်တင်ခဲ့ပါတယ်။ 

ဂါဇာမှာရှိတဲ့ ဆေးရုံအများစုဟာ အစ္စရေးရဲ့လက်ချက်ကြောင့် ပျက်ဆီးသွားပြီး အသုံးပြုလို့ မရတော့ပါဘူး။ 

ဟားမက်စ်က ၀ေဖန်

ဆေးရုံတွေမှာ အခြေစိုက်ထားတယ်ဆိုတဲ့ အစ္စရေးရဲ့ ပြောကြားမှုကို ဟားမက်စ်က ငြင်းဆိုပြီး နိုင်ငံတကာအဖွဲ့အစည်းတွေ လာရောက်ကြည့်ရှု စစ်ဆေးနိုင်တယ်လို့ ထုတ်ပြန်ပါတယ်။ 

“ကျွန်တော်တို့ရဲ့ ပါလက်စတိုင်းတော်လှန်ရေးနဲ့ စစ်ရေးလှုပ်ရှားမှုတွေဟာ လူထု၊ ကျန်းမာရေးကဏ္ဍ၊ အရပ်ဖက်အဖွဲ့အစည်းတွေနဲ့ ဘာမှမဆိုင်ဘူးဆိုတာ အကြိမ်ကြိမ် ပြောထားပြီးသား ဖြစ်ပါတယ်။ ဆေးရုံတွေကို လာရောက်စစ်ဆေးပြီး၊ အစ္စရေးရဲ့ အလိမ်အညာတွေကို ဖော်ထုတ်ဖို့ ကုလသမဂ္ဂနဲ့ သက်ဆိုင်ရာ အဖွဲ့အစည်းတွေကို အရင်ကတည်းက ဖိတ်ခေါ်ထားပြီး ဖြစ်ပါတယ်။ ဒါပေမယ့် ကျွန်တော်တို့ရဲ့ တောင်းဆိုချက်ဟာ လစ်လျူရှုမှုသာ ခံရပါတယ်” လို့ ဟားမက်စ်ရဲ့ ထုတ်ပြန်ချက်မှာ ဖော်ပြထားပါတယ်။ 

Nasser ဆေးရုံမှာ ၀န်ထမ်း ၃၀၀၊ လူနာ ၄၅၀ နဲ့ စစ်ရှောင် တစ်သိန်းလောက် ရှိနေတာဖြစ်ပါတယ်။ 

Ref: Aljazeera