ဗီယက်နမ် ခရိုနီတစ်ဦး သေဒဏ်ချမှတ်ခံရ

ဧပြီ ၁၁၊ ၂၀၂၄

M-Media 

-ဗီယက်နမ်က အိမ်ခြံမြေလုပ်ငန်း သူဌေးမကြီး Truong My Lan ကို ကန်ဒေါ်လာ ၁၂ ဒဿမ ၄၆ ဘီလီယံ မသမာမှုနဲ့ တရားရုံးက သေဒဏ် ချမှတ်လိုက်ပါတယ်။ 

Truong My Lan ဟာ နာမည်ကြီး အိမ်ခြံမြေကုမ္ပဏီ Van Thinh Phat Holdings Group ရဲ့ ဥက္ကဌလည်းဖြစ်ပါတယ်။ 

ငွေကြေးခ၀ါချမှု၊ လာဘ်ပေးလာဘ်ယူမှု၊ ဘဏ်လုပ်ငန်းဥပဒေ ချိုးဖောက်မှုတွေနဲ့ အပြစ်ရှိကြောင်း တွေ့ရှိရတယ်လို့ ဟိုချီမင်းမြို့ တရားရုံးက ထုတ်ပြန် ကြေငြာခဲ့ပါတယ်။ 

Truong My Lan ရဲ့ အမှုကို မတ်လ ၅ ရက်နေ့က စတင်စစ်ဆေးခဲ့ပြီး မျှော်မှန်းထားတာထက် မြန်မြန်ဆန်ဆန် ပြီးပြတ်ခဲ့တာပါ။ ဒါဟာ အာဏာရ ကွန်မြူနစ်ပါတီခေါင်းဆောင် Nguyen Phu Trong ကတိပြုထားတဲ့ ခြစားမှုတိုက်ဖျက်ရေးစီမံကိန်း တစ်စိတ်တစ်ပိုင်းလည်း ဖြစ်ပါတယ်။ 

ဗီယက်နမ်ဟာ အရှေ့တောင်အာရှမှာ စီးပွားရေးတိုးတက်မှု အမြန်ဆုံး နိုင်ငံတစ်ခုဖြစ်ပြီး နိုင်ငံတကာ ရင်းနှီးမြှုပ်နှံသူတွေရဲ့ ယုံကြည်မှုကို ပိုမို ရရှိဖို့အတွက် ခြစားမှုတိုက်ဖျက်ရေးလုပ်ငန်းကို အစိုးရက အားထည့်လုပ်ဆောင်နေတာဖြစ်ပါတယ်။ 

ခြစားမှုနဲ့ ပတ်သက်ပြီး ရာနဲ့ချီတဲ့ အစိုးရအရာရှိတွေနဲ့ ထိပ်တန်းလုပ်ငန်းရှင်တစ်ချို့ကို ဖမ်းဆီးစစ်ဆေးတာမျိုးတွေလည်း ဗီယက်နမ်အစိုးရက လုပ်ဆောင်ခဲ့ပါတယ်။

Ref: Reuters