” မြန်မာမွတ်စလင်သမိုင်း မရိုင်းခဲ့ပါ”

အောက်တိုဘာ ၂၇ ၊ ၂၀၁၆
ဂျက်ဖရီတင်အုန်း (ရန်ကုန်စက်မှု့တက္ကသိုလ် R.I.T ) ရေးသည်။

ကျနော်အခုပြောမယ့်အကြောင်းအရာတွေဟာ လျှာမှာအရိုးမရှိတိုင်း ပြောချင်ရာပြော၊ ဆိုချင်ရာဆို ပုံစံမျိုး မဟုတ်ပါဘူး။ အထောက်အထားမဲ့ မပြော၊  အထောက်အထားနဲ့ ပြောဆိုတာမျိုးတွေ ဖြစ်ပါမယ်။ Facebook လူမှုရေးကွန်ရက် သုံးစွဲသူတွေဟာ လူဦးရေသန်းပေါင်း (၁၇၀၀) ကျော် ဖြစ်နေပါပြီ။ အခြားလူမှုရေးကွန်ရက်တွေထက် များစွာအသုံး တည့် ခရီးရောက်နေပြီး “သုံးတက်လျှင်ဆေး၊ မသုံးတက်လျှင်ဘေး” ဆိုတာကို ကမ္ဘာ့အဆင်းရဲဆုံးနိုင်ငံ “အီသီယိုးပီးယား”  အောက် မသိမသာရောက် သွားတဲ့ မြန်မာနိုင်ငံက ပြည်သူလူထုတွေအတွက် အဓိက ပြောချင်ပါတယ်။ နှစ် ၅၀ ကျော် စစ်အာဏာရှင်တွေက မိမိ အာဏာတည်မြဲရေးအတွက် ဘာသာရေး၊ လူမှုရေးမှိုင်း၊ အဆိပ်မှိုင်းတွေကို စနစ်တကျ အကွက်ချစီမံပြီး လူမျိုးရေး ဘာသာရေး အဓိကရုဏ်းတွေကို ဖန်တီးခဲ့တယ်။ ပြီးတော့ ကယ်တင်ရှင်ကြီး လုပ်ပြခဲ့ကြတယ်။ မြန်မာပြည်ရဲ့ ကယ်တင်ရှင်ကြီးတွေ လုပ်ချင်ကြတယ်။

ယခုအချိန်အခါသည် မြန်မာပြည်ကြီးကို  အရှေ့တောင်အာရှမှစ၍ ကမ္ဘာနှင့်ယှဉ်၍ ရင်ဘောင် တန်းနိုင်စေရန် မြန်မာပြည်သူလူထုတစ်ရပ်လုံးမှာ တာဝန်ကိုယ်စီ ရှိကြ တာကို မမေ့ဖို့လိုပါသည်။ ကိုးကွယ်သည့် ဘာသာတရားကို အကြောင်းပြု၍ ခွဲခြား ဆက်ဆံ၊ နှိမ့်ချပြောဆိုသည့် ဓလေ့သည် ယနေ့ ၂၁ ရာစု IT (Information Technology) ခေတ်တွင် ခေတ်မစားတော့ပြီ။ သုံးစား၍ မရတော့သည့် မိစ္ဆာအယူအဆဖြစ်သည်။ “ကျားသေ” ကိုအသက်သွင်းဖို့ ကြိုးစားလျှင် “စိတ်ရောဂါဝေဒနာ ရှင်ပုံစံမျိုး” ဖြစ်ပေမည်။

အသက်သွေး၊ ချွေးများ၊ သစ္စာတရားများ၊ ယုံကြည်မှုများကို နှစ်ထောင်ချီ အချိန်က ပင် သမိုင်းမော်ကွန်းထိုး ခဲ့သော ပေးဆပ်ခဲ့သော မြန်မာမွတ်စလင်မ်( လူမျိုးစု) တွေ့ရဲ့ သမိုင်းသည် မည်၍၊ မည်မျှ လှပနေကြောင်း စာရေးသူ တင်ပြချင်ပါသည်။

(၁) ဗုဒ္ဓမြတ်စွာရဲ့ ဟောကြားခဲ့သော တရားရတနာကျမ်း ပိဋိကတ်သုံးပုံကို သထုံပြည် ကနေ ပုဂံသို့ရောက်အောင် ဦးဆောင်ခဲ့သူများထဲတွင် ကျန်စစ်သားမင်း၊ ငထွေးရူး၊  ငလုံးလဖယ်၊ ညောင်ဦးဖီးအပြင် အစ္စလာမ်ဘာသာဝင် “ဗျတ္တ” လည်းပါဝင်ခဲ့သည်  ကို သတိပြုမိသူ ရှားပါလိမ့်မည်။

(၂) ၁၉၄၈ခု ဇန်န၀ါရီလ(၄)ရက်နေ့တွင် မြန်မာနိုင်ငံ လွတ်လပ်ရေးရခြင်း၏အဓိက     အကြောင်းရင်းမှာ တောင်တန်းမြေပြန့်၊ တိုင်းရင်းသားစည်းလုံးညီညွတ်ရေးကြောင့်     ဖြစ်သည်။ တိုင်းရင်းသားများ၊ စည်းလုံးညီညွတ်သွားရခြင်း၏ နောက်ခံအကြောင်းရင်းသည် “ပင်လုံစာချုပ်” ကြောင့်ဖြစ်သည်။ ထိုပင်လုံစာချုပ်ကြီး အောင်မြင်စွာချုပ်ဆိုနိုင်ရန် အမျိုးသားခေါင်းဆောင်ကြီး ဗိုလ်ချုပ်အောင်ဆန်းအား အနီးကပ် ဆုံး အစစ၊ အရာရာ ကူညီပံ့ပိုးပေးခဲ့သူမှာ သံအမတ်ကြီး မြန်မာမွတ်စလင်  ဦးဖေခင် ဖြစ်သည်။

(၃) လွတ်လပ်ရေးအတွက် နယ်ချဲ့အင်္ဂလိပ်တို့နှင့် ဖက်ဆစ်ဂျပန်တို့အား တိုင်းရင်းသားများနှင့်အတူ ရရာလက်နက်စွဲကိုင်ကာ အသက်၊ သွေး စွန့်လွှတ်လှူဒါန်းခဲ့ကြသူတွေထဲမှာ မြန်မာမွတ်စလင်များ ပါဝင်ခဲ့ကြတာကို သမိုင်းသက်သေ၊ အခိုင်အမာ ရှိပါသည်။ သို့သော် ယနေ့တိုင်ပြည်နယ်ခွဲထွက်ရေး၊ လက်နက်ကိုင် တော်လှန်ရေးတို့ကို လုံးဝ၊ အလျဉ်း မလုပ်ခဲ့ကြတဲ့ သူတွေထဲမှာ မြန်မာမွတ်စလင်များ ပါဝင်ခဲ့ကြပါသည်။

(၄) ၂၀၁၅ခု နိုဝင်ဘာလ(၈)ရက် ပါတီစုံဒီမိုကရေစီရွေးကောက်ပွဲကြီးတွင် မွတ်စလင် အများစု နေထိုင်ရာမြို့နယ် များတွင် မွတ်စလင်ကိုယ်စားပြု ပါတီများဝင်ရောက် ယှဉ်ပြိုင်ခဲ့ကြပါသည်။ သို့သော် ဘာသာရေးနှင့် နိုင်ငံရေးကို ခွဲခြားသိမြင်ကြသော အဓိကနှင့် သာမညကိုဝေဖန် ပိုင်းခြားတက်သော မြန်မာ မွတ်စလင်များသည် ဒေါ်အောင်ဆန်းစုကြည် ဦးဆောင်သော အမျိုးသားဒီမိုကရေစီအဖွဲ့ချုပ် (NLD)ကို ပုံအောကာ မဲပေးခဲ့ကြပါသည်။

(၅) ၁၉၉၀ခု မေလရွေးကောက်ပွဲတွင် NLD ပါတီ အပြတ်အသတ်အနိုင်ရခဲ့သော် လည်း ထိုစဉ်က “နဝတ” စစ်အစိုးရသည် အနိုင်ရပါတီအား အာဏာမလွှဲပြောင်း ပေးလဲ လူထုခေါင်းဆောင် ဒေါ်အောင်ဆန်းစုကြည် အား နေအိမ်အကျယ်ချုပ်ထိန်းသိမ်းထားပြီး နိုင်ငံပိုင်သတင်းစာများ ရုပ်သံမီဒီယာများကနေ အမျိုးသား ဒီမိုကရေစီအဖွဲ့ချုပ်ပါတီနှင့် ဒေါ်အောင်ဆန်းစုကြည်အား ဂုဏ်သိက္ခာကျဆင်းစေသည့် ကာတွန်းများ၊ ဆောင်းပါးများ၊ ရုပ်မြင်သံကြားဇာတ်လမ်းများကို စစ်အာဏာရှင်များ အလိုကျ၊ ကြိုးဆွဲရာ ကခဲ့ကြတဲ့သူတွေထဲမှာ မြန်မာမွတ်စလင် လုံးဝ မပါဝင်ခဲ့ကြပေ။

(၆) လူထုခေါင်းဆောင် ဒေါ်အောင်ဆန်းစုကြည်နှင့် NLD ပါတီဝင်များကို တွေ့ရာ  သင်္ချိုင်း၊ ဓားမဆိုင်း “ဒီပဲယင်း” မဟာလူသတ်ပွဲကြီးမှာ အာဏာရှင် ပါးကွက်သား၊ ခါးပိုက်ဆောင်ကြေးစားလူမိုက်၊ စွမ်းအားရှင်တွေထဲမှာ မြန်မာမွတ်စလင်   များ လုံးဝ၊ လုံးဝမပါဝင်ခဲ့ကြပေ။

(၇) ၂၀၀၇ ခု ရွှေဝါရောင် အရေးအခင်းမှာ ပြည်သူ့ဘက်တော်သား၊ သံဃာတော်  အရှင်သူမြတ်များက၊ မေတ္တာသုတ်ရွတ်ဆိုပြီးမြို့အနှံ့စီတန်း၊ လှည့်လည်ဆန္ဒပြ ကြရာတွင် ဆန္ဒပြသံဃာတော်များအား ဖမ်းဆီး၊ ရိုက်နှက်၊ သတ်ဖြတ်ရုံတင်မက    ဂုဏ်သိက္ခာ ညိုးနွမ်းအောင် မြန်မာ့ရာဇဝင်သမိုင်း ရိုင်းခဲ့ကြတဲ့သူတွေထဲမှာ      မြန်မာမွတ်စလင်များ လုံးဝမပါခဲ့ကြပေ။

(၈) သမ္မတဟောင်း ဦးသိန်းစိန်အစိုးရလက်ထက်တွင် ကျေးဇူးရှင်တောင်သူဦးကြီးများ၏ လယ်ယာများကို အာဏာပိုင်များနှင့်ပေါင်းပြီး သူခိုးဈေးပေးပြီး မတရားသိမ်းယူသည့် ခရိုနီများတွင်လည်းကောင်း၊ ဆန္ဒပြ တောင်သူလယ်သမားများအား၊ မတရား၊ ဖမ်းဆီး၊ အရေးယူအပြစ်ပေးသည့် သူများထဲတွင် မြန်မာမွတ်စ လင်များ မပါဝင်ခဲ့ကြပေ။

(၉) သမ္မတ ဦးသိန်းစိန် အစိုးရလက်ထက် ကျောင်းသားအရေး ဆန္ဒပြနေကြသည့်  လူအုပ်ကြီးအား စွမ်းအားရှင်လူမိုက်များ အားကိုးပြီး လူဆိုး၊ သူခိုး၊ ရာဇဝတ်သားများ ပမာ၊ သဘောထားပြီး ရက်ရက်စက်စက် ဖမ်းဆီးနှိပ်ကွပ်သည့်သူများတွင်လည်းကောင်း၊ လက်ပံတောင်းတောင် အရေးအခင်းတွင် ဆန္ဒပြ၊ သပိတ်မှောက်၊ သံဃာတော်များအား မီးလောင်ဗုံးသုံးပြီး ချေမုန်းပစ်ခဲ့ကြတဲ့ နိုင်ငံခြားသား တရုတ်စီးပွားရေးကို ကာကွယ်ခဲ့ကြတဲ့ သူတွေထဲမှာ မြန်မာမွတ်စလင်တွေ မပါဝင်ခဲ့ကြပါဖူး။

(၁၀) မြန်မာမွတ်စလင်တွေဟာ ခေတ်ကာလ သမိုင်းတစ်လျှောက်မှာ အေးအတူ၊ ပူအမျှ၊ ငြိမ်းချမ်းစွာ အတူယှဉ်တွဲနေထိုင်လာကြတဲ့ ဗုဒ္ဓဘာသာဝင်တွေရဲ့  ဘုန်းကြီးကျောင်းတွေ စေတီပုထိုးတွေ၊ သိမ်တွေကို မဖျက်ဆီးခဲ့သလို အခြား မတူကွဲပြား ညီနောင်တွေရဲ့ ဘာသာရေးစာသင်ကျောင်းတွေ၊ ဘာသာရေး အဆောက်အဦးတွေကိုလည်း ဖျက်လို၊ ဖျက်ဆီး မလုပ်ခဲ့ကြပါ။

(၁၁) မြန်မာမွတ်စလင်တွေဟာ မြန်မာလူထုပိုင် မြေပေါ်၊ မြေအောက်၊ ရေပေါ် ရေအောက်၊ သယံဇာတ တွင်းထွက်များကို ကိုယ်ကျိုးအတွက်၊ လူတစ်စုအ တွက်၊ ပြည်ပသို့ ခိုးထုတ်ရောင်းချတဲ့ လိုင်စင်ရ သူခိုးတွေထဲမှာလည်း လုံးဝ  ပါဝင်ခြင်း မရှိပါ။

(၁၂) လူ့ကျင့်ဝတ် အမြင့်ဆုံးဂုဏ်ကို ထိခိုက်မယ့် ဘုရားမကြိုက် နတ်မကြိုက်တဲ့   အရက်ဆိုင်များ ဖွင့်ခြင်း၊ လောင်းကစားဝိုင်းများ ထောင်ခြင်း၊ KTV များ၊ Message အနှိပ်ခန်းများ၊ တရားမဝင်လိင်ဖျော်   ဖြေခန်းများဖွင့်၍ အမျိုးကောင်း၊ သားသမီးများကို ဖျက်ဆီးနေကြသူတွေထဲမှာ    မြန်မာမွတ်စလင်များ လုံးဝမပါပါ။

(၁၃) မြန်မာမွတ်စလင်များသည် “လက်လှုပ်မှ၊ ပါးစပ်လှုပ်ရသည့်” အခြေခံလူတန်း များနှင့် ပတ်သက်၍ ဂုတ်သွေးစုတ်၊ အမြတ်ထုတ်၊ စီးပွားရေးလုပ်ငန်းတစ်ခုဖြစ်သည့် “အတိုး၊ အညွှန့်” ပေးစားခြင်းလုပ်ငန်း၊ “အပေါင်ဆိုင်” လုပ်ငန်းများကို       ဘာသာတရားယုံကြည်ချက်အရ မလုပ်ဆောင်ကြပါ။ အထက်ပါ စီးပွားရေးလုပ်ငန်းများသည် “ရေနစ်သူကို၊ ဝါးကူလို့ပေးသည့် ပုံစံမျိုး” မဖြစ်ဘဲ “အတိုးနွံ့၊   အပေါင်နွံ့ထဲမှာ ရုန်းမထွက်နိုင်တော့ဘဲ ဘဝနိဂုံးချုပ်ရမည့် “လူနာမျက်ဖြူဆိုက် လေ၊ ဆရာကြိုက်လေ” စီးပွားရေးများဖြစ်သည်ဟု ယုံကြည်ထားကြသည်။

ယနေ့ကမ္ဘာ့ကုလသမဂ္ဂအဖွဲ့ဝင်နိုင်ငံပေါင်း ၁၉၇ နိုင်ငံတွင် ဘာသာစကားတစ်ခုပဲရှိသော၊ ရိုးရာအစဉ်အလာတစ်ခုတည်းရှိသော၊ လူမျိုးနွယ်တစ်ခုတည်းပဲရှိသော နိုင်ငံဆိုလို့ ကမ္ဘာပေါ်တွင် မရှိတော့ပြီ။

လူရှိလျှင်၊ လူ့အမျိုးအနွယ်ဟူ၍ ရှိစမြဲဖြစ်သည်။ ထိုလူမျိုးအနွယ်များမှ ဆင်းသက်သောသူများသည် လူ့ဂုဏ်သိက္ခာနှင့်ပြည့်စုံဖို့တော့ လိုပေလိမ့်မည်။ သမိုင်းကြောင်းအရရှိပြီးသော လူ့မျိုးနွယ်တစ်ခုကို အစဉ်အလာကောင်းခဲ့သော လူ့မျိုးနွယ်တစ်ခုကို အုပ်ချုပ် သူလူတစ်စုတစ်ဖွဲ့က အာဏာ ပါဝါကို သုံး၍ ကြိုးစားခဲ့ပါက “ရေပေါ်တွင် အရုပ်ရေးသည့်အလား” အရာထင်မည်မဟုတ်သလို၊ သမိုင်းတရားခံများသာ ဖြစ်သွားပေလိမ့်မည်။

ဘာသာပေါင်းစုံ၊ လူမျိုးပေါင်းစုံ၊ ယဉ်ကျေးမှုပေါင်းစုံ နေထိုင်သော မြန်မာနိုင်ငံတွင် မတူကွဲပြားဘာသာဝင်များအား၊ စာရေးသူကိုးကားပြောဆိုလိုသည်မှာ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် မိန့်ခွန်းလေးတစ်ခုပင်ဖြစ်သည်။ “ဒို့
ကြွေးကြော်နေတဲ့ ဒီမိုကရေစီဝါဒဆိုတာ ကိုယ့်အိမ်မှာ စိတ်ကြိုက်နေလို့ရတဲ့ ဝါဒမျိုးပေါ့။ ဒါပေမယ့် သူတစ်ပါးအိမ်ကိုတော့ ခဲနှင့်ထုခွင့်မရှိဖူး။ ခဲနှင့်ထုခွင့်ရှိတဲ့ဝါဒကတော့ ဒီမိုကရေစီဝါဒမဟုတ်ဖူး။ တိရိစ္ဆာန်ဝါဒသာဖြစ်တယ်” ဟူ၍ နိဂုံးချုပ်တင်ပြလိုက်ပါသည်။

ဂျက်ဖရီတင်အုန်း (ရန်ကုန်စက်မှု့တက္ကသိုလ် R.I.T )