မုန်တိုင်းဒဏ်ခံ အဆောက်အအုံများနှင့် မြန်မာလူမျိုးတို့ရဲ့ အလှူဒါန အာသီသ

အောက်တိုဘာ ၂၃ ၊ ၂၀၁၆
ရဲဆွေဝင်းရေးသည်။

မုန်တိုင်း ဝင်တတ်တဲ့လမ်းကြောင်းတွေမှာ နေထိုင်တဲ့ပြည်သူတွေအတွက် storm shelters တွေ ကြိုတင်ဆောက်တဲ့ အကြောင်းတွေ ဖတ်ရတယ်။

မုန်တိုင်းတွေက မလာခင် အနည်းဆုံး နာရီ ၂၀ လောက် ကြိုသတိပေးနိုင်တယ်။ တိုက်ခတ်ချိန်က အကြာဆုံး ၂ ရက်လောက်ပဲရှိတယ်။ အဲဒီ ၂ ရက်အတွက် လုံခြုံတဲ့ နားခိုရာ စီမံပေးနိုင်ရင်၊ လူအသေအပျောက် အများကြီးလျှော့ချနိုင်မယ်။ (ပစ္စည်းဆုံးရှုံးမှုကတော့ တစ်ပိုင်းပေါ့)

မုန်တိုင်းခိုဂေဟာ တွေကို မုန်တိုင်းဒီရေ လွှတ်တဲ့ ကုန်းတွေမှာ ဆောက်ရတယ်။

ရွာ လူဦးရေ အတွက် ခိုလုံဖို့ လုံလောက်တဲ့ ခိုင်ခန့်တဲ့အဆောက်အဦတွေ ရှိရမယ်။

သောက်ရေ နဲ့ စားစရာတွေ စီစဉ်ထားရတယ်။ သန့်ရှင်းရေးကိစ္စ အိမ်သာတွေ ရှိရတယ်။ လျှပ်စစ်မီးအတွက် မီးစက်တွေ စီစဉ်ထားရတယ်။

လူတစ်ယောက်ကို ၄၈ နာရီလောက် ခိုလုံခွင့်ပေးနိုင်ရင် သူ့အသက်ကို ကယ်လို့ရပြီ။

ဘင်္ဂလားဒေ့ရ်ှက အဲလိုမျိုး storm shelters တွေ နိုင်နိုင်ဆောက်ပေးထားနိုင်လို့ မုန်တိုင်းကြောင့် လူအသေအပျောက်နှုန်း အများကြီး လျှော့ချနိုင်တယ်တဲ့။

ကျွန်တော်တို့ဆီမှာ နာဂစ်ဖြစ်တော့ လူ တစ်သိန်းခွဲသေတာ အကယ်လို့ storm shelters တွေသာရှိခဲ့ရင် လူ ၃၀၀၀ တောင်မသေနိုင်ဘူးလို့ ပညာရှင်တွေ ရေးကြတယ်။ ရင်နာလိုက်တာ။

ဒါပေမဲ့
ဒါတွေကို နိုင်ငံတော်က လူတိုင်းစေ့ အတွက် မလုပ်ပေးနိုင်သေးဘူး။ ရွာသားတွေ ကိုယ်ထူကိုယ်ထ လုပ်နိုင်ဖို့ဆိုရင် ပိုဝေးသေးတယ်။ အများစုက ကိုယ့်တဲကုပ်လေးတောင်မှ ကိုယ်ကောင်းကောင်းလုပ်ဖို့ အနိုင်နိုင်ရယ်။

နိုင်ငံတကာ အလှူရှင်ဆိုတာလည်း လိုအပ်ချက် ပြည့်မီဖို့ မမျှော်နဲ့။ မြင်သာတဲ့နေရာမျိုးမှာ နည်းနည်းပါးပါး စံပြ ဟန်ပြလောက်ပဲရမှာ။

တစ်နိုင်ငံလုံးက တတ်နိုင်တဲ့သူတွေ ဝိုင်းဝန်း လှူဒါန်းကြမယ်ဆိုရင်ရော?

မြန်မာပြည်က လူအများစုက အလှူဆိုရင် ဘာသာရေး ဘက်နွယ်တဲ့ အလှူမျိုးဆို ပိုလှူချင်ကြတယ်။

အဲဒီတော့ storm shelters တွေကို ဘက်စုံသုံး ဒီဇိုင်းတွေဆွဲပြီး ဘာသာရေးနွယ်တဲ့ တခြားကိစ္စတွေသုံးနိုင် ဘယ်လိုနေမလဲ? အလှူရှင်တွေလည်း ပိုပြီး သဒ္ဓါတရားထက်သန် လာမလား?

ဘုန်းကြီးကျောင်း၊ ဓမ္မာရုံ၊ ဘုရားရှိခိုးကျောင်း ချာခ်ျကျောင်း ဗလီ စသဖြင့်။ အဲဒီရွာတွေမှာ နေထိုင်ကျတဲ့ လူတွေ ကိုးကွယ်တဲ့ ဘာသာအလိုက်ပေါ့။

တကယ် အရေးရယ်အကြောင်းရယ်ဆိုရင် လူ့အသက်ကယ်ဖို့ လူမျိုးဘာသာမရွေး လက်ခံကြမှာပါ။