ပြည်တွင်းစစ်ပွဲများ ရပ်တန့်ရန် ဘာသာပေါင်းစုံ ဆုတောင်းပွဲ လွိုင်ကော်တွင် ပြုလုပ်

နိုဝင်ဘာ ၄၊ ၂၀၁၆

နိုင်ငံတွင်း ပြည်တွင်းစစ်ပွဲများ ရပ်တန့်ရန်နှင့် ငြိမ်းချမ်းရေး ကို အမြန်ဆုံးဖော်ဆောင်နိုင်ရန် ဘာသာပေါင်းစုံ စုပေါင်း၍ ကယားပြည်နယ် လွိုင်ကော်မြို့ ကျောက်တိုင်ကွင်းတွင် နိုဝင်ဘာလ (၃)ရက်နေ့ ညနေက ဆုတောင်းပွဲ ကျင်းပသည်။

ပြည်နယ်များတွင် ဖြစ်ပေါ်နေသည့် တိုက်ပွဲများကို လူထုက အလိုမရှိသဖြင့် စစ်ပွဲတွင်ပါဝင်သူအားလုံး တိုက်ပွဲများ အပြီးသတ် ရပ်ဆိုင်းပေးရန် စုပေါင်းတောင်းဆိုကြခြင်းဖြစ်သည်ဟု သိရသည်။

“စစ်ပွဲတွေထဲမှာ ဆင်းရဲဒုက္ခခံနေရတဲ့ ပြည်သူလူထုအတွက် ကယားပြည်နယ်က လူထုတွေက စုပေါင်း ဆုတောင်းပွဲလေးတစ်ခု ပြုလုပ်တာပါ။ ကျွန်မတို့ ဆုတောင်းသံတွေကို စစ်ဖက်ဆိုင်ရာတွေကကြားမယ်။ ပြီးတော့ ဒီလိုတောင်းဆိုမှုတွေကြောင့် စစ်ပွဲတွေ ရပ်တန့်ပေးမယ်လို့လည်း ယုံကြည်တယ်။ သူတို့ကလည်း လူဆိုးတွေ မဟုတ်ကြဘူးလို့ ယုံကြည်တယ်။ နားလည်မှုရှိရှိနဲ့ နှစ်ဖက်စလုံး လူထုတွေ လိုအပ်နေတဲ့ ငြိမ်းချမ်းသောလမ်း ပေါ်လာနိုင်လိမ့်မယ်လို့ ယုံကြည်ပါတယ် “ဟု ဦးဆောင်ပါဝင်သူ တစ်ဦးဖြစ်သည့် မအေးအေးအောင်က ပြောသည်။

အဆိုပါ ဆုတောင်းပွဲတွင် ဗုဒ္ဓဘာသာ၊ ကက်သလစ်ဘာသာ၊ အစ္စလာမ်ဘာသာ၊ နှစ်ခြင်း အသင်းတော်များ၊ အင်္ဂလီကန် စသည့် ဘာသာပေါင်းစုံမှ ဘာသာရေး ခေါင်းဆောင်များ၊ ဘာသာဝင်များ စုပေါင်းပါဝင်ခဲ့ပြီး ငြိမ်းချမ်းရေးစာတမ်းများဖတ်ခြင်း၊ သုံးမိနစ်ငြိမ်သက်ခြင်း၊ ငြိမ်းချမ်းရေးသီချင်းများသီဆိုခြင်းနှင့် ဖယောင်တိုင်ထွန်း၍ ဆုတောင်းခြင်းများ ပြုလုပ်ကြသည်။

သတင်း/ဓာတ်ပုံ – ဆန်းဖြိုးထွန်း
တာချီလိတ်မီဒီယာမှ ကူးယူဖော်ပြပါသည်။

http://www.tachileik.net/2016/11/peace.html