ထရမ့်နိုင်ခဲ့သည့် ၀စ်ကွန်ဆင်ပြည်နယ်မှ မဲကို ပြန်ရေမည်

နိုဝင်ဘာ ၂၅၊ ၂၀၁၆
M-Media

– ယခုလအစောပိုင်းက ပြုလုပ်ခဲ့သည့် ရွေးကောက်ပွဲတွင် ဒေါ်နယ်ထရမ့်က ပွတ်ကာသီကာ အနိုင်ရခဲ့သည့် ၀စ်ကွန်ဆင်ပြည်နယ်မှ မဲများကို ပြန်ရေရန် တောင်းဆိုမှုကို ရရှိခဲ့သည်ဟု ပြည်နယ်ရွေးကောက်ပွဲကော်မရှင်က ပြောကြားလိုက်သည်။

အဆိုပါ တောင်းဆိုမှုကို Green ပါတီမှ သမ္မတလောင်း ဂျီလ် စတိုင်းက ပြုလုပ်ခဲ့ခြင်းဖြစ်ပြီး မီးချီဂန်နှင့် ပင်ဆဲလ်ဗားနီးယားတို့တွင်လည်း ပြန်ရေရန်လည်း ပါဝင်သည်။

ဝစ်ကွန်ဆင်၌ ယခု ပြန်လည်ရေတွက်မှုတွင် ဟီလာရီကလင်တန် အနိုင်ရရှိပါက ထရမ့်၏ အနိုင်ရလဒ်ကို မပြောင်းလဲနိုင်သော်လည်း မီချီဂန်နှင့် ပင်ဆဲလ်ဗားနီးယားတို့တွင်ပါ အနိုင်ရရှိလျှင် ရလဒ်ကို ပြောင်းလဲနိုင်မည်ဖြစ်သည်။

ရွေးကောက်ပွဲကော်မရှင်ကမူ ဒေါက်တာ စတိုင်နှင့် ဒဲလ် လာ ဖွန်တီတို့က မဲပြန်ရေရန် တောင်းဆိုခဲ့ခြင်းဖြစ်သည်ဟု Twitter စာမျက်နှာတွင် ရေးသားခဲ့ပြီး အသေးစိတ်ကို မကြာမီ ထုတ်ပြန်သွားမည်ဟု ဆိုသည်။

ဒေါက်တာစတိုင်ကလည်း လာမည့်သီတင်းပတ်တွင် မဲပြန်လည်ရေတွက်မှု စတင်သွားမည်ဖြစ်ပြီး သောကြာနေ့ကို နောက်ဆုံးရက် သတ်မှတ်ပေးထားသည်ဟု ဆိုသည်။ သို့သော်လည်း ပြည်နယ် ၃ ခုစလုံးတွင် မဲပြန်ရေမှုအတွက် ဒေါ်လာသန်းချီ ကုန်ကျစားရိတ် ရှိနိုင်ပြီး ဒေါက်တာစတိုင်၏ ရွေးကောက်ပွဲမဲဆွယ်ရေးအဖွဲ့က ကျခံရမည်ဖြစ်သည်။

Ref: BBC