အိန္ဒိယအခွန်ဌာန လူရွေးပွဲတွင် ပြင်းထန်သည့် စစ်ဆေးမှုကြောင့် ၁၂ ဦး သေဆုံး

စက်တင်ဘာ ၃၊ ၂၀၂၄
M-Media

-အိန္ဒိယနိုင်ငံ အရှေ့ပိုင်း ဂျ့ခ်ဟန်းပြည်နယ်က အခွန်ဌာန ၀န်ထမ်းခေါ်ယူမှုလူရွေးပွဲ ကြံ့ခိုင်မှုစစ်ဆေးရာမှာ ပြင်းထန်လှတာကြောင့် လူငယ် ၁၂ ဦး သေဆုံးခဲ့တယ်လို့ သိရပါတယ်။

ပြည်နယ်အခွန်ဌာန အောက်ခြေအဆင့်၀န်ထမ်းနေရာ ၅၈၃ နေရာအတွက် လူခေါ်ယူမှုမှာ လူပေါင်း ၅ သိန်းလောက် လျှောက်ထားခဲ့ကြတာပါ။ လူတွေ့ကြံ့ခိုင်မှုစစ်ဆေးရာမှာ ၁၀ ကီလိုမီတာ ပြေးခိုင်းခဲ့တာကြောင့် မောဟိုက်ကာ ၂ ပတ်အတွင်း လူငယ် ၁၂ ဦး သေဆုံးခဲ့ပါတယ်။

လက်ရှိမှာ လူခေါ်ယူမှုကို ဆိုင်းငံ့ထားလိုက်ပြီး စုံစမ်းစစ်ဆေးမှုတွေ လုပ်ဆောင်နေတယ်လို့ ပြည်နယ်ရဲတပ်ဖွဲ့က ထုတ်ပြန်ပါတယ်။

အိန္ဒိယမှာ အလုပ်လက်မဲ့ ဦးရေ အလွန်များပြားတာကြောင့် အစိုးရအလုပ်ခေါ်ယူမှုတွေမှာ လူတွေ အများအပြား စုပြုံလျှောက်ထားလေ့ရှိပြီး၊ အလုပ်ရရေးအတွက် လာဘ်ငွေအမြောက်အများ ပေးရတဲ့ အဖြစ်အပျက်မျိုးတွေလည်း ရှိပါတယ်။

ဂျာ့ခ်ဟန်းပြည်နယ်ဟာ အိန္ဒိယနိုင်ငံမှာ အဆင်းရဲဆုံးနဲ့ အလုပ်လက်မဲ့အများဆုံး ပြည်နယ်တွေထဲက တစ်ခုလည်း ဖြစ်ပါတယ်။

Ref: AFP