အမေရိကန် အွန်လိုင်းလောက အမှောင်ကျသည့်နေ့ (သို့မဟုတ်) အောက်တိုဘာ ၂၁

အောက်တိုဘာ ၂၃၊ ၂၀၁၆
M-Media

– အမေရိကန်မှာ အွန်လိုင်းဒေတာအသွားအလာအတွက် ကြားခံအဖြစ်ဆောင်ရွက်ပေးနေတဲ့ ကုမ္ပဏီတစ်ခုကို ဟက်ကာတွေက တိုက်ခိုက်မှုတွေ တရစပ်ပြုလုပ်ခဲ့တဲ့အတွက် သောကြာနေ့မှာ နိုင်ငံတစ်ဝှမ်းက နာမည်ကျော် ၀ဘ်ဆိုက်တွေ ၀င်ရောက်လို့မရ ဖြစ်ခဲ့ပါတယ်။

တိုက်ခိုက်ခံရတဲ့ ကုမ္ပဏီကတော့ Twitter၊Paypal၊ Spotify နဲ့ အခြားသော အွန်လိုင်းအခြေပြု ကုမ္ပဏီတွေကို ၀န်ဆောင်မှုပေးတဲ့ နယူးဟမ့်ရှိုင်းယား အခြေစိုက်တဲ့ Dyn ကုမ္ပဏီဖြစ်ပြီး အွန်လိုင်းအသုံးပြုမှု တော်တော်များများကို စီမံခန့်ခွဲရတဲ့ကုမ္ပဏီ ဖြစ်ပါတယ်။

“တိုက်ခိုက်မှုက လှိုင်းလုံးကို တစ်ခုပြီးတစ်ခု လာတာပါ။ ပထမဆုံး အမေရိကန်ပြည်ထောင်စုရဲ့ အရှေ့ကမ်းရိုးတမ်းကို ပစ်မှတ်ထားပြီး နောက်ပိုင်းမှာ နိုင်ငံရဲ့ အခြားအစိတ်အပိုင်းတွေကိုရောက်ခဲ့ကာ ဥရောပအနောက်ခြမ်းအထိ သက်ရောက်ခဲ့ပါတယ်” လို့ အလ်ဂျာဇီးရား သတင်းထောက် ရော့ဘ် ရိန်နိုးက ပြောကြားခဲ့ပါတယ်။

“ထိခိုက်ခဲ့တဲ့ ၀ဘ်ဆိုက်တွေထဲမှာ CNN နဲ့ New Yourk Times ၊ AirBnB၊ Reddit၊ HBO တွေလို နာမည်ကြီး ၀ဘ်ဆိုက်အချို့ ပါဝင်ခဲ့ပြီး၊ အခြားဆိုက်တော်တော်များများလည်း တိုက်ခိုက်ခံခဲ့ရပါတယ်။ Dyn ကုမ္ပဏီဟာ အသုံးပြုသူတွေကို မတူညီတဲ့ ၀ဘ်ဆိုက်တွေကို ပို့ဆောင်ပေးတဲ့၊ ဆာဗာတစ်ခုကနေ တစ်ခုကို ရှုပ်ထွေးတဲ့နည်းလမ်းနဲ့ အွန်လိုင်း ဒေတာတွေ အပြောင်းအရွှေ့လုပ်ပေးတဲ့ ကုမ္ပဏီတစ်ခု ဖြစ်ပါတယ်။ ”

တိုက်ခိုက်သူတွေဟာ အင်တာနက်ချိတ်ဆက်ထားတဲ့ ကိရိယာ သိန်းနဲ့ချီအသုံးပြုခဲ့တာဖြစ်ပြီး အဲဒီကိရိယာတွေထဲမှာ အရင်က Mira လို့ခေါ်ပြီး အဝေးလှမ်းထိန်းချုပ်လို့ရတဲ့ ကုဒ်တစ်ခု ထည့်ထားတာဖြစ်ပါတယ်။

အဲဒီတိုက်ခိုက်မှုမျိုးကို DDoS လိုခေါ်ပြီး အဲဒီကုဒ်ထည့်ထားတဲ့ ကိရိယာတွေကနေ Dyn ရဲ့ ဆာဗာတွေဆီကို အချက်အလက်တွေ တစ်ပြိုင်နက် လှမ်းတောင်းတာပါ။

“ဒီတိုက်ခိုက်မှုရဲ့ ရှုပ်ထွေးမှုဟာ ကျွန်တော်တို့အတွက် တော်တော်လေးကြီးမားတဲ့ စိန်ခေါ်မှုကို ဖြစ်စေပါတယ်” လို့ Dyn ရဲ့ မဟာဗျူဟာအကြီးအကဲ ကီလီယော့ခ်က ပြောကြားခဲ့ပါတယ်။

နောက်ပြီး ဒီတိုက်ခိုက်မှုတွေဟာ ၀ဘ်ကင်မရာ၊ ဗီဒီယိုကင်မရာတွေအပါအ၀င် Mirai ကုဒ်ရှိနေတဲ့ အင်တာနက်အသုံးပြု ကိရိယာတွေကနေ လာတာဖြစ်တယ်လို့လည်း သူက ဆိုပါတယ်။

လုံခြုံရေးဆိုင်ရာ သုတေသနပညာရှင်တွေက Internet of Things လို့ခေါ်တဲ့ အဲဒီ ကိရိယာတွေဟာ သင့်လျော်တဲ့ လုံခြုံရေး မရှိဘူးလို့ အရင်က သတိပေးဖူးပါတယ်။

Mirai ကုဒ်ဟာ လွန်ခဲ့တဲ့ တစ်လအရင်လောက်ကတည်းက အင်တာနက်မှာ ပြန့်နှံ့နေတာဖြစ်ပြီး အခုအချိန်မှာတော့ ရာဇ၀တ်မှုအဖွဲ့တွေက ဆိုက်ဘာတိုက်ခိုက်မှုတွေ ပြုလုပ်ဖို့အတွက် ဒီကုဒ်ကို အသုံးပြုနေကြတယ်လို့ Dyn ကုမ္ပဏီတိုက်ခိုက်မှုအကြောင်း ဆန်းစစ်ရာမှာ ပါဝင်နေတဲ့ Flashpoint အဖွဲ့က လုံခြုံရေး သုတေသနဆိုင်ရာ ဒါရိုက်တာ အလီဆန် နီဇွန်က ပြောကြားခဲ့ပါတယ်။

အမေရိကန် ပြည်တွင်းလုံခြုံရေးဌာနက Mirai ကုဒ် ထွက်လာပြီးတဲ့နောက်ပိုင်းမှာ Internet of Things ကိရိယာတွေဟာ တိုက်ခိုက်ခံရနိုင်တယ်လို့ ပြီးခဲ့တဲ့တစ်ပတ်ကပဲ သတိပေးချက် ထုတ်ပြန်ခဲ့ပါတယ်။

တစ်ကြိမ်တည်းမဟုတ်

သောကြာနေ့က Dyn ကုမ္ပဏီက ထုတ်ပြန်တဲ့ ကြေငြာချက်ထဲမှာ မိမိတို့အနေနဲ့ လုပ်ငန်းစဉ်တွေ ၂ နာရီလောက် ရပ်တန့်သွားခဲ့တဲ့ အဲဒီမနက်ပိုင်းတိုက်ခိုက်မှုကို ဖြေရှင်းနိုင်ခဲ့တယ်လို့ ဖော်ပြခဲ့ပါတယ်။ ဒါပေမ့် နောက်ထပ် နာရီအနည်းငယ် အကြာမှာတော့ ဒီလို ၀င်ကြည့်လို့မရတဲ့ အဖြစ်အပျက်တွေ ထပ်ဖြစ်ခဲ့ပါတယ်။ သောကြာနေ့ ညနေပိုင်းမှာလည်း နောက်တစ်ကြိမ် ထပ်ဖြစ်ပါတယ်။

Dyn လို ကုမ္ပဏီမျိုးဟာ အင်တာနက်အသုံးပြုမှု ဧရာမပမာဏကို တာဝန်ယူ ကိုင်တွယ်နေတာဖြစ်တာကြောင့် ဒီလိုတိုက်ခိုက်မှုကာ အွန်လိုင်းမှာ ကြီးမားတဲ့ အနှောက်အယှက်မျိုး ဖြစ်စေနိုင်ပါတယ်။

ဟက်ကာတွေက နိုင်ငံရေးအသင်းအဖွဲ့တွေ၊ ရွေးကောက်ပွဲ အေဂျင်စီတွေကို တိုက်ခိုက်မှုတွေ လုပ်နေတာကြောင့် အမေရိကန်မှာ ဆိုက်ဘာခြိမ်းခြောက်မှုနဲ့ပတ်သက်ပြီး မကြုံစဖူး ကြောက်ရွံ့မှုတွေ ရှိနေတဲ့အချိန် ဒီလို တိုက်ခိုက်မှု ပေါ်ထွက်လာတာပါ။

ဒီမိုကရက်တစ်ပါတီရဲ့ အီးမေးလ်တွေကို ဖောက်ထွင်းမှုအပါအ၀င် နိုဝင်ဘာ ၈ ရက်နေ့ သမ္မတရွေးကောက်ပွဲ မဲဆွယ်ပွဲတွေ ပြုလုပ်နေတဲ့အချိန်မှာ အမေရိကန်နိုင်ငံရေးအသင်းအဖွဲ့တွေကို ဆိုက်ဘာတိုက်ခိုက်မှုဟာ ရုပ်ရှားက ပြုလုပ်တာဖြစ်တယ်လို့ အမေရိကန်အစိုးရက တရားဝင် စွပ်စွဲထားပါတယ်။

အမေရိကန်ပြည်တွင်းလုံခြုံရေးဌာနနဲ့ FBI တို့က Dyn တိုက်ခိုက်မှုကို မိမိတို့ စုံစမ်းစစ်ဆေးမှုတွေ ပြုလုပ်နေတယ်လို့ ပြောကြားထားပါတယ်။

“ဒီတိုက်ခိုက်မှုအတွက် ဘယ်သူ့မှာ တာဝန်ရှိလဲဆိုတာကို ကျွန်တော်တို့ မသိသေးပါဘူး။ ဒါပေမယ့် ဒါဟာ စနစ်တကျပြုလုပ်တဲ့၊ ရင်းမြစ်တော်တော်များများပါဝင်တဲ့ တိုက်ခိုက်မှုဖြစ်တာကတော့ သေချာပုံရပါတယ်။ ဒါ့ကြောင့် ဒါဟာ မြေအောက်ခန်းလို နေရာမျိုးကနေ ဆယ်ကျော်သက်ကလေးတွေက အပျော်သက်သက် လုပ်တာမျိုး မဟုတ်ပါဘူး” လို့ ရိန်နိုးက ပြောကြားခဲ့ပါတယ်။

“တိုက်ခိုက်မှုရဲ့ နောက်ကွယ်က အကြောင်းအရင်းက တော်တော်လေး မရှင်းမလင်းဖြစ်နေပါတယ်။ ဘာ့ကြောင့်လည်းဆိုတော့ ဘာမှ မပါသွားလို့ပါ။ ဒါက အဖျက်သဘောပါ။ တစ်ယောက်ယောက်က အင်တာနက် ဘယ်လောက် ပြတ်သွားသလဲဆိုတာကို စမ်းသပ်ချင်လို့ လုပ်တာဆိုတဲ့ ပြောဆိုသူတွေလည်း ရှိနေပါတယ်”

ဒီမိုရက်တစ်သမ္မလောင်း ဟီလာရီကလင်တန်ရဲ့ မဲဆွယ်ရေးအကြီးအကဲ ဂျွန် ပိုဒက်ဆာရဲ့ အီးမေးလ်တွေကို ဖောက်ထွင်းပြီး ဖွင့်ချခဲ့တဲ့ ဟက်ကာအဖွဲ့ ၀ီကီလိခ်ကတော့ သူတို့ကို ထောက်ခံသူတွေဟာ ဒီတိုက်ခိုက်မှုနောက်ကွယ်က ရှိနေနိုင်တဲ့ပုံစံမျိုး Twitter စာမျက်နှာမှာ ရေးသားခဲ့ပြီး တိုက်ခိုက်မှုရပ်တန့်ဖို့လည်း တိုက်တွန်းခဲ့ပါတယ်။

အဖွဲ့တည်ထောင်သူ ဂျူလီယန် အက်ဆန်ဂီရဲ့ အင်တာနက် အသုံးပြုမှုကို အမည်မသိ အစိုးရက ဖြတ်တောက်ခဲ့တယ်လို့ မကြာသေးမီကဘဲ ၀ီကီလိခ်က သတင်းထုတ်ပြန်ခဲ့တာပါ။

အီကွေဒေါအစိုးရကတော့ အက်ဆန်ဂီရဲ့ အင်တာနက်အသုံးပြုမှုကို တစ်စိတ်တစ်ပိုင်း ကန့်သတ်ခဲ့တယ်လို့ နောက်ပိုင်းမှာ ၀န်ခံခဲ့ပါတယ်။ အက်ဆန်ဂီဟာ အီကွေဒေါမှာ ရှိနေတာဖြစ်ပြီး ဆွီဒင်ကို လွှဲပြောင်းပေးပို့မှာကို ရှောင်ရှားဖို့အတွက် ယူကေသံရုံးမှာ ၂၀၁၂ နှစ်အလယ်ပိုင်းကတည်းက ခိုလှုံခဲ့တာဖြစ်ပါတယ်။

အမေရိကန်ရွေးကောက်ပွဲကို ထိခိုက်စေမယ့် စာရွက်စာတမ်းတွေကို ထုတ်ပြန်တဲ့ ၀ီကီလိခ်ရဲ့ဆုံးဖြတ်ချက်အတွက် အဖွဲ့ကသာ လုံးဝ တာဝန်ယူရမှာဖြစ်ပြီး မိမိတို့နိုင်ငံအနေနဲ့ အမေရိကန်ရွေးကောက်ပွဲ လုပ်ငန်းစဉ်ကို ၀င်ရောက် စွက်ဖက်လိုစိတ် မရှိဘူးလို့ အီကွေဒေါက ပြောကြားထားပါတယ်။

Ref: Aljazeera