ဘာသာပေါင်းစုံ စည်းလုံးညီညွတ်ခြင်း ဖော်ညွှန်းနေသည့် နိဗ္ဗာန်ဈေးပွဲတော်လေး

နိုဝင်ဘာ ၁၅ ၊ ၂၀၁၆
M-Media
ဂျက်ဖရီတင်အုန်း(ရန်ကုန်စက်မှု့တက္ကသိုလ်R.I.T) ရေးသည်။

“စည်းလုံးခြင်းသည် ခွန်အား၊ ညီညွတ်ခြင်းသည် အင်အား”ဆိုသည့် ပြယုဂ်ကို မတူကွဲပြားဘာသာဝင်တို့ စုပေါင်းပြုလုပ်ကြသည့် စတုထ္တအကြိမ်မြောက် ကျင်းပပြုလုပ်ခဲ့တဲ့ နိဗ္ဗာန်ဈေးပွဲလေးကြောင်း စာရေးသူတင်ပြချင်ပါတယ်။

နိဗ္ဗာန်ဈေးပွဲကို နိုဝင်ဘာလ ၁၅ရက် အင်္ဂါနေ့က  (ခ)ရပ်ကွက် သင်္ကန်းကျွန်းမြို့နယ် ရန်ကုန်တိုင်းဒေသကြီးတွင် ကျင်းပပြုလုပ် ခဲ့ခြင်းဖြစ်သည်။

ထိုရပ်ကွက်လေးကို လွတ်လပ်ရေး ရပြီးချိန်မှ စ၍ ဖဆပလ အစိုးရခေတ်အထိ “မြို့မ “ရပ်ကွက်လေး ဟု လူသိများခဲ့ကြပါသည်။

သင်္ဃန်းကျွန်းဘူတာ နံဘေးတွင် တည်ရှိပါသည်။  မြန်မာ့ဆိုရှယ်လစ်လမ်းစဉ်ပါတီခေတ်(မဆလ)ခေတ်နောက်ပိုင်းကျမှ  (ခ) ရပ်ကွက်ဟူ၍ ဖြစ်လာပါသည်။

ထိုရပ်ကွက်တွင် ဗုဒ္ဓဘာသာဦးရေ၊ ဟိန္ဒူဘာသာဦးရေ နှင့် ခရစ်ယာန်ဘာသာဦးရေမှာ ၃၀ ရာခိုင်နှုန်းလောက်ရှိပြီး အစ္စလာမ်ဘာသာဝင်ဦးရေမှာ ၇၀ ရာခိုင်နှုန်းခန့်ရှိပါသည်။

ပို၍ ထူးခြားသည်မှာ ထိုရပ်ကွက်လေးတစ်ခုတွင်ပင် ဗုဒ္ဓဘာသာ ဓမ္မာရုံတစ်ခု၊   ဟိန္ဒူဘုရားကျောင်း Temple တစ်ခု၊ ခရစ်ယာန်ဘာသာဝင်တို့၏ Roman Catholic Saint. Josep Church နှင့်Baptist Church တစ်ခုစီ အပြင်၊ ၁၉၃၆ ခုနှစ်က တည်ဆောက်ခဲ့သော အစ္စလာမ်ဘာသာဝင်တို့၏  ဗလီတစ်လုံးလည်း ရှိနေပါသည်။

ထိုရပ်ကွက်သည်  ဗြိတိသျှကိုလိုနီခေတ်ကတည်းက တည်ရှိခဲ့ပါသည်။ သင်္ဃန်းကျွန်းမြို့စတည်ကတည်းက မူလတည်ရှိခဲ့သော ရပ်ကွက်ဖြစ်ပြီး သင်္ဃန်းကျွန်းဘူတာရုံ နှင့် အလွန်နီးကပ်၍ ရပ်ကွက်နေပြည်သူများ ရန်ကုန်မြို့သို့ရထားဖြင့်သွားရာတွင် အလွန် လွယ်ကူလှပါသည် အဆင်ပြေလှပါသည်။

ဘာသာလူမျိုးမခွဲခြားဘဲ ငြိမ်းချမ်းစွာအတူယှဉ်တွဲနေထိုင်ရေးမူကို အဓွန့်ရှည်တည်တံ့စေလိုတဲ့အတွက် အခုလို   နိဗ္ဗာန်ဈေးပွဲတော်ကို စည်ကားသိုက်မြိုက်စွာ နှစ်စဉ် ကျင်းပနေပုံကို သွားရောက်လေ့လာခဲ့ပါသည်။

(ခ)ရပ်ကွက်ရှိ ဓမ္မာရုံလူငယ်များ အဖွဲ့  (ခ) ရပ်ကွက် အုပ်ချုပ်ရေးမှူးနှင့်အဖွဲ့တို့ဦးစီးကာ ရပ်ကွက်အတွင်းရှိ မတူကွဲပြား ဘာသာဝင်များပူးပေါင်းပါဝင်အားဖြည့်စုစည်းကာ ရပ်ကွက် နိဗ္ဗာန်ဈေးပွဲတော်ကို ကျင်းပါနေတာကို တွေ့ရှိခဲ့ရသည်။

နိဗ္ဗာန်ဈေးပွဲတော် ဟု ဆိုသော်လည်း  မည်သည့် စားစရာ သောက်စရာ များ စတီးခွက်စသည့် အိမ်သုံးပစ္စည်း စသည်တို့ကို ငွေပေးစရာ မလိုဘဲ  ရပ်ကွက်နေ ပြည်သူလူထုအား  အခမဲ့ ဝေငှထားသော ကတ်ပြားလေးများအား ပြ၍ ရယူနိုင်ပါသည်။

ထိုကတ်ပြားလေးများအား ရပ်ကွက် အုပ်ချုပ်ရေးမှူးးရုံးတာဝန်ရှိသူများနှင့် ရပ်ကွက် ဓမ္မာရုံတာဝန်ခံများမှ ရပ်ကွက်နေပြည်သူများအား အဓိကဦးစားပေးကာ တစ်အိမ်ထောင်လျှင် ကပ်ပြား ၃ ခုခန့်ကို  ဝေငှထားတာကို တွေ့ရှိရသည်။

ညနေ ၄နာရီခွဲခန့်အချိန်တွင် နိဗ္ဗာန်ဈေးပွဲတော်ကို ဖွင့်လှစ်ပြီး လူမျိုးဘာသာမရွေး စာသုံးနိုင်ရန် ကြက်ဥ ဘဲဥ ငါးခြောက် ဟင်းများနှင့် ညစာ ထမင်းဟင်းများကိုလည်း   ဓမ္မာရုံမဏ္ဍပ်တွင်ကျွေးမွေးနေကြောင်း တွေ့ခဲ့ရပါသည်။

စာရေးသူအနေဖြင့် ထိုရပ်ကွက် နိဗ္ဗာန်ဈေးပွဲတော်လေးကို မြင်တွေ့ရသည်မှာ  အတိုင်းမသိဝမ်းသာပီတိဖြစ်ခဲ့ရပါသည်။

အကြောင်းမှာ ရပ်ကွက်နေ လူဦးရေ အများစုမှာ အစ္စလမ်ဘာသာဝင်များသည် ဘာသာရေးအယူမသည်း၊ အမြင်မကျဉ်းဘဲ ထိုနိဗ္ဗာန်ဈေး ပွဲတော်လေးတွင် ပါဝင် ဆင်နွှဲနေကြသည်ကို တွေ့မြင်ရ၍ အထူး မှတ်တမ်းတင်မိပါသည်။

ဂျက်ဖရီတင်အုန်း(ရန်ကုန်စက်မှု့တက္ကသိုလ်R.I.T)