အမေရိကန်မှ လက်နက်ဝယ်ယူမှုကို ဖိလစ်ပိုင်သမ္မတ ဖျက်သိမ်း

နိုဝင်ဘာ ၈၊ ၂၀၁၆
M-Media

– ဖိလစ်ပိုင်သမ္မတ ရော်ဒရီဂို ဒူတာတေးသည် အမေရိကန်ပြည်ထောင်စုထံမှ ဖိလစ်ပိုင်ရဲတပ်ဖွဲ့အတွက် ရိုင်ဖယ်သေနတ်များ ၀ယ်ယူမှုကို ဖျက်သိမ်းရန် ညွှန်ကြားလိုက်ပြီး ဈေးပိုသက်သာသည့် အခြားနေရာတစ်ခုကို ရှာဖွေသွားမည်ဟု ပြောကြားခဲ့သည်။

“ပိုဈေးသက်သာပြီးတော့ ရေရှည်လက်တွဲလုပ်လို့ရမယ့် နောက်ထပ် ရင်းမြစ်တစ်ခုကို ရှာဖွေသွားမှာပါ” ဟု ဒူတာတေးက ယမန်နေ့တွင် ရုပ်သံမိန့်ခွန်းမှတစ်ဆင့် ပြောကြားခဲ့သည်။

မူးယစ်တိုက်ဖျက်ရေးဆောင်ရွက်မှုတွင် လူ့အခွင့်အရေးချိုးဖောက်မှုများ ရှိသည့်အတွက် လွှတ်တော်နိုင်ငံခြားရေးကော်မတီ၏ ထိပ်တန်းဒီမိုကရက်တစ် အထက်လွှတ်တော်အမတ် ဘင်ကာဒင်က ဖိလစ်ပိုင်ရဲတပ်ဖွဲ့ထံ ရိုင်ဖယ် ၂၆၀၀၀ ရောင်းချမည့်အစီအစဉ်အား ကန့်ကွက်ခဲ့သဖြင့် အမေရိကန်အနေဖြင့် အဆိုပါအစီအစဉ်အား ရပ်ဆိုင်းခဲ့သည်ဟု အမေရိကန်အစိုးရ တာဝန်ရှိသူများက ပြီးခဲ့သည့်လတွင် ပြောကြားခဲ့သည်။

အမေရိကန်နှင့် ဖိလစ်ပိုင် နှစ်နိုင်ငံဆက်ဆံရေးမှာ ကာလအတော်ကြာ ကောင်းမွန်ခဲ့သော်လည်း အမေရိကန်က ဖိလစ်ပိုင်၏ မူးယစ်နှိမ်နှင်းမှုများအပေါ် ဝေဖန်ခဲ့သည့်အတွက် သမ္မတ ဒူတာတေးက ဒေါသတကြီး တုံ့ပြန်ပြောဆိုခဲ့ရာမှ ဆက်ဆံရေး ပျက်ယွင်းခဲ့ရသည်။

ဒူတာတေးက အမေရိကန်အနေဖြင့် မိမိတို့အား လက်နက်မရောင်းသော်လည်း မိမိတို့အနေဖြင့် ရုရှားနှင့် တရုတ်တို့ထံမှ
ဝယ်ယူ၍ရသည်ဟုလည်း ယခင်က ပြောကြားခဲ့ဖူးသည်။ အောက်တိုဘာကလည်း မိမိတို့အနေဖြင့် အမေရိကန်နှင့် စီးပွားရေး စစ်ရေးကိစ္စများတွင် ထပ်မံ ဆက်ဆံသွားမည်မဟုတ်ဘဲ ဖိလစ်ပိုင်နိုင်ငံအတွင်း အမေရိကန်စစ်သားများ ထွက်သွားရန်လည်း တောင်းဆိုခဲ့သည်။

Ref : Presstv