ဂျကာတာရှိ မြန်မာသံရုံးဗုံးခွဲရန် ကြံစည်သူကို အင်ဒိုဖမ်းဆီး

နိုဝင်ဘာ ၂၆၊ ၂၀၁၆
M-Media

– လာမည့်လတွင် အစိုးရအဆောက်အအုံများနှင့် ဂျကာတာရှိ မြန်မာသံရုံးတို့အား တိုက်ခိုက်ရန် ကြံစည်နေသည့် စစ်သွေးကြွတစ်ဦးကို အင်ဒိုနီးရှားရဲတပ်ဖွဲ့က ဖမ်းဆီးလိုက်ပြီး ဗုံးလုပ်ရာတွင် အသုံးပြုသည့် ပစ္စည်းအများအပြားကိုလည်း သိမ်းယူရရှိခဲ့သည်ဟု ရဲတပ်ဖွဲ့ ပြောရေးဆိုခွင့်ရှိသူတစ်ဦးက ယနေ့တွင် ပြောကြားလိုက်သည်။

ဖမ်းဆီးရမိသူမှာ အသက် ၂၃ နှစ်အရွယ်ရှိ ရီယို ပရီယက်တနာ ၀ီဘာဝါဆိုသူဖြစ်ပြီး IS အား ထောက်ခံသည့် အင်ဒိုနီးရှား အဖွဲ့တစ်ခုမှ အဖွဲ့ဝင်တစ်ဦးလည်း ဖြစ်သည်။

ဒေသတွင်း မီဒီယာများကမူ ၎င်းနှင့်အတူ ဖမ်းဆီးရမိခဲ့သည့် ဖောက်ခွဲရေးပစ္စည်းများမှာ ၂၀၀၂ နှစ်က လူ ၂၀၂ ဦး သေဆုံးခဲ့သည့် ဘာလီနိုက်ကလပ် ဗုံးဖောက်ခွဲမှုတွင် အသုံးပြုခဲ့သည့် ဗုံးထက် ပြင်းအား ၂ ဆပိုသည်ဟု ဖော်ပြခဲ့သည်။

စိုက်ပျိုးရေးတက္ကသိုလ်တွင် တက်ရောက်ပညာသင်ကြားခဲ့သည့် ၀ီဘာဝါမှာ လက်ရှိတွင် အလုပ်လက်မဲ့ဖြစ်နေပြီး ဗုံးဖောက်ခွဲမှုကို ကိုယ်တိုင်လေ့လာထားသူဖြစ်ကာ အင်ဒိုနီးရှားနိုင်ငံတစ်ဝှမ်းရှိ နေရာတော်တော်များများသို့ ဖောက်ခွဲရေးပစ္စည်းများ ဖြန့်ဖြူးရန် စီစဉ်ခဲ့သူဖြစ်သည်ဟု ရဲတပ်ဖွဲ့ ပြောရေးဆိုခွင့်ရှိသူ ဘွိုင် ရက်ဖ်လီ အေမာရ်က ယနေ့တွင် ပြောကြားခဲ့သည်။

ယခုနှစ်အတွင်း IS မှာ အင်ဒိုနီးရှားတွင် ဖောက်ခွဲမှုများ ပြုလုပ်ခဲ့ပြီး ထိုအထဲမှ အကြီးဆုံးမှာ ဇန်န၀ါရီလက ဂျကာတာတွင် ပြုလုပ်ခဲ့သည့် ဖောက်ခွဲမှုဖြစ်ကာ လူ ၄ ဦး သေဆုံးခဲ့သည်။

မြန်မာနိုင်ငံတွင် ရိုဟင်ဂျာမွတ်စလင်များအပေါ် ဖိနှိပ်မှုများကြောင့် အရှေ့တောင်အာရှအတွင်းရှိ မွတ်စလင်အများစုရှိရာ နိုင်ငံများတွင် ဒေါသထွက်မှုများ မြင့်တက်လာပြီး ဂျကာတာအပါအ၀င် မြို့ကြီးများတွင် ဆန္ဒပြမှုများ ဖြစ်ပွားသည်အထိ ဦးတည်လာခဲ့သည်။

Ref: Channelnewsasia