ယူကေရွေးကောက်ပွဲတွင် လေဘာပါတီက အံ့အားသင့်ဖွယ် အပြတ်အသတ် အနိုင်ရ

ဇူလိုင် ၅၊ ၂၀၂၄
M-Media

-ဇူလိုင်လ ၄ ရက်နေ့က ကျင်းပတဲ့ ယူကေရွေးကောက်ပွဲမှာ လေဘာပါတီဟာ ၂၀၁၀ နောက်ပိုင်း ပထမဆုံးအကြိမ်အဖြစ် မဲအပြတ်အသတ်ရပြီး အနိုင်ရရှိခဲ့ပါတယ်။

ပါတီခေါင်းဆောင် ဆာ ကီယာ စတာမာဟာ ယူကေရဲ့ ၀န်ကြီးချုပ်သစ် ဖြစ်လာမှာဖြစ်ပြီး ဇူလိုင်လ ၅ ရက်နေ့မှာ အစိုးရသစ်ကို ဖွဲ့စည်းကြေငြာမှာ ဖြစ်ပါတယ်။

“အပြောင်းအလဲတွေ အခုအချိန်ကနေ စတင်ပါပြီ။ ရိုးရိုးသားသား ၀န်ခံရရင် ကျွန်တော် ကျေနပ်မိပါတယ်” လို့ ရွေးကောက်ပွဲရလဒ်တွေ ထွက်လာပြီးနောက် လန်ဒန်မြို့လယ်ကောင်မှာ လေဘာပါတီ ထောက်ခံသူတွေကို စတာမာက ပြောကြားခဲ့ပါတယ်။

ခေါင်းဆောင်ဟောင်း ဂျယ်ရီမီ ကောရ်ဘန်လက်ထက် ၂၀၁၉ ခုနှစ်က ရွေးကောက်ပွဲမှာ သမိုင်းတစ်လျှောက် အနည်းဆုံးအဖြစ် အမတ်နေရာ ၂၀၂ နေရာသာ နိုင်ခဲ့တဲ့ လေဘာပါတီဟာ အခုရွေးကောက်ပွဲမှာ ၄၁၁ နေရာအထိ အနိုင်ရခဲ့ပါတယ်။

လက်ရှိ အာဏာရ ကွန်ဆာဗေးတစ်ပါတီက ၁၁၉ နေရာသာ အနိုင်ရရှိထားပါတယ်။

ကတိက၀တ်

မဲဆွယ်ပွဲတွေမှာ လေဘာပါတီဟာ ပြီးခဲ့တဲ့နှစ်အနည်းငယ်အတွင်း ကျဆင်းခဲ့တဲ့ ယူကေစီးပွားရေး ဦးမော့အောင် ဆောင်ရွက်ပေးမယ်လို့ ကတိပေးခဲ့ပါတယ်။

တိုင်းပြည်ရဲ့ စီမံကိန်းစနစ်ကို ပြုပြင်ပြောင်းလဲဖို့၊ နိုင်ငံအတွင်း ရင်းနှီးမြှုပ်နှံမှုတွေ ပိုမို၀င်လာစေဖို့လည်း လေဘာပါတီက လုပ်ဆောင်သွားမှာ ဖြစ်ပါတယ်။

လေပါတီက ဆောင်ရွက်မယ့် ကိစ္စတွေထဲမှာ အလုပ်သမားဥပဒေကို ပြင်ဆင်ရေးဆွဲတာ၊ ရထားပို့ဆောင်ရေးကဏ္ဍ အားလုံးနီးပါးကို နိုင်ငံပိုင်အဖြစ် ပြန်လည်လုပ်ဆောင်တာ၊ နိုင်ငံပိုင် စွမ်းအင် လုပ်ငန်းတွေ ထူထောင်တာ၊ သဘာ၀ပတ်၀န်းကျင် ထိန်းသိမ်းရေးကဏ္ဍတွေမှာ ရင်းနှီးမြှုပ်နှံတာတွေလည်း ပါ၀င်မှာ ဖြစ်ပါတယ်။

Ref : BBC