လက်နက်များစုထားသည့် အစ္စရေးတစ်ဦးကို မလေးရှား ဖမ်းဆီး

မတ် ၂၈၊ ၂၀၂၄

M-Media 

-အသက် ၃၆ နှစ်အရွယ် အစ္စရေးနိုင်ငံသားတစ်ဦးကို သူလျှိုသံသယနဲ့ ဖမ်းဆီးလိုက်တယ်လို့ မလေးရှားက ထုတ်ပြန်ပါတယ်။ 

အမျိုးသားဖြစ်ပြီး မြို့တော် ကွာလာလမ်ပူက အမ်ပန်းမြို့နယ်မှာ နေထိုင်နေတာပါ။ သူနဲ့အတူ ပစ္စတို ၆ လက်နဲ့ ကျည်ဆံ ၂၀၀ ဖမ်းမိတယ်လို့ မလေး ပြည်တွင်းသတင်းတွေက ဖော်ပြပါတယ်။ 

မလေးရှားဟာ အစ္စရေးနိုင်ငံကူးလက်မှတ် ကိုင်ထားသူတွေကို ပြည်၀င်ခွင့်မပေးပါဘူး။ 

ဖမ်းမိတဲ့အမျိုးသားဟာ ယူအေအီးကနေတစ်ဆင့် မတ်လ ၁၂ ရက်နေ့မှာ ကွာလာလမ်ပူ လေဆိပ်ကို ရောက်ရှိလာတာပါ။ KLIA လေဆိပ်အ၀င်မှာ ပြင်သစ်နိုင်ငံကူးလက်မှတ်ကို အသုံးပြုခဲ့တယ်လို့ ရဲတပ်ဖွဲ့ရဲ့ ထောက်လှမ်းရေးအကြီးအကဲ တန်ဆရီ ရာဇာရွတ်ဒင်း ဟူစိန်က မတ်လ ၂၉ ရက်နေ့မှာ ပြုလုပ်တဲ့ သတင်းစာရှင်းလင်းပွဲမှာ ပြောကြားခဲ့ပါတယ်။ 

“သံသယရှိသူကို ဖမ်းဆီးစစ်ဆေးရာမှာ အစ္စရေးနိုင်ငံကူးလက်မှတ်ကို သူက ထုတ်ပြခဲ့ပါတယ်။ ဟိုတယ် နှစ်ခု သုံးခုလောက်ပြောင်းပြီး (အမ်ပန်းက) နောက်ဆုံးဟိုတယ်ကို ရောက်လာတာပါ”

မိသားစုပြဿနာကြောင့် နောက်ထပ် အစ္စရေးနိုင်ငံသားတစ်ဦးကို သတ်ဖို့ မလေးရှားကို ရောက်လာတယ်လို့ သံသယရှိသူက ထွက်ဆိုကြောင်း တန်ဆရီ ရာဇာရွတ်ဒင်းက ပြောပါတယ်။

“သူပြောတာကို အပြည့်အ၀ ယုံကြည်လို့ မရပါဘူး။ အခြားအကြောင်းလည်း ရှိနိုင်ပါတယ်”

အစ္စရေးသူလျှိုတစ်ယောက် ဖြစ်နိုင်တယ်ဆိုတဲ့အချက်ကို မလေးရှားရဲတပ်ဖွဲ့က ထည့်သွင်းစဥ်းစားထားကြောင်း ရာဇာရွတ်ဒင်းက ဆိုပါတယ်။

ပစ္စတို ၆ လက် 

အစ္စရေးအမျိုးသားဟာ ကွလာလမ်ပူကို ရောက်တာနဲ့ လက်နက်တွေ အွန်လိုင်းက မှာယူခဲ့ပြီး ဒစ်ဂျစ်တယ်ငွေကြေးနဲ့ ငွေပေးချေခဲ့ပါတယ်။ 

ခိုးသွင်းတဲ့ လက်နက်တွေက Glocks၊ Smith နဲ့ Wesson တံဆိပ် ပစ္စတိုတွေအပါအ၀င် ပစ္စတို ၆ လက်နဲ့ ကျည်ဆံ ၂၀၀ ဖြစ်ပါတယ်။ 

“သူတစ်ယောက်တည်း လှုပ်ရှားတာမဟုတ်ဘူးလို့ ကျွန်တော်တို့ ယုံကြည်ထားတယ်။ တစ်ခြားအဆက်အသွယ်တွေ ရှိမှာပါ” လို့ တန်ဆရီ ရာဇာရွတ်ဒင်းက ဆိုပြီး ဒီသတင်းကြောင့် ဘုရင်၊ ၀န်ကြီးချုပ်ရဲ့ လုံခြုံရေးအပါအ၀င် တစ်နိုင်ငံလုံးမှာ လုံခြုံရေးအဆင့် မြှင့်ထားတယ်လို့ ထည့်သွင်းပြောကြားခဲ့ပါတယ်။

Ref: New Strait Time