အမေရိကန်ကို အန်တုခဲ့သူ ကျူးဘားခေါင်းဆောင်ဟောင်း ဖီဒဲလ်ကက်စထရို ကွယ်လွန်

နိုဝင်ဘာ ၂၆၊ ၂၀၁၆
M-Media

– ကျူးဘား တော်လှန်ရေးခေါင်းဆောင်ဖြစ်ပြီး အမေရိကန် သမ္မတ ၁၁ ဦးကို အာခံခဲ့သူ ဖီဒဲလ် ကက်စရိုမှာ ယမန်နေ့တွင် ကွယ်လွန်သွားခဲ့ပြီဟု နိုင်ငံပိုင်ရုပ်သံက ကြေငြာခဲ့သည်။

အသက် ၉၀ အရွယ်ရှိ သမ္မတဟောင်း ကက်စထရိုမှာ ညနေ ၇ နာရီတွင် ကွယ်လွန်သွားခဲ့ခြင်းဖြစ်ပြီး ၎င်း၏ ညီဖြစ်သူ လက်ရှိသမ္မတ ရာအူးလ် ကက်စထရိုကလည်း ထိုသတင်းကို အတည်ပြုခဲ့သည်။

အမေရိကန်အစိုးရမှာ ကက်စထရိုအား လုပ်ကြံသတ်ဖြတ်ရန်နှင့် ၎င်းအား ဖြုတ်ချရန်အတွက် ကန်ဒေါ်လာ ၁ ဘီလီယံကျော် သုံးစွဲခဲ့သော်လည်း ၎င်းကို အနာတရဖြစ်အောင်ပင် မလုပ်နိုင်ခဲ့ဘဲ နောက်ဆုံး ရောဂါဖြင့် ကွယ်လွန်ခဲ့ခြင်းဖြစ်သည်။

ကျူးဘားပြည်သူများက ဖီဒဲလ်မှာ ဆင်းရဲမွဲတေသူများအတွက် မမောနိုင်မပမ်းနိုင် ကာကွယ်ပေးခဲ့သူဖြစ်သည်ဟု မှတ်ယူကြပြီး ဝေဖန်သူများကမူ ၎င်းမှာ တိုင်းပြည်စီးပွားရေး ပျက်ဆီးအောင် ပြုလုပ်ခဲ့ကာ ၁၁ သန်းသော ကျူးဘားပြည်သူများ၏ အခြေခံလွတ်လပ်ခွင့်ကိုလည်း ငြင်းပယ်ခဲ့သည်ဟု ပြောကြားခဲ့သည်။

ကွန်မြူနစ်တစ်ဦးဖြစ်သည့် ဖီဒဲလ်ကက်စထရိုမှာ ကျူးဘားသမ္မတနှင့် ၀န်ကြီးချုပ်အဖြစ် နှစ်ပေါင်း ၅၀ ကြာ ဦးဆောင်ခဲ့ပြီး တိုင်းပြည်ကို တန်းတူညီမျှရှိသည့်၊ တရားဥပဒေစိုးမိုးသည့် နိုင်ငံတစ်နိုင်ငံဖြစ်အောင် တည်ဆောက်ပေးခဲ့သည်။ ၎င်း၏အစိုးရမှာ ဆရာဝန်နှင့် ကျောင်းဆရာ ထောင်ပေါင်းများစွာကို မွေးထုတ်ပေးခဲ့ပြီး၊ ကျူးဘားနိုင်ငံမှာလည်း ကမ္ဘာ့အနောက်ခြမ်းတွင် မွေးကင်းစကလေး သေဆုံးမှုနှုန်း၊ ပညာမတတ်မှုနှုန်း အနိမ့်ဆုံးနိုင်ငံ ဖြစ်လာခဲ့သည်။

Ref: Aljazeera