နေတိုး၏ တပ်ဖြန့်မှုကို ရုရှားက နျူထိပ်ဖူးတပ် ဒုံးစနစ်နှင့် တုန့်ပြန်

နိုဝင်ဘာ ၂၂၊ ၂၀၁၆
M-Media

– နေတိုးအဖွဲ့က ဥရောပအရှေ့ပိုင်းတွင် ‘ကာကွယ်ရေးတံတိုင်း’ ဟုခေါ်သည့် ဒုံးကျည်များ၊ ဒုံးခွင်းစနစ်များ ချထားခြင်းကို တုန့်ပြန်သည့်အနေဖြင့် ပိုလန်နှင့် လစ်သူယေးနီးယားအကြားရှိ ကလီနင်ဂရဒ်တွင် S-400 လေကြောင်းရန် ကာကွယ်ရေးစနစ်နှင့် နျူထိပ်ဖူးတပ်ဆင်နိုင်သည့် အစ္စကန်ဒါ ဒုံးကျည်စနစ်ကို ချထားရန် ရုရှားက စီစဉ်နေသည်။

ထိုကဲ့သို့ ချထားမည့်အစီအစဉ်ကို ရုရှား အထက်လွှတ်တော်ရှိ ဖက်ဒရေးရှင်းကောင်စီမှ ကာကွယ်ရေးကော်မတီအကြီးအကဲ ဗစ်တာ အိုဇီရော့ဗ်က RIA သတင်းဌာနသို့ ယမန်နေ့က ပြောကြားခဲ့ခြင်းဖြစ်သည်။

“ဒီခြိမ်းခြောက်မှုကို တုန့်ပြန်ဖို့အတွက် ကျွန်တော်တို့ဟာ တပ်တွေ ထပ်ချပြီး တုန့်ပြန်သွားမှာပါ။ ဒီစစ်ကူပို့လွှတ်မှုမှာ S-400 နဲ့ အစ္စကန်ဒါစနစ်တွေကို ကလီနင်ဂရဒ်မှာ ချထားမှုလည်း ပါဝင်မှာဖြစ်ပါတယ်”

အမေရိကန်ဦးဆောင်သည့် နေတိုးအဖွဲ့၏ အဆိုပါ ကာကွယ်ရေးတံတိုင်းမှာ စစ်ပွဲဖြစ်လာပါက အမေရိကန်သုို့ ရောက်ရှိနိုင်သည့် ရုရှား၏ နျူလက်နက်စွမ်းအားကို ဟန့်တားရန် ရည်ရွယ်ခြင်းဖြစ်သည်ဟု ရုရှားက ပြောကြားထားသည်။

Ref: Aljazeera