မြန်မာ-ဘင်္ဂလားဒေ့ရှ် စီးပွားရေးပူးပေါင်းဆောင်ရွက်မှု တိုးမြှင့်မည်

နိုဝင်ဘာ ၁၄၊ ၂၀၁၆
M-Media

– မိမိတို့နှစ်နိုင်ငံမှာ စီးပွားရေး ပူးပေါင်းဆောင်ရွက်မှုအတွက် အခွင့်အအလမ်းများကို ရှာဖွေသွားမည်ဟု ဘင်္ဂလားဒေ့ရ်ှနှင့် မြန်မာနိုင်ငံမှ အစိုးရတာဝန်ရှိသူများက ပြောကြားလိုက်သည်။

“နှစ်နိုင်ငံ အချိုးညီ စီးပွားရေး ဆက်ဆံမှုကနေပြီး ဘင်္ဂလာဒေ့ရ်ှနဲ့ မြန်မာနိုင်ငံတို့ဟာ ဘယ်လို ၀န်ထုတ်ဝန်ပိုးမှ ခံစားရမှာ မဟုတ်ပါဘူး။ ကျွန်တော်တို့ နှစ်နိုင်ငံဟာ တူညီတဲ့ စီးပွားရေး စိန်ခေါ်မှုတွေ ရှိနေပြီး စီးပွားရေးဆိုင်ရာကိစ္စ မြောက်များစွာမှာ ပူးပေါင်းဆောင်ရွက်တဲ့ ရှည်လျားတဲ့ သမိုင်းကြောင်းလည်း ရှိပါတယ်” ဟု ဘင်္ဂလားဒေ့ရှ်-မြန်မာ စီးပွားရေး တိုးမြှင့်မှုကောင်စီ (BMBPC) မှ ဥက္ကဌဖြစ်သူ ဆယဒ် မဟ်မူဒူလ် ဟက်က ပြောကြားခဲ့သည်။

ပြီးခဲ့သည့် ကြာသာပတေးနေ့က မြန်မာနိုင်ငံမှ ကိုယ်စားလှယ်အဖွဲ့အား ဒါကာမြို့၌ BMBPC က လက်ခံတွေ့ဆုံစဉ် ဟက်က ထိုကဲ့သို့ ပြေကြားခဲ့ခြင်းဖြစ်သည်။

အဆိုပါ မြန်မာကိုယ်စားလှယ်အဖွဲ့ကို မြန်မာ ကုန်သွယ်ရေးဝန်ကြီးဌာနမှ အမြဲတမ်းအတွင်းဝန် ဦးတိုးအောင်မြင့်က ဦးဆောင်ခဲ့ခြင်းဖြစ်ပြီး ၂ ရက်ကြာ ပြုလုပ်မည့် ‘၈ ကြိမ်မြောက် ဘင်္ဂလားဒေ့ရှ်-မြန်မာ ပူးတွဲကုန်သွယ်ရေးကော်မရှင် အစည်းအဝေး’ ကို တက်ရောက်ရန် လာရောက်ခဲ့ခြင်းဖြစ်သည်။

ဟက်ကမူ မိမိတို့နှစ်နိုင်ငံမှာ အိမ်နီးချင်းသာမကဘဲ အကျိုးစီးပွားနှင့် သယံဇာတများကို မျှဝေထားသည့် နိုင်ငံလည်းဖြစ်ကြောင်း၊ မိမိတို့နှစ်နိုင်ငံအကြားတွင် လယ်ယာစိုက်ပျိုးရေး၊ စွမ်းအင်နှင့် ဘဏ်လုပ်ငန်းအပါအ၀င် ၀န်ဆောင်မှုလုပ်ငန်းများအကြား အလွန်ကြီးမားသည့် ပူးပေါင်းဆောင်ရွက်ရေးနယ်ပယ် ရှိကြောင်း ထည့်သွင်းပြောဆိုခဲ့သည်။

ဦးတိုအောင်မြင့်ကမူ မိမိတို့အနေဖြင့် နှစ်နိုင်ငံအကြား စီးပွားရေးဆက်ဆံမှု တိုးမြှင့်ရန်အတွက် အစွမ်းကုန် ဆောင်ရွက်သွားမည်ဖြစ်ကြောင်း ပြောကြားခဲ့သည်။

BMBPC မှာ ကော့ဇ်ဘဇားနှင့် ဘန်ဒါဘန်ခရိုင်များတွင် အထူးစီးပွားရေးဇုန်များ ဆောင်ရွက်ရန် အဆိုပြုထားပြီး၊ ဇွန်လကလည်း ဘင်္ဂလားဒေ့ရှ် ပုဇွန်ဖောင်ဒေးရှင်းနှင့် မြန်မာ့ပုဇွန်အသင်းတို့က နှစ်နိုင်ငံ ပုဇွန်စီးပွားရေးကဏ္ဍတွင် အတူတကွဆောင်ရွက်ရန်၊ နည်းပညာသစ်များ ပေါင်းစပ်အသုံးပြုရန် နားလည်မှုစာချွန်လွှာကို လက်မှတ်ရေးထိုးခဲ့ကြသည်။

Ref: dhakatribune