အီရတ်စစ်တပ်၏ မူဆိုးလ်ထိုးစစ် အောင်မြင်မှုရနေ

အောက်တိုဘာ ၂၀၊ ၂၀၁၆
M-Media

– IS အကြမ်းဖက်အဖွဲ့၏ နောက်ဆုံးခြေကုပ်စခန်းဖြစ်သော မူဆိုးလ်မြို့အား အီရတ်စစ်တပ်မှ ထိုးစစ်ဆင်မှုမှာ ၃ ရက် လွန်မြောက်လာခဲ့ပြီဖြစ်ပြီး မြို့အနီးအနားရှိ ဒေသများကိုလည်း ပြန်လည်သိမ်းပိုက်ထားနိုင်ကာ ၂၀၀၃ ခုနှစ် အမေရိကန်ဦးဆောင်သည့် ကျူးကျော်တိုက်ခိုက်မှုနောက်ပိုင်း အကြီးမားဆုံးတိုက်ပွဲ ဖြစ်လာမည့် မြို့သိမ်းတိုက်ပွဲမှာ နီးကပ်လာပြီ ဖြစ်သည်။

IS က ပြုလုပ်ထားသော ထောင်ချောက်များ၊ ဖောက်ခွဲရေးပစ္စည်းများကြောင့် အီရတ်စစ်တပ်၏ ရှေ့ဆက်တိုးမှုမှာ နှေးကွေးနေပြီး ယခုအချိန်အထိ အသေခံဗုံးခွဲသမားများမောင်းလာသော ကား ၅ စီးကို ဖျက်ဆီးခဲ့သည်ဟု စစ်တပ်က ပြောကြားခဲ့သည်။

ထိုးစစ်ပြုလုပ်ခဲ့သည့် နေ့မှာပင် ရွာ ၉ ရွာကို သိမ်းယူနိုင်ခဲ့ပြီး အများစုမှာ ကာ့ဒ်တပ်ဖွဲ့ Peshmerga ၏ ကြိုးပမ်းအားထုတ်မှုဖြစ်သည်။ လက်ရှိတွင်မူ မူးဆိုးလ်မြို့သို့ ၀င်ရောက်နိုင်မည့် အရှေ့ဘက် ဂိတ်ပေါက်ဝဖြစ်သော ဟမ်ဒါနီယာမြို့အား စစ်တပ်က ၀ိုင်းထားသည်။

အီရန်က ကျောထောက်နောက်ခံပြုထားသည့် ပြည်သူ့စစ်အဖွဲ့ဖြစ်သော Popular Mobilization Force ကမူ မိမိတို့အနေဖြင့် မူဆိုးလ်မြို့အနောက်ဖက် တာလ် အာဖာရ်ဒေသို့ ထိုးစစ်ပြုရာတွင် အီရတ်စစ်တပ်အား ပံ့ပိုးသွားမည်ဟု ပြောကြားခဲ့သည်။ ထိုဒေသကို သိမ်းပိုက်နိုင်ပါက IS အဖွဲ့ဝင်များ ဆီးရီးယားသို့ ထွက်ပြေးရာလမ်းကြောင်းကို ပိတ်ပစ်နိုင်မည်ဖြစ်သော်လည်း ပြည်သူများထွက်ပြေးမှုကိုလည်း ဟန့်တားသကဲ့သို့လည်း ဖြစ်နိုင်သည်။

နိုင်ငံအတွင်း IS အား အမြစ်ဖြုတ်နိုင်မည့် အဆိုပါ ထိုးစစ်ကို အမေရိကန်ဦးဆောင်သည့် ညွန့်ပေါင်းအဖွဲ့က လေကြောင်းမှ ပစ်ကူပေးပြီး အီရတ်စစ်တပ်၊ စွန်နီလူမျိုးစု တပ်ဖွဲ့များ၊ ရှီအာ ပြည်သူ့စစ်များနှင့် ကာ့ဒ်တပ်ဖွဲ့တို့ ပူးပေါင်းကာ မြေပြင် တိုက်ခိုက်ရေးလုပ်ငန်းများကို လုပ်ဆောင်နေကြခြင်း ဖြစ်သည်။

တိုက်ခိုက်မှုများကြောင့် မူဆိုးလ်မြို့တွင် လူသိန်းချီ ပိတ်မိနေပြီး၊ အချို့မှာ စားနိပ်ရိက္ခာများ ပြတ်တောက်တော့မည့်အခြေအနေ ရှိနေသည်။ ကုလကမူ ထို တိုက်ပွဲအတွင်း လူပေါင်း ၁ သန်းခန့် အိုးအိမ်စွန့်ခွာရမည့်အန္တရာယ် ရှိနေသည်ဟု ခန့်မှန်းတွက်ချက်ထားသည်

Ref: Aljazeera