ICC ၏ဖမ်းဆီးမှု မခံရရေး ကူညီပေးရန် နေတန်ယာဟုက ဘိုင်ဒန်ထံ အကူအညီလှမ်းတောင်း

ဧပြီ ၃၀၊ ၂၀၂၄

M-Media 

-နိုင်ငံတကာ ရာဇ၀တ်ခုံရုံး ICC က အစ္စရေးအာဏာပိုင်တွေအပေါ် ဖမ်း၀ရမ်းမထုတ်ရေး ကူညီပေးဖို့ အမေရိကန်သမ္မတ ဂျိုးဘိုင်ဒန်ထံ အစ္စရေး၀န်ကြီးချုပ် နေတန်ယာဟုက ဖုန်းဆက် အကူအညီတောင်းခဲ့တယ်လို့ သိရပါတယ်။ 

ဧပြီလ ၂၈ ရက်နေ့က ဒီလို ဖုန်းဆက် အကူအညီတောင်းခဲ့တာလို့ အမည်မဖော်လိုတဲ့ အစ္စရေးအစိုးရ တာ၀န်ရှိသူနှစ်ဦးက ပြောပါတယ်။ 

ဂါဇာက အစ္စရေးရဲ့ တစ်ကျော့ပြန်လူသတ်ပွဲမှာ အပြစ်မဲ့အရပ်သားတွေ သောင်းချီ အသတ်ခံရတဲ့ ကိစ္စအတွက် အစ္စရေးအာဏာပိုင်တွေဟာ နိုင်ငံတကာ တရားရေးစနစ်ကို ရင်ဆိုင်ရတော့မယ်လို့ ပြောဆိမှုတွေ ကျယ်ကျယ်ပြန့်ပြန့် ပေါ်ထွက်လာတဲ့အချိန် နေတန်ယာဟုက ဘိုင်ဒန်ထံ အကူအညီတောင်းခံမှု ပေါ်ပေါက်လာတာ ဖြစ်ပါတယ်။ 

အစ္စရေးက ၀င်ရောက်စီးနင်းတိုက်ခိုက်ပြီး အစုလိုက်ပြုံလိုက် လူသတ်မှုတွေ ကျူးလွန်ခဲ့တဲ့ ဂါဇာက အကြီးဆုံး ဆေးရုံနှစ်ခုက ၀န်ထမ်းတွေရဲ့ ထွက်ဆိုချက်တွေကို ICC တာ၀န်ရှိသူတွေက သုံးသပ် စစ်ဆေးနေတယ်လို့ ရိုက်တာသတင်းဌာနက ပြီးခဲ့တဲ့ရက်ပိုင်းမှာ ဖော်ပြခဲ့ပါတယ်။

ဂါဇာက ဒုတိယအကြီးဆုံး ဆေးရုံဖြစ်တဲ့ အလ်နာဆာရ် ဆေးရုံ၀င်းထဲမှာ အစ္စရေးက သတ်ဖြတ်မြှုပ်နှံထားတဲ့ နေရာတွေကို တူးဖော်ရာမှာ အနည်းဆုံး အလောင်း ၃၀၀ ကျော်တွေ့ခဲ့ပါတယ်။

အသတ်ခံရသူ အများစုဟာ အမျိုးသမီးတွေ၊ သက်ကြီးရွယ်အိုတွေနဲ့ လူနာတွေဖြစ်တယ်လို့ မျက်မြင်သက်သေတွေက ထွက်ဆိုထားပါတယ်။ 

Ref: Aljazeera