ပါလက်စတိုင်းတိုက်ခိုက်ခံရမှု နောက်ဆုံးရသတင်းများ (ဒီဇင်ဘာ ၂၁)

M-Media

အစ္စရေးကို ထိန်းသိမ်းဖို့ နိုင်ငံတကာ အသိုင်းအ၀ိုင်းကို ကုလတိုက်တွန်း
—————
ပါလက်စတိုင်းပြည်သူတွေ၊ နိုင်ငံတကာက လူ့အခွင့်အရေးလှုပ်ရှားသူ၊ အကူအညီပေးသူတွေကို တိုက်ခိုက်သတ်ဖြတ်နေတဲ့ အစ္စရေးကို ကမ္ဘာအသိုင်းအ၀ိုင်း ထိန်းသိမ်းကြပ်မတ်ဖို့ ကုလအကူအညီပေးရေးအဖွဲ့ UNRWA ရဲ့ အကြီးအကဲ ဖိလစ်ပီ လာဇာရီနီက တိုက်တွန်းလိုက်ပါတယ်။ အကြမ်းဖက်မှုတွေကို ဖုံးကွယ်ဖို့အတွက် အစ္စရေးဟာ ငွေကြေးအမြောက်အများသုံးကာ သတင်းမှား ၀ါဒဖြန့်တာတွေ လုပ်ဆောင်နေတယ်လို့လည်း ယူကေသတင်းစာ Guardian နဲ့ အင်တာဗျူးမှာ ထည့်သွင်းပြောကြားခဲ့ပါတယ်။

ICC ကိုကြောက်၍ ပိုလန်မှ အခမ်းအနားကို နေတန်ယာဟု မတက်ဖြစ်
————-
နိုင်ငံတကာ ရာဇ၀တ်ခုံရုံး ICC က ၀ရမ်းကြောင့် အဖမ်းခံရမှာ စိုးရိမ်တဲ့အတွက် ဇန်န၀ါရီ ၂၇ ရက်နေ့ ပိုလန်မှာလုပ်မယ့် အော့ဇ်၀စ်အကျဥ်းစခန်း လွတ်မြောက်မှု နှစ် ၈၀ ပြည့်အခမ်းအနားကို အစ္စရေး၀န်ကြီးချုပ် နေတန်ယာဟု တက်ရောက်မှာ မဟုတ်ပါဘူး။ ပါလက်စတိုင်းတွေအပေါ် စစ်ရာဇ၀တ်မှုကျူးလွန်တဲ့အတွက် နေတန်ယာဟုနဲ့ အစ္စရေး ကာကွယ်ရေး၀န်ကြီးဟောင်း ယိုအဗ် ဂါလန့်တို့ကို ICC က ဖမ်း၀ရမ်းထုတ်ထားပြီး ပိုလန်ကလည်း ဒီကိစ္စအတွက် ICC နဲ့ အပြည့်အ၀ ပူးပေါင်းမယ်လို့ ထုတ်ပြန်ထားတာ ဖြစ်ပါတယ်။

ပါလက်စတိုင်းက ဗလီကို ဂျူးအခြေချသူများ မီးရှို့
—————-
အနောက်ဖက်ကမ်း မဒ်ရာရွာက ဗလီတစ်လုံးကို တရားမ၀င် ဂျူးအခြေချ လူအုပ်က သောကြာနေ့မနက် အစောပိုင်းမှာ မီးရှို့ဖျက်ဆီးခဲ့ပြီး၊ ‘ဗလီတွေကို မီးရှို့ပြီး ဂျူးဘုရားကျောင်းတွေ ဆောက်မယ်’ ‘အာရပ်တွေကို သတ်ပစ်’ စတဲ့ ခြိမ်းခြောက်စာတွေကိုလည်း ဗလီနံရံမှာ ရေးသားခဲ့ပါတယ်။ ဂျူးလူအုပ်ရဲ့ ဒီလုပ်ရပ်ကို အစ္စရေးလုံခြုံရေးတပ်ဖွဲ့တွေက အပြည့်အ၀ အကူအညီပေးခဲ့တယ်လို့ ဒေသခံ ပါလက်စတိုင်းခေါင်းဆောင်တွေက ပြောပါတယ်။

Ref: Aljazeera