အစ္စလာမ့်နည်းကျဘဏ်လုပ်ငန်း အိန္ဒိယတွင် စတင်မိတ်ဆက်မည်

နိုဝင်ဘာ ၂၁၊ ၂၀၁၆
M-Media

လန်ဒန်ရှိ အစ္စလာမ့်ဘဏ်တစ်ခု

– နိုင်ငံအတွင်း ရရှီအာနည်းကျ ဘဏ်လုပ်ငန်းကို တဖြည်းဖြည်း စတင်မိတ်ဆက်နိုင်ရန်အတွက် ဘဏ်များတွင် ‘အစ္စလာမ့် ဘဏ္ဍာရေးဝန်ဆောင်မှုကောင်တာ’ ထားပေးရန် အိန္ဒိယဗဟိုဘဏ် (RBI) က အမိန့်ထုတ်ပြန်လိုက်သည်ဟု သိရသည်။

ဘာသာရေးတားမြစ်ချက်ကြောင့် လက်ရှိ ဘဏ်လုပ်ငန်းတွင် မပါဝင်နိုင်သည့် နိုင်ငံအတွင်းရှိ လူ့အဖွဲ့အစည်း တစ်ချို့အတွက် ဘဏ္ဍာရေးလုပ်ငန်းများ ဆောင်ရွက်နိုင်ရေး အစ္စလာမ့်နည်းကျ ဘဏ်လုပ်ငန်းကို မိတ်ဆက်ပေးနိုင်ရန် အိန္ဒိယမှာ ဖြစ်နိုင်ခြေရှိသည့် နည်းလမ်းများကို ရှာဖွေခဲ့ပြီးနောက် ယခုကဲ့သို့ စတင်ကျင့်သုံးခြင်းလည်းဖြစ်သည်။

“ကျွန်တော်တို့ စဉ်းစားထားတဲ့ သဘောတရားက- အစ္စလာမ့်နည်းကျ ဘဏ္ဍာရေးလုပ်ငန်းရဲ့ နက်နဲမှု၊ စည်းမျဉ်းစည်းကမ်းပိုင်းဆိုင်ရာနဲ့ ကြီးကြပ်ရေးဆိုင်ရာ စိန်ခေါ်မှုတွေ ရှိနေပြီး အိန္ဒိယဘဏ်တွေကလည်း ဒီနယ်ပယ်မှာ အတွေ့အကြုံမရှိတာကြောင့် အိန္ဒိယမှာ အစ္စလာမ့်နည်းကျ ဘဏ်လုပ်ငန်းကို ဖြည်းဖြည်းခြင်း ကျင့်သုံးသွားမှာပါ” ဟု RBI က ဘဏ္ဍာရေးဝန်ကြီးထံသို့ ပေးပို့ခဲ့သည့် စာတွင် ဖော်ပြထားသည်။

ကနဦးအနေဖြင့် သာမန်ဘဏ်လုပ်ငန်းစဉ်များနှင့် ဆင်တူသည့် အစ္စလာမ့်ဘဏ်လုပ်ငန်းစဉ်များကို ‘အစ္စလာမ့်ဘဏ္ဍရေး ၀န်ဆောင်မှုကောင်တာ’ မှတစ်ဆင့် မိတ်ဆက်သွားမည်ဖြစ်ပြီး၊ အချိန်အတိုင်းအတာတစ်ခုကြာသည့်အခါတွင် အစ္စလာမ့်ဘဏ်လုပ်ငန်းကို အပြည့်အ၀ လည်ပတ်နိုင်အောင် ပြုလုပ်သွားမည်ဟုလည်း ထိုစာတွင် ဖော်ပြထားသည်။

အစ္စလာမ့်နည်းကျဘဏ်လုပ်ငန်း သို့မဟုတ် ရှရီအာဘဏ်လုပ်ငန်းမှာ အတိုးမယူ၊ မပေးသည့် စည်းကမ်းအပေါ် အခြခံသည်။ အတိုးစားခြင်းကို အစ္စလာမ်က တားမြစ်ထားသည်။

အစ္စလာမ့်ဘဏ္ဍာရေးလုပ်ငန်း စတင်ကျင့်သုံးရန်အတွက် ဗဟိုဘဏ်၏ ထိုအဆိုပြုချက်မှာ ဥပဒေကြောင်းအရ၊ နည်းစနစ်ပိုင်းအရနှင့် စည်းမျဉ်းစည်းကမ်းပိုင်းအရ လေ့လာဆန်းစစ်မှုကို အခြေခံထားခြင်ဖြစ်းဖြစ်သည်။

RBI မှာ နည်းစနစ်ပိုင်းဆိုင်ရာ ဆန်းစစ်မှု အစီရင်ခံစာတစ်စောင်ကိုလည်း ရေးသားခဲ့ပြီး ဘဏ္ဍာရေးဝန်ကြီးဌာနသို့ ပေးပို့ခဲ့သည်။

Ref: outlookindia